1 Vandu voha va Isilaeli pavamali kuyomboka mumfuleni Yoludani, Bambu Chapanga akamujovela Yoshua, 2 "Hagulayi vandu kumi na vavili pagati ya vandu va Isilaeli, tola mundu mmonga kuhuma mukila likabila, 3 na uvalagisayi na uvajovela vanonga maganga kumi na gavili pagati ya mfuleni Yoludani, balapala pavayimi vamteta, vagatola na kugapeleka pandu pamugona kilu ya lelu."

4 Penapo Yoshua akavakemela vandu kumi na vavili veavahagwili kuhuma mumsambi wa Vaisilaeli, mundu mmonga kuhuma mukila likabila, 5 na akavajovela, "Mulilongolelayi Lisanduku la lilaganu la Bambu Chapanga winu, mbaka pagati ya mfuleni Yoludani. Kila mundu pagati yinu agegayi liganga limonga mumavega gaki, liganga limonga pahala pa kila likabila la Isilaeli. 6 Lijambu lenili yati livya ngati ukumbuso pagati yinu mumagono gegibwela vana vinu pevakuvakota manayaki kyani maganga aga, 7 Penapo yati mkuvajovela kuvya lukumbi Lisanduku la Lilaganu la Bambu Chapanga pevaliyombosa pa mfuleni Yoludani, manji gayimili na gagendili lepi. Hinu maganga aga yati givya ukumbuso kwa Vaisilaeli magono goha gangali mwishu."

8 Hinu Vaisilaeli vala vakakita ngati Yoshua chavalagizi. Vakatola maganga kumi na gavili kuhuma mumfuleni Yoludani kulandana na mvalangu wa makabila ga Vaisilaeli ngati Bambu Chapanga chamlagizi Yoshua. Na vene vakagagega, vakahamba na kugatula pandu pevagonili kilu yila. 9 Mewa Yoshua akagayimika maganga gangi kumi na gavili gala pagati ya mfuleni Yoludani pandu pala pevayimili vamteta vevagegili Lisanduku la Lilaganu lila. Maganga genago gavii balapala mbaka lelu. 10 Vamteta vevagegili Lisanduku la Lilaganu vala vakayima palapala pagati ya mfuleni Yoludani mbaka vandu voha pevamalili kukita kila chindu Bambu Chapanga cheamujovili Yoshua muni avajovelayi vandu. Hinu vakitili goha ngati Musa cheamlagisi Yoshua.

Vandu vakayumbatika kuyomboka. 11 Bahopo vandu voha pevamalili kuyomboka ndu, vamteta vakayomboka na Lisanduku la Lilaganu la Bambu Chapanga na vakagenda palongolo ya vandu vevavalingulilayi kuhuma kutali kwevayimili. 12 Vandu va likabila la Leubeni na va likabila la Gadi na wa likabila la Manase vapinga venavo vakayomboka kuni vavii na vindu vyavi vya ngondo, ngati chevalagiswi na Musa. 13 Kwavii na vandu ngati elufu alubaini vevajitendelekil kwa ngondo vakapita palongolo ya Bambu Chapanga vakahamba pandu paselede papipi na Yeliko ndava ya ngondo. 14 Ligono lenilo Bambu Chapanga, akamkita Yoshua avya mvaha palongolo ya Vaisilaeli voha, na vene vakamtopesa Yoshua mumagono ga wumi waki woha ngati chevamutopisi Musa.

15 Kangi Bambu Chapanga akamujovela Yoshua, 16 "Vajovela vamteta vevagegili Lisanduku la Lilaganu vahuma mumfuleni Yoludani." 17 Ndi Yoshua akavajovela vamteta vala, "Muwuka mumfuleni." 18 Vamteta vevagegili Lisanduku la Lilaganu la Bambu Chapanga pevamali kuhuma mumfuleni Yoludani, na pevalivatili ndu pandu payumu manji ga mfuleni Yoludani gakatumbula kugenda na kumema ngati pakutumbula.

19 Vaisilaeli pevamali kuyomboka mfuleni Yoludani ndi lavii ligono la kumi la mwehi wa kutumbula, vakajenga vindanda na kutama kwa lukumbi ku muji wa ku Giligali, upandi kwelihumila lilanga wa Yeliko. 20 Kwenuko ku Giligali ndi Yoshua akagayimika maganga gala kumi na gavili gevagegili kuhuma ku mfuleni Yoludani. 21 Kangi Yoshua akavajovela Vaisilaeli, "Pamagono gegibwela viveleku vinu vyakavakotayi vadadi vavi, maganga aga mana yaki kyani? 22 Yati mukuvajovela kuvya Vaisilaeli vayombwiki pandu payumu mumfuleni Yoludani. 23 Yati mukuvajovela Bambu Chapanga winu agakakamisi manji ga mfuleni Yoludani ndava yinu, mbaka pemwamalili kuyomboka. Bambu Chapanga winu akitili aga kwa mfuleni Yoludani kuwanangana na chila cheakitili nyanja Shamu, lukumbi peayumisi manji palongolo yitu mbaka petamali kuyomboka. 24 Akitili chenicho muni vandu voha va mulima vamanyayi Bambu Chapanga ndi mweavi na makakala, na kuvya lukumbi lwoha mganikiwa kumfugamila Bambu Chapanga winu magono goha gangali mwishu."