1 Hinu Yoshua, mwana Nuni, akavatuma vandu vavili chimfiyu kuhuma ku Shitimu vahambayi kukita umang'omesi mumulima wenuwo, neju mumuji wa Yeliko. Vakahamba, vakahika munyumba ya mkemi mweikemelewa Lahabu ndi vakagona mwenumo. 2 Nkosi wa muji wa Yeliko akayuwana kuvya Vaisilaeli nunuyu vabwelili kilu muni kukita umang'omesi pamulima. 3 Nkosi wa pa Yeliko akavatuma vajumbi vakamjovela Lahabu, "Vahumisayi vandu vevabwelili munyumba yaku ndava ya kukita umang'omesi mulima woha!"

4 Nambu Lahabu avahihili vandu vavili vala, na akavayangula vajumbi va nkosi, "Chakaka vagosi venavo vabwelili kwa nene, nambu nene namanyili lepi kwevahumalili, 5 na pechatumbwili chitita lukumbi lwa kudinda limlyangu la muji, vandu venavo vawukili. Na nene nimanyili lepi kwevahambili, muvalandayi kanyata pangi yati mukuvakolela." 6 Nambu Lahabu avahihili vandu venavo kudali akavagubika mapehe ga mmea weukemiwa kitani, geagadandisi kudali. 7 Penapo vandu vevatumwili na nkosi vala vakavalanda kwa kupitila njila yeyihamba ku Yoludani. Bahapo pevahumili ndu kuvala ya muji, limlyangu likadindwa.

8 Kwakona vamang'omesi vala vangagona Lahabu akavahambila kudali, 9 akavajovela, "Nimanyili kuvya Bambu Chapanga avapelili mulima uwu, ndava yeniyo tivii na wogohi neju ndava yinu na vandu voha va mulima uwu vadenyiki mtima ndava yinu. 10 Ndava tiyuwini namuna Bambu Chapanga cheagayumisi manji munyanja ya Shamu palongolo yinu pemwawukayi ku Misili. Mewa tayuwini namuna chemwavakitili Sihoni na Ogu vankosi vavili va Vaamoli vevavi kwelihumila lilanga kumwambu ya mfuleni Yoludani, pala pemwavakomili njwee. 11 Petayuwini mambu genago, tadenyiki mtima na tamaliki makakala njwee ndava yinu. Muni Bambu Chapanga winu ndi Chapanga wa vyoha vyevivi kunani na pahi pamulima. 12 Hinu, chondi munilapilayi kwa liina la Bambu Chapanga kuvya yati munikitila ubwina nene na valongo vangu ngati ubwina wula wenivahengili nene. Na munipelayi ulangisu muni nivasadikayi. 13 Munihaidayi kuvya yati mukuvaleka mumi dadi na nyina wangu, vahaja vangu na valumbu vangu, pamonga na valongo voha vevitama kwavi kuvya yati mukutisangula na lifwa!"

14 Vamang'omesi vala vakamuyangula Lahabu, "Wumi winu ndi wumi witu! Ngati ukuvajovela lepi vandu chetihenga, Bambu Chapanga peakutipelayi mulima uwu, yati tikuhengela kwa ubwina na usadikika."

15 Kangi Lahabu akavahelesa vala vandu vavili kwa nyosi kupitila palidilisha, ndava muni nyumba yaki yawungini na luwumba lwa muji wa Yeliko. 16 Akavajovela, "Muhamba kuhitumbi mukajihihayi muni vevakuvalanda vakotoka kuvakolela. Mtama kwenuko magono gadatu mbaka vandu venavo peviwuyayi. Kangi ndi muwuya kwemwahumili."

17 Vagosi vala vakamujovela Lahabu, "Tete yati tikita njwe lijambu leutikitili tijova kwa chilapu. 18 Yuwanila petiyingila pamulima uwu veve yikugana ukitayi naha, kungayi nyosi iyi yidungu palidilisa leutipitisili. Yati ukuvavika pamonga dadi waku, nyina waku na vahaja vaku na valongo va dadi vaku voha munyumba yaku. 19 Ngati mundu yoyoha pagati yavi akahuma kuvala ya nyumba yaku na kuhamba msenda na kwenuko akakomiwa, mihalu ya lifwa laki yati yivya yaki. Nambu ngati akakomiwa mundu yoyoha mweavii mugati pamonga na veve, mihalu ya lifwa laki yati yivya yitu. 20 Nambu ngati umujovili mundu yoyoha kuvala mambu gala getibweli kuhenga, tete yati tidinduliwa kuhuma mu chilapu chenichi chetikulapili." 21 Mwene Lahabu akavajovela, "Niyidakili yivyayi ngati chemujovili." Ndi akalagana nawu, na vene vakawuka na mwene akakunga nyosi yidung'u yila palidilisa.

22 Vamang'omesi vakahamba kumlima wa vitumbi kujihiha mumagono gadatu. Vandu vala vevavalandalilayi vavalondili nambu vavawene lepi kangi vakawuya ku Yeliko. 23 Penapo vamang'omesi vavili vakatumbula kuwuya. Vakahelela kuhuma kuhitumbi vakakupuka mfuleni na kumuhambila Yoshua, mwana wa Nuni ndi vakamujovela goha gegavahumalili, 24 vakamjovela Yoshua, "Chakaka timanyili kuvya Bambu Chapanga atipelili mulima woha ndava muni vakolonjinji va mulima uwu vindendemeka kwa wogoyi ndava yitu."