1 Pandu pa mulima pevapewili vandu va likabila la Yuda kwa njila ya kukina gudugudu kulandana na lukolo zavi, zadandasiki kuhuma kusini kwelihumila lilanga ya mulima wa Edomu mbaka kusini kulukongolo lwa Sini.

2 Mubaka wavi upandi wa kusini watumbwili pandu pa kusini wa Nyanja ya Mwinyu, 3 na wene ukayendelela upandi wa kusini mbaka kuhika kuhitumbi ya Akilabimu, na kuyendelela mbaka mu lukongolo lwa Sini, kangi ukahamba upandi wa kusini wa Kadeshi Balinea. mewa ukayendelela papipi na Hesiloni, mbaka Adali, na kangi ukang'anamuka kuhamba ku Kalika. 4 Kangi ukayendelela mbaka ku Azimoni na kuwungana na kapela ka Misili na kumalakisila mu Nyanja Meditelania. Wenuwu ndi mubaka wa likabila la Yuda kwa upandi wa kusini.

5 Kwa upandi welihumila lilanga mubaka wavi watumbwili Nyanja ya Mwinyu mbaka pala mfuleni Yoludani peuyingilila munyanja.

Na upandi wa kasikazini mubaka wavi watumbwili pala pevikonganeka Nyanja ya Mwinyu na mfuleni Yoludani.

6 Mubaka wenuwo wapitili ku Beti Hogila na kasikazini ya Beti Alaba mbaka kuliganga la Bohani mwana wa Leubeni. 7 Kuhuma penapo, wayendalili mbaka pa Debili kulikemba la Akoli na kasikazini kuhambila ku Giligali, wewilolesana na chidunda cha Adumimu weuvii kusini mwa likemba. Kangi ukayendelela mbaka kuchinyepa cha ku Eni Shemeshi na kuhambila ku Eni Logeli, 8 Kangi mubaka wenuwo wapitili kulikemba la Hinomu upandi wa kusini wa chitumbi cha Vayebusi yaani Yelusalemu. Kuhuma penapo ukakwela kuhamba kuchituvilu cha chitumbi chechivi kwelitipama lilanga kulikemba la Hinomu na kuhika pamwishu wa likemba la Lefaimu. 9 Kuhuma pachituvilu cha chitumbi chenicho mubaka wenuwo wayendalili mbaka kuchinyepa cha manji cha Nefutoa. Penapo mubaka ukang'anamuka kuhamba pamiji ya hitumbi Efuloni na kuhelelela ku Baala yaani Kiliati Yealimu, 10 Kangi mubaka ukatindila kuhuma ku Baala mbaka kuchitumbi Seili na ukapita kukasikazini mwa chitumbi Yealimu yaani Kesaloni, ukayendelela mbaka ku Beti Shemeshi na wapitili kula papipi na Timuna. 11 Mubaka ukayendelela mbaka kuupandi wa kasikazini wa Ekiloni, ukatindila kuhamba ku Shikiloni kwenuko ukapita papipi na chitumbi Baala mbaka ku Yabineli. Mubaka wenuwo wamalakisili ku nyanja ya Meditelanea. 12 Mubaka wa upandi walitipama lilanga ndi wavii nyanja ya Meditelanea.

Ndi cheyavii mibaka ya pandu pevapewili vandu va likabila la Yuda kulandana na kolo zavi.

13 Kalebu mwana wa Yefune apewili pandu pa mulima wa Yuda ngati Bambu Chapanga cheamulagizi Yoshua. Apewi Kiliati Aliba amala muji wa Aliba mweavii gogo wa Anaki. Muji wenuwo hinu ukemiwa Hebuloni. 14 Kalebu akavavinga kuhuma mumuji wenuwo lukolo zidatu za Anaki, ndi Lukolo lwa Sheshai na lukolo lwa Ahimani na lukolo lwa Talimai. 15 Kuhuma ku Hebuloni akahamba kutovana na vandu va ku Debili, muji wenuwo pakutumbula wakemiwi Kiliati Sefeli. 16 Kalebu akavajovela kuvya, "Mundu mweakuvahotola vandu va ku Kiliati Sefeli na kuutola muji wenuwo, mundu mwenuyo yati nikumgegesa msikana wangu Akisa." 17 Penapo, Otinieli mwana wa Kenazi, mubena waki Kalebu akautola muji wenuwo kuvya waki, ndi Kalebu akamugegesa msikana waki. 18 Pa ligono la ndowa yavi, Akisa akamujovela Otanieli ukamyupa Kalebu mgunda. Lukumbi lwenulo Akisa avii akweli lipunda na peahulukayi pahi, Kalebu akamukota, "Ugana nikukitila kyani?" 19 Akisa akayangula, "Unipela njombi, unipela pandu pepana manji muni ku mulima wa Negebu kweunipeli kula kuyumu." Kangi Kalebu akampela Akisa msikana waki hinyepa ya manji yehivii kuupandi wa kunena na ya upandi wa kunyasi papipi na Hebuloni.

20 Wu ndi mulima wevapewili vandu va likabila la Yuda kuvya wavi kulandana na kolo zavi. 21 Miji yeyavii kuupandi wa kusini mwa mulima wa Yuda kuhamba ku mubaka wa Edomu yavii, muji wa Kabiseeli na muji wa Edeli na muji wa Yaguli, 22 na muji wa Kina na muji wa Dimona na muji wa Adada, 23 na muji wa Kedeshi na muji wa Hazoli na muji wa Itinani, 24 na muji wa Zifu na mji wa Telemu na muji wa Bealoti, 25 na muji wa Hazoli Hadata na muji wa Kelioti Heziloni yani Hazoli, 26 na muji wa Amamu na muji wa Shema na muji wa Molada 27 na muji wa Hasali Gada na muji wa Heshimoni na muji wa Beti Peleti, 28 na muji wa Hasali Shuali na muji wa Beeli Beliheba na Biziotia, 29 na muji wa Baala na muji wa Iyimu na muji wa Ezemu 30 na muji wa Elitoladi na muji wa Kesili na muji wa Holima 31 na muji Sikilagi na muji wa Madimana na muji wa Sanisana 32 na muji wa Lebaoti na muji wa Shilihimu na muji wa Aini na muji wa Limoni. Miji yoha yavapewili ndi yavii ishilini na tisa pamonga na hijiji yaki.

33 Miji yeyavii kumitambu, ndi muji wa Eshitaoli na muji wa Sola na muji wa Ashina, 34 na muji wa Zanoa na muji wa Enganimu na muji wa Enamu, 35 na muji wa Yalimuti na muji wa Adulamu na muji wa Soko na muji wa Azeka, 36 na muji wa Shaalaimu na muji wa Aditaimu na muji wa Gedela yani Gedelotaimu. Miji yoha yevapewili ndi yavii kumi na mcheche pamonga na hijiji yaki.

37 Vapewili mewa miji ya Senani na muji ya Hadasha na muji wa Migidali Gadi, 38 muji wa Dileani na muji wa Mizipa na muji wa Yokiteeli, 39 na muji wa Lakishi na muji wa Bosikati na muji wa Eguloni, 40 na muji wa Kaboni na muji wa Lahimasi na muji wa Kitilishi, 41 na muji wa Gedeloti na muji wa Beti Dagoni na muji wa Naama na muji wa Makeda. Miji yoha yevapewili ndi yavii kumi na sita pamonga na hijiji yaki.

42 Kangi vakapewa miji ya Libina na muji wa Eteli na muji wa Ashani, 43 na muji wa Yifuta na muji wa Ashina na muji wa Nezibu, 44 na muji wa Keila na muji wa Akizibu na muji wa Malesha. Miji yoha yevapewili ndi yavii tisa pamonga na hijiji yaki.

45 Mewawa vapewili muji wa Ekiloni pamonga na miji yaki hidebe na hijiji yaki, 46 na miji yoha hivaha na hidebe na hijiji yeyivii papipi na muji wa Ashidodi, kuhuma muji wa Ekiloni mbaka nyanja ya Meditelanea.

47 Muji wa Ashidodi na Gaza pamonga na miji na hijiji yaki, mbaka ku kapela ka ku Misili mbaka mbwani ya nyanja ya Meditelanea.

48 Miji yeyavii ku mulima wa hitumbi, ndi yavii muji wa Shamili na muji wa Yatili na muji wa Soko, 49 muji wa Dana na muji wa Kiliati Sana yani Debili, 50 na muji wa Anabu na muji wa Eshitemoa na muji wa Animu, 51 na muji wa Gosheni na muji wa Holoni na Gilo. Miji yoha yevapewili ndi yavii kumi na yimonga pamonga na hijiji yaki.

52 Mewa vapewili muji wa Alabu na muji wa Duma na muji wa Eshani, 53 na muji wa Yanimu na muji wa Beti Tapua na muji wa Afeka, 54 na muji wa Humta na muji wa Kiliati Aliba yani Hebuloni na Sioli. Miji yoha yevapewili ndi yavii tisa pamonga na hijiji yaki.

55 Vandu va likabila la Yuda mewa vapewili muji wa Maoni na muji wa Kalimeli na muji wa Zifu na muji wa Yuta, 56 na muji wa Yezileli na muji wa Yokideamu na muji wa Zanoa, 57 na muji wa Kaini na muji wa Gibea na muji wa Timna. Miji yoha yevapewili ndi yavii kumi pamonga na hijiji yaki.

58 Mewawa vapewili muji wa Halihuli na muji wa Beti Suli na muji wa Gedoli, 59 na muji wa Maalati na Beti Anoti na muji wa Elitekoni. Miji yoha yevapewili ndi yavii sita pamonga na hijiji yaki.

60 Mewawa vapewili muji wa Kiliati Baali, wewikemiwa Kiliati Yealimu na muji wa Laba. Miji yoha yevapewili ndi yavii hivili pamonga na hijiji yaki.

61 Miji ya kulukongolo ndi yavii Beth Alaba na Midini na Sekaka, 62 na muji wa Nibishani na muji wa Mwinyu na muji wa Engedi. Miji yoha yevapewili ndi yavii sita pamonga na hijiji yaki.

63 Nambu vandu va likabila la Yuda vahotwili lepi kuvavinga Vayebusi vevavii vakolonjinji va pa Yelusalemu, na mbaka lelu Vayebusi vakona vitama mumuji wenuwo pamonga na vandu va likabila la Yuda.