1 Ava ndi vankosi vevatoviwi na Vaisilaeli na kuvanyaga miji yavi yeyavili kumwambu ya mfuleni Yoludani upandi welihumila lilanga, kuhuma likemba la Alunoni mbaka kuchitumbi Helumoni, na likemba loha la mfuleni Yoludani upandi welihumila lilanga. 2 Sihoni nkosi wa Vaamoli, mweatalalili ku Heshiboni. Mwenuyu ndi atalalili kuhuma ku Aloeli, muji weuvii pamuhana ya likemba la Alinoni, kutumbula muji weuvi pagati ya likemba la mfuleni Yaboki, wewavii mbaka wa Vaamoni. Wenuwu ndi yapinga ya Gileadi 3 Mewa atalalili upandi waliumila lilanga wa likemba la mfuleni Yoludani, kutumbula liliva Galilaya mbaka nyanja ya mwinyu, mbaka ku Beti Yeshimoti na upandi wa kusini pahi ya mihelelu ya Pisiga.

4 Mewa vamhotwili nkosi Ogu nkosi wa ku Bashani, mweavi mmonga wa masigalilu wa Valefai, mweatalalili kuhuma Ashitaloti mbaka Edilei. 5 Mwene atalalili kuhuma chitumbi Helimoni na ku Seleka na Bashani yoha mbaka kumibaka ya Vageshulina na Vamaaka na Yapinga ya Gileadi, mbaka kumbaka wa Sihoni nkosi wa ku Heshiboni.

6 Musa mtumisi wa Bambu Chapanga pamonga na Vaisilaeli ndi vakavatova vankosi venavo. Musa mtumisi wa Bambu Chapanga akavapela miji yeniyo yivya yavi vandu va makabila ga Leubeni na Gadi na yapinga ya likabila la Manase hivya uhali wavi.

7 Ava ndi vankosi va milima ya upandi welitipama lilanga mwa mfuleni Yoludani, vevakamuliwi na Yoshua pamonga na Vaisilaeli kutumbula Baali Gadi mulikemba la Lebanoni, mbaka chitumbi Halaki upandi wa kusini papipi na Seili. Yoshua akagagavila makabila ga Vaisilaeli milima yeniyo kuvya uhali wavi. 8 Mlima wenuwo wavii pamonga na pandu pa hitumbi na mitambu na pandu pa likemba la mfuleni Yoludani na mihelelu ya hitumbi na dasi na pandu pa kusini. Vandu vevatamili mu mulima wenuwo ndi Vahiti na Vaamoli na Vakanaani na Vapelizi na Vahivi na Vayebusi. 9 Vaisilaeli vavahotwili vankosi va miji yeniyi, Nkosi wa ku Yeliko na nkosi wa Ai muji weuvi papipi na Beteli, 10 na nkosi wa ku Yelusalemu na nkosi wa ku Hebuloni, 11 na nkosi wa ku Yalimuti na nkosi wa ku Lakishi, 12 na nkosi wa ku Eguloni na nkosi wa ku Gezeli, 13 na nkosi wa ku Debili na nkosi wa ku Gedeli, 14 na nkosi wa ku Holima na nkosi wa ku Aladi, 15 na nkosi wa ku Libina na nkosi wa ku Adulamu, 16 na nkosi wa ku Makeda na nkosi wa ku Beteli, 17 na nkosi wa ku Tapua na nkosi wa ku Hefeli, 18 na nkosi wa ku Afeka na nkosi wa ku Lashaloni, 19 na nkosi wa ku Madoni na nkosi wa ku Hazoli, 20 na nkosi wa ku Shimuloni Meloni na nkosi wa ku Akishafi, 21 na nkosi wa ku Taanaki na nkosi wa ku Megido, 22 na nkosi wa ku Kedeshi na nkosi wa ku Yokineamu wa muji weuvii papipi na chitumbi Kalimeli, 23 na nkosi wa mlima wa Doli weuvii ku Nafati Doli na nkosi wa ku Goiimu yeyivi ku Giligali, 24 na nkosi wa ku Tiliza, jumua ya vankosi venavo voha vavii selasini na mmonga.