1 Mamilyangu ga kuyingilila mumuji wa Yeliko gadindiwi chingangali ndava ya Vaisilaeli. Kawaka mundu mweahotwili kuyingila amala kuhuma kuvala ya muji wenuwo. 2 Hinu Bambu Chapanga akamujovela Yoshua, "Yuwanila nikupelili uhotola wa kuutola muji wa Yeliko pamonga na nkosi waki na manjolinjoli vaki vakekesi. 3 Veve pamonga na vandu vaku va ngondo vevana vindu vya ngondo yati mukuutindilayi muji wenuwu mala yimonga kwa ligono, yati mukita chenichi mumagono sita. 4 Vamteta saba, kila mumonga agegayi lipenenga laki la ling'elu la limbelele ligosi, yati vilongolela palongolo ya Lisanduku la Lilaganu la Bambu Chapanga. Muligono la saba yati mukuutindila muji wenuwo mala saba, kuni vamteta vipyula mapenenga gavi. 5 Peuyuwana lwami luvaha lwa mapenenga gevipyula vamteta, ndi vandu voha vaywanga kwa lwami luvaha, kangi luwumba lwa muji yati lugwa pahi na kila mmonga ayingila mumuji wenuwo kuhuma pala paavili."

6 Hinu Yoshua msongolo wa Nuni akavakemela vamteta na akavajovela, "Muligegayi Lisanduku la Lilaganu, na vamteta saba valongolelayi palongolo ya Lisanduku kuni vagegili mapenenga." 7 Na mwene Yoshua akavajovela vandu, "Muhamba kulongolo muutindila muji, na vandu vevagegili vindu vya ngondo valongolelayi palongolo ya Lisanduku la Lilaganu la Bambu Chapanga."

8 Yoshua peamalili kulongela na vandu, ndi vamteta saba vevagegili mapenenga saba ga mang'elu ga mambelele gagosi vakalongolela palongolo ya Bambu Chapanga kuni vipyula mapenenga, na mumbele yavi lalandayi Lisanduku la lilaganu la Bambu Chapanga. 9 Vandu vevana vindu vya ngondo vakagenda palongolo ya vamteta vevapyula mapenenga, na vandu vangi vakagenda mumbele ya Lisanduku lenilo, kuni mapenenga giyendelela kupyuliwa. 10 Nambu Yoshua akavalagiza vandu kuvya, "Mkotoka kuywanga lwami lwa ngondo, amala kulongela kwa lwami luvaha wala kujova linenu loloha mbaka ligono lila lenikuvajovela mywanga; lukumbi lwenulo ndi yati muywanga." 11 Hinu Yoshua akavalagizi vandu vala valitola Lisanduku la Lilaganu la Bambu Chapanga lila na vautindila muji wula mala yimonga. Kangi vawuya pandu pavi pa kugona.

12 Ligono lelalandili Yoshua ayimwiki lukela pehe, na vamteta vakagega Lisanduku la Lilaganu la Bambu Chapanga. 13 Vamteta saba vala vevana mapenenga saba ga mang'elu ga mambelele gagosi vagendili palongolo ya Lisanduku la Lilaganu la Bambu Chapanga kuni vakugapyula. Vandu vevana vindu vya ngondo vakalongolela palongolo yavi na valonda mumbele ya Lisanduku la Lilaganu. Mapenenga giyendelela kupyulwa lukumbi lwoha. 14 Ligono lelagelekili vakautindila muji mala yimonga na kuwuya mu kambi zavi. Vakitili chenicho mumagono sita.

15 Ligono la saba vakayimuka lukela pehee, vakautindila muji wenuwo chilachila ngati magono goha sita, nambu ligono ili la saba vautindili mala saba. 16 Pevatindili mala ya saba, vamteta pevapyulayi mapenenga kwa lwami luvaha, Yoshua akavajovela vandu, "Mywanga kwa lwami luvaha, Bambu Chapanga avapelili muji uwu! 17 Muji uwu yati ukomakeswa njwee na kila chindu chechivili mugati yaki yati viwusiwa ndava ya Bambu Chapanga. Nambu Lahabu ndu yula mdala mkemi ndi mweisigalila mumi pamonga na voha vevavii munyumba yaki, muni avahihili vamang'omesi vetavatumili vala. 18 Nambu mujiyangalila mkoto kutola chindu chechivikiwi ndava ya Bambu Chapanga muni mkotoka kujiletela uhalabisu kwa kutola chocho pagati ya vyenivyo na kujiletela mang'aiso mwavenena pandu pepajengiwi mandanda na Vaisilaeli ga kutama mulukumbi ndu. 19 Nambu vindu vyoha, madini ga feza na zahabu na hyombo vya shaba na chuma ndi ndava ya Bambu Chapanga ndu, viganikiwa viletwa ndava ya Bambu Chapanga na kuvikwa muchibana chaki."

20 Hinu mapenenga pegapyuliwi, vandu pevayuwini lwami lwa mapenenga genago, ndi na vene vakaywanga kwa lwami luvaha neju. Pena luwumba lwa muji lukagwa na vandu vakauzangila muji kila mundu ayingalili kuhumila pandu peayimili. 21 Vakavakomakesa kwa mapanga vagosi na vadala, vasongolo na vagogo pamonga na ng'ombi na mambelele na punda pamonga na vindu vyoha vyevyavili mugati ya mumuji wenuwo.

22 Yoshua akavajovela vamang'omesi vavili vevahambili kuukotakesa mulima wula, "Muhamba kunyumba ya mkemi yula, mukamuleta mdala mwenuyo pamonga na valongo vaki voha ngati chemwamlapili." 23 Ndi vamang'omesi vakahamba vakamuleta Lahabu na dadi waki na nyina waki na valongo vaki pamonga na vandu voha veavii navu, vakavatola na kuvavika kuvala papipi na lindanda la Vaisilaeli. 24 Penapo vakauyocha motu muji wula na vyoha vyevavi mugati yaki nambu lepi madini ga feza na zahabu na vyombo vya shaba na vya lyuma, vavivikili muchibana cha nyumba ya Bambu Chapanga. 25 Nambu Yoshua amlekili mumi Lahabu, mkemi yula pamonga na voha vevavili munyumba ya dadi waki, na vindu vyoha vyeavili navyu. Chiveleku cha Lahabu chatamili pagati ya Vaisilaeli mbaka lelu ndava avahihili vamang'omesi vevatumwili na Yoshua kuung'omesa muji wa Yeliko.

26 Hinu penapo Yoshua akalapa na kujova, "Apewi likoto na Bambu Chapanga mundu yula mweilinga kuujenga kavili muji wa Yeliko.

Mundu yeyoha mweijenga mkingisa wa muji wenuwu yati akumuhovesa mwana waki mtumbula.

Yoyoha mweijenga mulyangu wa muji wenuwo mwana waki wa mwisu yati ifwa."

27 Ndi Bambu Chapanga akavya pamonga na Yoshua, na Yoshua akamanyikana pa mulima woha.