1 Ndi Bambu Chapanga akamujovela Yoshua, "Kotoka kuyogopa wala kudenyeka mtima, vatola manjolinjoli vaku voha na uhamba ukavazangila vandu va ku Ai. muni nikukitili veve umuhotolayi nkosi wa ku Ai pamonga na vandu vaki na muji waki pamonga na mulima waki. 2 Yati mukuvakitila vandu va ku Ai pamonga na nkosi wavi ngati chemwavakitili vandu va ku Yeliko na nkosi wavi, nambu lukumbi ulu mwihotola kutola vindu vyavi pamonga na mifuya yavi, ndava yinu. Muhabayi mukauzangila muji wenuwo kuhumila upandi wa kuyetu wa muji."

3 Hinu, Yoshua pamonga na manjolinjoli vaki voha vakahamba kuvazangila vandu va kumuji wa Ai. Yoshua akavahagula vandu vakekesi vevihotola kutovana ngondo elufu selasini, akavalongolesa lukumbi lwa kilu, 4 akavalagisa naha, "Muyuwanila bwina, nyenye yati mukuvanyemelela vandu va muji kuhumila upandi wa kuyetu. Mkoto kuhamba kutali na muji, nambu mujitendekeha kwa ngondo lukumbi lwoha. 5 Nene na vandu vevavii pamonga na nene, yati tikuuhegelela muji, kangi penapo vandu pevihuma kuvala ya muji kutovana na tete ngati chevakitili pakutumbula, tete yati tikuvatila. 6 Na vene yati viyendelela kutilandalila mbaka kutali chidogo ya muji wavi, muni yati vihololela kuvya vakutijumbisa ngati chevakitili pakutumbula. Hinu tete petikuvatila, 7 nyenye yati yikuvagana muhuma kwemuyuvalili na muuzangila muji. Muni Bambu Chapanga winu yati akuvapela nyenye uhotola wa kuukamula muji wenuwo. 8 Kangi mukamala kuutola muji, ndi muutinyisayi kwa motu ngati Bambu Chapanga chealagizi, genago ndi malagizu gemwilanda." 9 Hinu Yoshua akavajovela vahambayi, na vene vakahamba pandu pavi pa kujihiha, na vene vakatama pagati ya Betieli na Ai kunyemelela, upandi welitipamila lilanga mwa Ai. Nambu Yoshua agonili kilu yeniyo pamonga na Vaisilaeli pa kambi.

10 Yoshua akayimuka lukela pehe akavakemela vandu voha pamonga. Kangi mwene pamonga na vagogo va Vaisilaeli vakakwela kuhamba ku Ai palongolo ya vandu venavo. 11 Vandu voha vevavii pamonga naku, vakahamba vakauhegelela muji wa Ai, vakajenga lindanda na kupumulila upandi wa kasikazini wa Ai, pepavili na likemba pagati yavi na muji. 12 Yoshua avavikili vamanjolinjoli elufu muhanu, akavavika vanyemelelayi pagati ya muji wa Beteli na muji wa Ai, upandi welitipama lilanga wa Ai. 13 Avavikili manjolinjoli voha mupandu zavi vevavii pa kambi vavii upandi wa kasikazini wa muji wa Ai, na manjolinjoli vevinyemelela vala vavii upandi welitipama lilanga wa muji wa Ai. Kilu yiyo Yoshua akahamba kugona pa likemba lenilo. 14 Nkosi wa ku Ai peagaweni manjolinjoli ga Vaisilaeli, mwene pamonga na vagosi voha va muji vakawuka kanyata lukela pehee kuhamba pandu pepilolesana na Alabi muni vatovana na Vaisilaeli. Nambu amanyili lepi kuvya kuna vandu vavikiwi kuvanyemelela cha kuyetu ya muji. 15 Penapo Yoshua pamonga na vandu vaki vakajikita ngati vangavahotola, vakatumbula kutila kuhamba kulukongolo. 16 Vagosi voha vevanauhotola wa kutovana ngondo va ku Ai vakemeliwi vavalandalila Vaisilaeli, na vene vakamlandalila Yoshua, vakahamba kutali na kuuleka muji wavi. 17 Kawaka mgosi yoyoha mweanauhola wa kutovana ngondo mweasigalili pa muji wa Ai amala Beteli, voha vakahamba kuvalandalila Vaisilaeli, na muji wavi vakauleka waka changali hati mundu wa kuuyangalila.

18 Kangi Bambu Chapanga akamulagiza Yoshua, "Yinula mgoha weuvili muchiwoko chaku ulangisa ku muji wa Ai, muni yati nikukupela uhotola wa kuutola muji wenuwo." Hinu Yoshua akakita ngati cheajoviwi. 19 Yoshua peayinwili ndu mgoha waki kulangisa ku muji wa Ai, ndi vandu vevajihihili upandi wungi ndava ya kuunyemelela muji, vakahuma kanyata pandu pavi pevajihihili na kuyingila na kuuzangila muji. Vene vakautola muji na kuutinyisa kanyata. 20 Vandu va muji wa Ai pevang'anamwiki kumbele vakawona lyohi lihumila kumuji wenuo kukwela kunani. Nambu vahotwili lepi kutilalila kwokwoha muni Vaisilaeli van'ganamwiki na kutumbula kuvazangila. 21 Hinu Yoshua pamonga na Vaisilaeli voha pevaweni kuvya vevavii vinyemelela vamali kuukamula muji na lyohi litutuma, ndi vakavang'anamukila vandu va muji wa Ai na kuvakoma. 22 Vala vevanyemelelayi na vene vakahuma kuvala ya muji ndava ya kuvahanganila cha kumbele, penapo vandu va ku Ai vakajikolela vavii pagati ya Vaisilaeli pandi zoha zivili, Vaisilaeli vavakomili voha na kawaka mweasigalili amala kutila hati mmonga. 23 Nambu vakamtola nkosi wa muji wa Ai akona mumi na kumupeleka kwa Yoshua.

24 Vaisilaeli pevamalili kuvakomakesa njwe kwa upanga vandu voha va muji wa Ai kumigunda na kulukongolo kula kwevavajumbisili, kangi vawuyili kumuji wa Ai na kuvakoma voha vevasigalili kumuji. 25 Vandu voha va Ai vevakomiwi ligono lenilo vagosi na vadala ndi vavii elufu kumi na vavili. 26 Yoshua ahelisi lepi chiwoko chaki chila cheakamulili mgoha waki kulolesa muji wa Ai mbaka pevamalili kuvakoma vandu voha va muji wenuwo. 27 Vaisilaeli vatolili mifuya na vindu vya muji wula, ngati Bambu Chapanga cheamulagisi Yoshua. 28 Hinu Yoshua akaukomakesa muji wa Ai kwa motu. Aukitili kuvya lilundu la mang'ova kukavya ukiva wa magono goha gangali mwishu na gasigalili kuvya chenicho mbaka lelu. 29 Kangi akamvamba pamkongo nkosi wa muji wa Ai mbaka chimihi. Lilanga pelatumbwili kutipimi, Yoshua akalagisa vahulusayi higa yaki na vakautagayi pamulyangu wa muji na valundikayi lilundu la maganga gamahele panani yaki, lilundu lenilo livii kwenuko mbaka lelu.

30 Penapo Yoshua akamujengela Bambu Chapanga wa Vaisilaeli pandu pa kuwusila teta kuchitumbi Ebali, 31 atenganizi kulandana na malagizu ndi Musa mtumisi wa Bambu Chapanga cheavalagisi Vaizilaeli. Akajenga ngati chila cheyayandikwi muchitabu cha mihilu ya Musa, "Yati pivya kuwusila luteta pepajegiwi kwa maganga gangahongolewa amala kupamiswa na chindu chochoha cha lyuma. Panani ya pandu pa luteta penapo vamuwusili Bambu Chapanga teta za kutinyisa na teta za uteke." 32 Kwenuko palongolo ya Vaisilaeli voha, Yoshua ayandiki kangi mihilu ya Musa panani ya maganga chilachila ngati cheyayandikwi pakutumbula 33 Vaisilaeli voha pamonga na vachilongosi vavi na vagogo na vahamula na vayehe voha vevavii pagati yavi. Vakayima kila upandi kulolesana na Lisanduku la Lilaganu la Bambu Chapanga palongolo ya vamteta Valawi vevagegili Lisanduku lenio, vapinga vavi vakayima palongolo ya chitumbi Gelizimu na vapinga vangi vakayima palongolo ya chitumbi Ebali, ngati Musa mtumisi wa Bambu Chapanga chealagizi penapo kadeni kuvala namuna chevimotisiwa Vaisilaeli. 34 Kangi Yoshua akavasomela malovi goha ga mihilu, kuvala mota na likoto ngati cheyayandikwi muchitabu cha mihilu. 35 Yoshua alekili lepi kusoma hati linenu limonga lelilagizwi na Musa, asomili goha palongolo ya Vaisilaeli voha, vavii vagosi na vadala na vana pamonga na vayehe vevatama pagati yavi.