1 Kangi Yoshua akavakemela vandu va likabila la Lubeni na la Gadi na yapinga ya vandu va likabila la Manase. 2 Akavajovela, "Nyenye mkitili goha gemwalagiswi na Musa mtumisi wa Bambu Chapanga, mewa muyidakili goha genivalagizi. 3 Magono genaga goha katu mwavalekili lepi valongo vinu Vaisilaeli mbaka lelu, nambu mutimilisi gala goha gemwalagiswi na Bambu Chapanga winu. 4 Hinu Bambu Chapanga winu avapelili valongo vinu Vaisilaeli uteke ngati cheavahaidili, hinu muwuya kunyumba yinu ku mulima wemwapewili na Musa mtumisi wa Bambu Chapanga kuvya winu, ndi kula kumwambu ya mfuleni Yoludani. 5 Muvya mwavasadikika kuyidakila mihilu yila yemwalagizwi na Musa mtumisi wa Bambu Chapanga, kuvya mumgana Bambu Chapanga winu, mukita cheigana na muyidakila malagizu gaki, muvya mwavasadikika kwaki na mumuhengelayi kwa mitima yinu yoha na mipungu yinu yoha." 6 Hinu Yoshua akavamotisa na kuvalaga vahamba kunyumba yavi. 7 Kwa yapinga ya likabila la Manase, Musa avapelili ndima ya pa Bashani na yapinga yingi yila Yoshua avapelili ndima upandi walitipama lilanga wa mfuleni Yoludani pagati ya valongo vavi. Yoshua peavalagili vahambayi kunyumba yavi, avamotis, 8 akavajovela, "Muwuya kunyumba yinu kuni muvii na vindu vyamahele, misambi hivaha ya mifuya yinu na madini ga feza na madini ga zahabu na madini ga shaba na madini ga lyuma na nyula zamahele. Mugavanayi na valongo vinu vindu vyoha vyemwavanyagili vamakoko vinu."

9 Ndi vandu va likabila la Lubeni na Vagadi na yapinga ya likabila la Manase, vakalekana na vandu va makabila gangi ga Isilaeli ku Shilo kumulima wa Kanaani. Vakawuya kwavi mumulima wa Gileadi, mulima wevautolili na kuvya wavi kwa malagizu ga Bambu Chapanga ngati cheamulagizi Musa.

10 Vandu va likabila la Lubeni na Gadi na yapinga ya likabila la Manase pevahikili ku Geliloti papipi na mfuleni Yoludani, pamulima wa Kanaani, ndi vakajenga pandu pavaha pa kuwusila teta papipi ya mfuleni Yoludani. 11 Penapo vandu va makabila gangi ga Vaisilaeeli vakayuwana kuvya vandu va makabila ga Lubeni na Gadi na yapinga ya likabila la Manase, vajengeli pandu pa kuwusila teta papipi na mfuleni Yoludani kumulima wa Kanaani, mugati ya pandu pavi. 12 Pevayuwini genago ndi Vaisilaeli voha vakakonganeka ku Shilo ndava ya kuhamba kukomana nawu ngondo vandu va makabila ga kwelitipama lilanga.

13 Hinu vandu va Isilaeli vakamutuma Finehasi mwana wa mteta Eleazali, ahamba ku Gileadi kwa vandu va makabila ga Lubeni na Gadi na yapinga ya likabila la Manase. 14 Finehasi akahamba kuni alongosini na vandu kumi, kila mmonga avili mkulu wa lukolo mulikabila laki. 15 Vakulu venavo pevahikili ku Gileadi na kwa vandu va makabila ga Lubeni na Gadi na yapinga ya likabila la Manase, ndi vakavajovela, 16 "Muhotwili wuli kuleka kumsadika Bambu Chapanga wa Isilaeli kwa kukita lijambu ngati lenili? Muhotwili wuli kumleka Bambu Chapanga na hinu kujijengela pandu pa kuwusila teta ndava yinu na kumng'anamukila? 17 Mukumbuka chetambudili Chapanga ku Peoli, pala Bambu Chapanga peavabunili vandu vaki mwene kwa utamu wewakomili vandu vamahele. Takona ting'aika ndava ya utamu wenuwo. Wu, kubuda kwenuko kwakolili lepi? 18 Ndava kyani mulekili kumlanda Bambu Chapanga? Lelu mukamng'anamukila Bambu Chapanga, chilau yati akuvayomela Vaisilaeli voha. 19 Hinu ngati mulima winu wemwitama wabwina lepi ndava ya kumfugamila Chapanga, ndi muyomoka na mubwela pamulima wa Bambu Chapanga, pelivi lindanda la Bambu Chapanga, na mutama pamulima pamonga na tete. Nambu mukotoka kumng'anamukila Bambu Chapanga, mewa mkoto kuting'anamukila tete kwa kujijengela pandu pa kuwusila teta pepangavya pa Bambu Chapanga, Chapanga witu. 20 Wu, lukumbi Akani mwana wa Zela pealekili kuvya msadikika muvindu vyevyawusiwi ndava ya Bambu Chapanga, ligoga lavakolili lepi vandu voha va Isilaeli? Akani afwili lepi mwene ndu ndava ya kubuda kwaki."

21 Penapo vandu va makabila ga Lubeni na Gadi na yapinga ya likabila la Manase ndi vakavayangula vakulu va lukolo za Vaisilaeli, vakajova, 22 "Bambu Chapanga mweana makakala ndi mwene ndu mweavii na makakala, mwene amanyili kuvya ndava kyani tikitili genago na Vaisilaeli voha yati vimanya mewa! Ngati kwenuku ndi kung'amuka amala kuleka kumuyidakila Chapanga, hinu mukotoka kutileka tivya mumi lelu. 23 Ngati timlekili Bambu Chapanga na tikajengayi pandu pa kuwusila teta lwitu tavete, muni tiwusa teta za kutinyiswa za mabenu amala za uteke, Bambu Chapanga mwene ndi ahamula ndava yitu. 24 Nambu lepi cheyivili, tajengili kwa kuyogopa kuvya pangi magono gegibwela viveleku vinu yati vakuvakota viveleku vitu, ‘Nyenye muna kyani na Bambu Chapanga, Chapanga wa Vaisilaeli? 25 Mulolili lepi kuvya Bambu Chapanga avikili mfuleni Yoludani uvya mubaka pagati yinu na tete? Nyenye mwavandu va makabila ga Lubeni na Gadi muna pandu lepi kwa Bambu Chapanga.’ Ndava yeniyo ndi viveleku vinu valabwela kuvakita viveleku vitu valeka kumufugamila Bambu Chapanga. 26 Ndava yeniyo ndi tajovii titendekeha na kujenga pandu pa kuwusila teta, nambu lepi ndava ya kuwusila teta za kutinyiswa amala teta zingi, 27 nambu taganili pandu pa kuwusila teta apa ndi pavya ulangisu pagati yitu na nyenye na kwa viveleku vitu vyevibwela, na kuvya tete tiganikiwa mewa kumfugamila Bambu Chapanga kwa luteta zitu za kutinyiswa na kwa teta zitu za uteke, muni viveleku vinu vakoto kuvajovela viveleku vitu kuvya nyenye munapandu lepi popoha kwa Bambu Chapanga. 28 Kangi taholalili kuvya ngati lijambu lenili likajoviwa ndava yitu amala ndava ya viveleku vitu mumagono gegibwela, yati tijova, ‘Mulolayi luhumu lwa pandu pa kuwusila teta pa Bambu Chapanga lwelwajengiwi na vagogo vitu, lepi ndava ya kuwusila teta za kutinyiswa amala za mabenu nambu ndi ndava ya usahidi pagati yitu na nyenye.’ 29 Tete tiholalili lepi kumung'anamukila Bambu Chapanga hati padebe na kumuleka kwa kujijengela pandu pa kuwusila teta za kutinyisa na za uhembe na za uteke. Tiganili lepi kumuwusila teta pandu pangi neju, nambu ndi ngi pandu pa kuwusila teta pa Bambu Chapanga witu lweluvii palongolo ya lindanda laki."

30 Ndi mteta Finehasi na vachilongosi va msambi woha na vakulu va Vaisilaeli vevavii pamonga naku pevayuwini malovi genago ga vandu va makabila ga Lubeni na Gadi na yapinga ya likabila la Manase ndi vakakola. 31 Na mwene Finehasi mwana wa mteta Eleazali akavajovela vandu va makabila ga Lubeni na Gadi na yapinga likabila la Manase, "Lelu timanyili kuvya Bambu Chapanga avii pamonga na tete muni mwamng'amukili lepi. Hinu muvasangwili Vaisilaeli vakotoka kubuniwa na Bambu Chapanga."

32 Ndi Finehasi mwana wa mteta Eleazali pamonga na vachilongosi vayaki, vawuyili ku Kanaani kuhuma kula kwevakonganiki na vandu va makabila ga Lubeni na Gadi, kwenuko ku mulima wa Gileadi, na vene vakavamanyisa mambu genago. 33 Mambu genago gakavaganisa neju Vaisilaeli, vakamsengusa Chapanga vakaleka mipangu yavi kutovana ngondo na kuleka mganu wavi wa kuhalabisa njwee mulima wa makabila ga Lubeni na Gadi.

34 Hinu Vandu va makabila ga Lubeni na Gadi vakalukemela pandu pala pa kuwusila teta pa Edi, yani "Usaidi," muni vajovili, "Pandu penapa pa kuwusila teta ndi usaidi kwa tete na nyenye, kuvya Bambu Chapanga ndi Chapanga."