1 Nambu Vaisiaeli vavii lepi vasadika muvindu vyeviwusiwi ndava ya Bambu Chapanga, Akani mwana wa Kalimi, mweavii mwana wa Zabudi na Zabudi mwana wa Zela wa likabila la Yuda, atolili vindu mu vindu vila vyevyaganikiwa vitinyiswa. Hinu ligoga likali la Bambu Chapanga likavya kwa Vaisilaeli.

2 Hinu, Yoshua akavatuma vandu kuhuma pa Yeliko vahamba ku Ai, muji weuvi papipi na Beti Aveni upandi welihumila lilanga wa Beteli, akavajovela, vakwela kuhamba kuung'omesa mulima. Ndi vakahamba kuung'omesa muji wa Ai. 3 Vandu vala, vakawuya na kumjovela Yoshua, "Kotoka kupeleka vandu voha kuhamba kukomana na vandu va muji wa Ai, muni mulima wa Ai uvi na vagosi vadebe ndu, nambu ukapeleka vandu ngati elufu zivili amala vandu elufu zidatu yati vitosa njwee kuutova muji wenuwo." 4 Hinu vakahamba vandu ngati elufu zidatu ndu kuuzangila muji wa Ai, nambu vakajumbiswa na vandu va pamuji wa Ai. 5 Vandu va pamuji wa Ai vakavakoma Vaisilaeli ngati selasini na sita na vakavajumbisa vangi kuhuma mulyangu wa muji mbaka ku Shebalimu, vakavakoma kumihelelu. Ndava yeniyo Vaisilaeli vayogwipi, vakadenyeka mtima na vavii lepi na makakala kavili.

6 Ndi Yoshua akapapula nyula zaki, mwene pamonga na vagogo va Isilaeli. Vakajitaga pahi palongolo ya Lisanduku la Lilaganu la Bambu Chapanga mbaka chimihi, vakajinyala lububu mitu yavi kulangisa kuvya vavii mumalilu. 7 Yoshua akajova, "Vee Bambu Chapanga ndava kyani watiyombwisi mfuleni Yoludani na kutileta titovewayi na Vaamoli? Nambu mbanga ngautileki titama kumwambu ya mfuleni Yoludani! 8 Vee Bambu Chapanga, nijova wuli hinu, muni Vaisilaeli vavingiswi na vamakoko vavi? 9 Vakanaani pamonga na vandu va mulima uwu vakayuwanayi chetikitiwi yati vatizangila na kutikomakesa njwee pamulima. Hinu yati ukita kyani ndava ya kulangisa ukulu wa lihina laku?"

10 Bambu Chapanga akamjovela Yoshua, "Yima Ndava kyani ujigwihili pahi cha kukupama naha? 11 Vaisilaeli vabudili, vadenyili lilaganu langu lenavalagisi vakitayi, vatolili vindu vyevyavikiwi ndava ya Bambu Chapanga, Vaviyivili na vajovii udesi, vakavivika pamonga na vindu vyavi. 12 Ndi mana Vaisilaeli vihotola lepi kuvabuna vamakoko vavi. Vang'anamwiki na kuvatila muni viganikiwa kukomiwa. Yati nivya lepi pamonga na nyenye mbaka pemukuvikomakesa vindu vyeviganikiwa kukomakeswa. 13 Hamba, ukavakita vandu vayidakiliwa mukunifugamila nene, uvajovela, vajitendekeha njwee ndava ya kukonganeka na nene chilau, Bambu Chapanga wa Isilaeli nijova naha, ‘Yati muhotola lepi kuvatova vamakoko vinu mbaka pemwiwusayi vindu vyenivyo.’ 14 Hinu vajovela chilau lukela mwavoha mbwela palongolo yangu makabila goha, likabila lila lenikulihagula yati lipita palongolo ya lukolo kwa lukolo. Lukolo lula lwenikuluhagula yati lupita palongolo yangu, vandu va nyumba yimonga kwa nyumba yimonga. Nyumba yila yenikuyihagula yati vipita palongolo yangu, mundu mmonga mmonga. 15 Mundu yoyoha mwenikumkolela na vindu vila vyevyawusiwi ndava yangu, mundu mwenuyo yati itinyiswa mwene pamonga na vindu vyaki vyoha, muni adenyili Lilaganu langu, na ahengili mambu ga soni pa Isilaeli."

16 Hinu ligono lelalandili Yoshua ayimwiki lukela pehe, akavaleta Vaisilaeli voha likabila kwa likabila, na likahaguliwa likabila la Yuda. 17 Akaleta likabila la Yuda palongolo lukolo kwa lukolo, penapo lukolo lwa Zelai lukahaguliwa. Akaleta palongolo lukolo za Zelai vandu va nyumba yimonga kwa nyumba yimonga, penapo vakahaguliwa vandu va nyumba ya Zabudi. 18 Kangi Yoshua akavaleta palongolo vandu va nyumba ya Zabudi mundu mmonga kwa mmonga, na penapo akahaguliwa Akani mwana wa Kalimi, mwana wa Zabudi, mwana wa Zela wa likabila la Yuda. 19 Penapo Yoshua akamujovela Akani, "Chondi, wamwana wangu, umlumba Bambu Chapanga, Chapanga wa Isilaeli, na veve uyidakilayi mabudilu gaku kwa mlomo waku. Unijovela hinu kyani cheuhokili, ukotoka kunihiha chindu chochoha."

20 Akani akamuyangula Yoshua, chakaka nimbudili Chapanga. "Nimbudili Bambu Chapanga, Chapanga wa Isilaeli, chenichi ndi chenihengili, 21 penayiweni nyula yabwina kuhuma ku Babeli pamonga na vindu vila vyevyatoliwi na vipandi miya hivili za madini ga feza, na chipandi cha zahabu chechina utopa wa kilo yapinga, navinogili nikavitola. Yuwanila nivihihili mulindanda langu nigimalili pahi, na madini ga feza gavii pahi ya vindu vyenivyo."

22 Penapo Yoshua akavatuma vajumbi, ndi vakajumba kuhamba kulindanda la Akani. Vakavikolela vindu vila mulindanda laki na madini ga feza gavii pahi yaki. 23 Vakavitola vindu vyenivyo kuhuma mulindanda la Akani, vakavipeleka kwa Yoshua pamonga na kwa vandu voha va Isilaeli, na vene vakavidandasa pahi palongolo ya Bambu Chapanga. 24 Penapo Yoshua pamonga na Vaisilaeli voha, vakamutola Akani mwana wa Zela pamonga na madini ga feza na nyula ya ku Babeli yila na chipandi cha zahabu chila na vana vaki vagosi na vasikana na ng'ombi zaki na mapunda na mambelele gaki na lindanda laki pamonga na vindu vyoha vyeavili navyu. Vyoha vakavileta palikemba la Akoli mana yaki likemba la mang'aiso. 25 Yoshua akamukota Akani, "Ndava ya kyani utiletili tete mang'aiso naha? Lelu Bambu Chapanga yati ileta mang'aiso panani yaku!" Vaisilaeli voha vakamutova Akani kwa maganga mbaka akafwa. Mewa vakavatova vandu vaki voha kwa maganga mbaka vakafwa na kuvayocha kwa motu. 26 Vakalundika lilundu la maganga gamahele panani yaki, na lilundu lelilo livii mbaka lelu, pandu pala vakapakemela likemba la Akoli mbaka lelu.

Ndi ligoga la Bambu Chapanga likamalika.