1 Ndi Bambu Chapanga akamujovela Yoshua, 2 "Vajovelayi Vaisilaeli naha, mujihagulila miji ya kutilalila ngati chenamlagizi Musa akujovela. 3 Mundu yoyoha akamukomayi mundu changali kugana, muni ahotola kutilalila mumuji umonga pa miji yeniyo muni akotoka kukamuliwa na mundu mweigana kumkoma ndava ya kumlipisa ukomaji. 4 Mweakomili yati itilalila mumiji umonga pagati ya yeniyo na kuyima pamulyangu wa muji wenuwo na kuvadandaulila vagogo va muji wenuwo muhalu waki. Vagogo yati vakumupokela na kumupela pandu pa kutama pamonga nawu. 5 Ngati mundu mweilipisa akamulandalilayi mbaka kumuji wenuwo, ndi vagogo va muji wenuwo viganikiwa lepi kumuwusa mweakomili muni akomiwayi na mundu mwenuyo, ndava amukomili muyaki changagana, muni vahokini lepi hati ligono limonga. 6 Mweakomili mwenuyo yati iyendelela kutama mumuji wenuwo mbaka libanji la Vaisilaeli peviyuwanila muhalu waki na kumanya kuvya ahokili amala lepi na mbaka peifwa mteta mweavii mulihengu lukumbi lwenulo. Pegimalika genago mweakomili mwenuyo yati ihotola kuwuya kunyumba yaki mumuji wulawula weatilili."

7 Ndi vakahagula miji ya Kadeshi ku Galilaya kuhitumbi ya Nafutali na Shekemu kuhitumbi ya Efulaimu na Kiliati Alaba manayaki Hebuloni kumulima wa hitumbi ya Yuda. 8 Kumwambu ya mfuleni Yoludani, upandi welihumila lilanga wa muji wa Yeliko, vahagwili muji wa Bezeli weuvii pamtambu wa lukongolo lwa kunani, muji wenuwo ndi wula wevapewili vandu va likabila la Lubeni. Mewa vauhagwili Lamoti weuvii ku Gileadi weuvii muji wa likabila la Gadi na Golani ku Bashani mu pandu pa vandu va likabila la Manase. 9 Yeniyi ndi miji yevahagwili ndava ya vandu va Isilaeli na vayehe vevitama pagati yavi, ndava mundu yoyoha mweakumukoma muyaki changali kugana ahotola atilalila kwenuko akotoka kukomiwa na mundu mweigana kumulipisa, mbaka uhamula wa libanji peuwusiwa.