1 Yikavya vankosi voha va Vaamoli vevatamayi kumwambu ya mfuleni Yoludani kwelitipama lilanga, na vankosi voha va Vakanaani vevavii kumbwani ya nyanja Meditelenia, pevayuwini kuvya Bambu Chapanga agayumisi manji ga mfuleni Yoludani ndava ya Vaisilaeli mbaka pevamalili kuyomboka, vakayogopa na kudenyeka mtima neju kutovana na Vaisilaeli.

2 Lukumbi lwenulo Bambu Chapanga akamujovela Yoshua, "Hongola maganga ganonopu gavya ngati vipula muni uvadumulila jandu vagosi va Isilaeli." 3 Ndi Yoshua akahongola maganga genago ganonopu gakavya ngati vipula vyevitema, akavadumula jandu Vaisilaeli kwenuko ku Gibea halaloti 4 Chechamukitili Yoshua avadumula jandu Vaisilaeli ndi ichi, vagosi voha vevahumili ku Misili vala vevavili na ntanga ya kuhamba kungondo ndi voha vafwili kulukongolo pevavili mulugendu kuhuma ku Misili. 5 Vagosi vaho vevahumili ku Misili vavii vamali kudumuliwa jandu, nambu voha vevavelekiwi kulukongolo pevavili mulugendu kuhuma ku Misili, venavo vavii vakona vangadumuliwa jandu. 6 Vaisilaeli vavii mulugendu kwa miyaka alubaini mbaka vagosi voha vevavili na uhotola wa kuhamba kungondo vakafwa lukumbi pevahumayi ku Misili muni vagayidakili lepi geajovili Bambu Chapanga. Na Bambu Chapanga avalapakisi vandu venavo kuvya yati vakuuwona lepi mulima wula wabwina kwa kugaba na kwa kudimila mifuya, mulima weavalapakisi vagogo vavi kuvya yati akuvapela. 7 Venavo ndi vala vana vevavelekiwi na kukula pahala pa uveleku wavi, venavo ndi Yoshua veavadumwili jandu muni vavii vakona vangadumuliwa jandu pevavii mulugendu kulukongolo.

8 Vagosi voha pevamalili kudumuliwa jandu, kila mmonga atamili mulindanda laki mbaka pealamili. 9 Bambu Chapanga akamujovela Yoshua, "Lelu nivawusili kwinu soni yila ya ku Misili." Hinu pandu pala pikemelewa Giligali mbaka lelu.

10 Vaisilaeli pevajengili mandanda na kutama kwa lukumbi penapo pa Giligali vakitili mselebuko wa Pasaka yeniyo yavili kimihi ya ligono la kumi na mcheche ya mwehi wenuwo kumtambu wa Yeliko. 11 Ligono la pili peyamaliki Pasaka, vakalya Mabumunda gangasopwa ngemeku na mandulutulu kuhuma mu mabenu ga mlima wula. 12 Hinu kuhumila ligono lenilo pevalili chakulya cha mabenu ga mulima wenuwo Vaisilaeli vapatili lepi kangi mana. Kutumbula mwaka wenuwo Vaisilaeli vakavya vilya chakulya cha mabenu ga mulima wa Kanaani.

13 Ligono limonga Yoshua pauhegelili muji wa Yeliko, chigafula akamuwona mundu mumonga ayimili palongolo yaki kuni akamwili upanga mumawoko gaki. Yoshua akamuhambila na kumukota, "Wu, veve uvi upandi witu amala upandi wa vamakoko vitu?"

14 Mundu yula akayangula, "Pehe, nene nivi lepi kwinu amala kwa makoko vinu! Nambu nene namkekesi wa manjolinjoli ga Bambu Chapanga, ndi nibwelili hinu." Yoshua akagundama pahi cha kumfugamila na akamukota, "Bambu Chapanga wangu, ugana nihenga kyani nene mtumisi waku?"

15 Kangi mkekesi wa manjolinjoli ga manjolinjoli ga Bambu Chapanga yula akamujovela, "Hula vilatu vyaku muni pandu peuyimili ndi pandu pamusopi." Yoshua akakita ngati cheajoviwi.