1 Pandu pa mulima pevagaviwi viveleku vya Yosefu kwa njila ya kukina gudugudu, yatumbwili papipi na mfuleni Yoludani, upandi welitipamila lilanga wa chinyepa cha ku Yeliko, kupitila kulukongolo mbaka ku mulima wa hitumbi ya Beteli. 2 Kuhuma ku Beteli mubaka wayendelili mbaka ku Luzu na kuhika Ataloti kwevatamili Vaaliki. 3 Kangi ukahelelela upandi kwelitipami lilanga wa mulima wa Vayafuleti mbaka ku Beti Holoni ya mlima wa Gezeli na kumalakisila munyanja ya Meditelanea.

4 Viveleku vya Yosefu yani likabila la Manase na likabila la Efulaimu, vapewili mulima wenuwo uvya wavi.

5 Vandu va likabila la Efulaimu kulandana na lukolo zavi vapewili pandu pavi mibaka yaki yatumbwili upandi walihumila lilanga mwa muji wa Ataloti Adali mbaka ku Beti Holoni ya kunani, 6 na kuyendelela mbaka kunyanja ya Meditelanea. Kuhuma Mikimetati upandi kasikazini mubaka wang'anamwiki kuhamba upandi kwelihumila lilanga na kuhika mbaka Taanati Shihilo kupitila Yanoa kwelihumila lilanga. 7 Kangi kuhuma ku Yanoa mubaka wahelili mbaka ku Ataloti na Naala na kuhika ku Yeliko kwewamalakisili mfuleni Yoludani. 8 Kuhuma ku Tapua, mubaka wapitili kwetitipamila lilanga mbaka ku kapela kekikemiwa Kana na kumalakisila munyanja Meditelanea. Wenuwu ndi mulima wevapewili vandu va likabila la Efulaimu kulandana na lukolo zavi, 9 pamonga na miji na hijiji yevapewili kuhuma ku mulima wa likabila la Manase. 10 Vaefulaimu vavavingili lepi Vakanaani vevatamayi mu Gezeli, nambu Vakanaani venavo vayendalili kutama pagati ya vandu va Efulaimu mbaka lelu, kuni vakuvahengela mahengu cha kung'ang'aniswa.