1 Lukumbi Yoshua peavii mgogolo wa miyaka yamahele neju. Ndi Bambu Chapanga akamujovela, "Hinu veve ndi wamugogolo neju, na yisigalili ndima yivaha neju pamulima yangatolewa. 2 Pandu pepasigalili ndi mulima woha wa Vafilisti na mulima woha wa Vageshuli, 3 Kuhuma ku mfuleni Shiholi weuvii papipi na mlima wa Misili, mbaka kuhambila ku kasikazini kumbaka wa Ekiloni, mulima wenuwo wavii wa Vakanaani, kwenuko ndi kwavii na miji muhanu ya Vafilisiti, miji yeniyo ndi yavii Gaza na Ashidodi na Ashikeloni na Gati na Ekiloni pamonga na pandu pa Avi, 4 upandi wa kusini, mulima woha wa Vakanaani na Ala ya Vasidoni mbaka ku Afeka weuvii ku mumbaka wa Vaamoli, 5 na ndima ya Vagebali na Lebanoni yoha kuhambila upandi welihumila lilanga kuhuma Baali Gadi mbaka pahi ya hitumbi Helimoni mbaka Lebo Hamati. 6 Pandu poha pevitama vandu va mulima wa hitumbi kutumbula Lebanoni mbaka ku Misilefoti Maimu ndi yaani mulima woha wa Vasidoni. Nene namwene yati nikuvavinga venavo palongolo yinu. Na veve yati ukuvagavila va Isilaeli pandu ngati chenakulagisi. 7 Uvagavila mulima wenuwu vandu va makabila tisa na yapinga ya likabila la Manase vevavii vangagotolewa pandu pavi."

8 Makabila ga Leubeni na Gadi, na yapinga yingi ya likabila la Manase vapewili mulima wa upandi kwelihumila lilanga mwa mfuleni Yoludani, ngati Bambu Chapanga cheamulagisi Musa mtumisi waki. 9 Pandu pavi ndi pavii kutumbula Aloeli mumihana ya likemba Alinoni na muji wula weuvii pagati ya likemba, na mulima wula weuvi pamtambu kutumbula Medeba mbaka ku Diboni, 10 pamonga na miji yoha ya Sihoni nkosi wa Vaamoli, mweatalalili ku Heshiboni mbaka mumibaka ya Vaamoni. 11 Pamonga na mulima wa Gileadi na pandu pa Vageshuli na Vamaaka, na chitumbi choha cha Helimoni na mulima woha wa Bashani mbaka ku Saleka, 12 na unkosi woha wa Ogu mmonga wa Valefai mweasigalili, yula mweatalalili uko ku Ashitaloti na Edilei ku Bashani. Musa avatovili venavo voha na kutola mulima wavi. 13 Nambu Vaisilaeli vavavingili lepi Vageshuli na Vamaaka, ndava yeniyo viyendelela kutama pamonga navu mbaka lelu.

14 Nambu Musa avapelili lepi vandu va likabila la Lawi ndima yoyoha, ndava teta za kutiniswa zeziwusiwa kwa Bambu Chapanga, Chapanga wa Isilaeli, ndi zevagaviwi zivya uhali wavi, ngati Bambu Chapanga cheamlagizi Musa.

15 Musa avapelili ndima vandu va likabila la Lubeni lukolo kwa lukolo kuvya yavi. 16 Mbaka wavi, wavi kuhuma muji wa Aloeli mumuhana wa likemba Alinoni, na mulima weuvii pagati mulikemba pamonga na mulima woha wa mtambu wa Medeba, 17 mbaka Heshiboni na miji yaki yoha yeyivii mumitambu, ndi kujova Diboni na Bamoti Baali na Beti Baali Meoni, 18 pamonga na Yahasa na Kedemoti na Mefaati, 19 na Kiliataimu na Sibima na Seleti Shahali ku chitumbi chechivii kulikemba, 20 na Beti Peoli na mumihelelu ya chitumbi Pisiga na Beti Yeshimoti. 21 Na miji yoha ya mumitambu na mulima woha wa nkosi Sihoni wa Vaamoli mweatalalili ku Heshiboni, Musa amutovili mwenuyo Sihoni pamonga na vilongosi va Vamidiani, na venavo ndi Evi na Lekemu na Suli na Huli na Leba vevatalalili mulima pahala pa nkosi Sihoni. 22 Pagati ya vala vevakomiwi kungondo, mewawa Vaisilaeli vamkomili na Balaamu mwana wa Beoli mweavi mlondola. 23 Mbaka wa mulima wevapewili likabila la Leubeni upandi welitipama lilanga wavi mfuleni Yoludani. Miji yeniyi ndi yeyavii uhali wa vandu va likabila la Lubeni lukolo kwa lukolo.

24 Penapa ndi pandu pa ndima Musa peavapelili vandu va likabila la Gadi lukolo kwa lukolo; 25 mulima wa Yazeli na miji yoha ya Gileadi na yapinga ya mulima wa Vaamoni mbaka Aloeli yeyivi upandi wa kwelihumila lilanga wa Laba. 26 Mulima wavi wadandasiki kuhuma ku Heshiboni mbaka ku Lamati Mizipe na Betonimu, na kuhuma ku Mahanaimu mbaka ku Debili. 27 Mulikemba la mfuleni Yoludani kwavii na miji ya Beti Halamu na Beti Nimula na Sukoti na Zafoni na mulima woha weatalalila Sihoni nkosi wa ku Heshiboni. Pandu penapo pavii upandi welihumila lilanga mwa mfuleni Yoludani kulolesana na upandi wa kusini wa liliva Galilaya. 28 Miji yeniyi pamonga na vijiji vyaki ndi vapewili vandu va likabila la Gadi kulandana na lukolo zavi.

29 Penapa ndi pandu pala Musa avapelili vandu va yapinga ya likabila Manase kulandana na lukolo zavi. 30 Mulima wewadandasiki kutumbula ku Mahanaimu pamonga na Bashani yoha na pandu poha yeatalalili nkosi Ogu wa ku Bashani, pamonga na miji yoha sitini ya Yaili yeyavi ku Bashani. 31 Yapinga ya Gileadi pamonga na Ashitaloti na Edilei, miji yeniyo ndi yeyatalaliwi na Ogu nkosi wa Bashani pandu penapo vapewili yapinga ya chiveleku cha Makili mwana wa Manase, kulandana na lukolo zavi.

32 Musa avagavanisili pandu pa ndima kuupandi welihumila lilanga wa Yeliko na mfuleni Yoludani lukumbi peavii kumtambu wa Moabu. 33 Nambu Musa avapelili lepi pandu pamulima kuvya yavi vandu va likabila la Lawi, ndava avajovili kuvya lilundu lavi yati livya pagati ya teta zeiwusiwa Bambu Chapanga, Chapanga wa Isilaeli.