1 Hinu zenizi ndi ndima ndalindal zevapewili Vaisilaeli kuvya zavi ku mulima wa Kanaani. Mteta Eleazali na Yoshua mwana wa Nuni pamonga na vachilongosi va makabila ga Vaisilaeli vavagavili Vaisilaeli. 2 Pandu pavi penapo vapewili kwa njila ya kukina gudugudu ngati chila Bambu Chapanga cheamlagizi Musa, avapela upandi kwelitipama lilanga mwa mfuleni Yoludani gala makabila tisa na yapinga. 3 Musa avapelili pandu makabila gavili na yapinga upandi welihumila lilanga mwa Yoludani, nambu Valawi vapewili lepi pandu popoha muni pavya pavi pagati yavi. 4 Vana vagosi va Yosefu vgavaniki mumakabila gavili, ndi Manase na Efulaimu. Likabila la Lawi lapewili lepi pandu pa mulima muni uvya wavi, nambu vapewili miji ndu ndava ya kutama na mupandu mwa kulihila mifuya yavi. 5 Hinu Vaisilaeli vakagavana mulima wula ngati Bambu Chapanga cheamulagisi Musa.

6 Ligono limonga vandu va likabila la Yuda vakamuhambila Yoshua ku Giligali, na mwene Kalebu mwana wa Yefune mweavii wa lukolo lwa Kenizi, akamujovela Yoshua, "Ndi chakaka ukumbuka Bambu Chapanga cheamujovili Musa, mundu wa Chapanga, kuvala veve na nene petavili kula ku Kadeshi Balinea. 7 Penavii na ntanga ya miyaka alubaini, lukumbi Musa mtumisi wa Bambu Chapanga peanitumili kuhuma ku Kadeshi Balinea kuhamba kuung'omesa mulima wenuwo. Na nene penakiliwiki nikamluwulila mambu ga kwenuko ngati chila mtima wangu chewasadiki. 8 Nambu vandu vevahambili pamonga na nene ndi vakavadenya vandu mitima, nambu nene namulandili Bambu Chapanga wangu kwa mtima woha. 9 Ligono lilolo Musa anilapakisi na kunijovela, ‘Chakaka mulima wula wewapitili yati uvya waku veve na viveleku vyaku magono goha gangali mwisu, muni wamulandili kwa mtima woha Bambu Chapanga, Chapanga waku.’ 10 Hinu ngati Bambu Chapanga cheaniahidi, anivikili mumi kwa miyaka alubaini na muhanu tangiya lukumbi lula pealongili genaga na Musa, lukumbi Vaisilaeli pevapitayi kulugangatu. Mbaka hinu nina miyaka semanini na muhanu. 11 Nambu nakona ninamakakala ngati lukumbi lula Musa peanitumili. Hati hinu ninamakakala ga kutovana ngondo na kuhenga lihengu loloha lila ngati kadeni. 12 Hinu unipela mulima uwu wa vitumbi ngati Bambu Chapanga cheaniahidili ligono lila. Veve wamwene wayuwini kuvya Vaanaki vavii kwenuko na miji yavi hivaha na yeyitindisiwi luwumba luvaha, nambu Bambu Chapanga yati akunitangatila nene yati nikuvavinga vahuma kwenuko ngati chila cheajovili."

13 Hinu Yoshua akamumotisa Kalebu mwana wa Yefune na kumpela muji wa Hebuloni muni uvya waki. 14 Hinu muji wa Hebuloni wavili wa viveleku vya Kalebu mwana wa Yefune wa lukolo lwa Kenizi tangiya lukumbi lwenulo, muni Kalebu avii msadikika kwa mtima waki woha kwa Bambu Chapanga, Chapanga wa Vaisilaeli. 15 Pakutumbula apo muji wa Hebuloni wakemiwi Kiliati Alaba. Alaba avii mundu mkekesi mweimanyikana neju pagati ya Vaanaki voha.

Mulima woha ukavya yegwa changali ngondo.