1 Lukumbi lutali pelwapitili, Bambu Chapanga avapelili uteke Vaisilaeli kuhuma kwa vamakoko vevavatindili pandi zoha. Lukumbi lwenulo Yoshua avii mgogolo neju. 2 Yoshua akavakemela Vaisilaeli voha pamonga na vilongosi na vagogo vavi, vahamula na vatangatila, ndi akavajovela, "Nene ndi namugogolo wa miyaka yamahele. 3 Nyenye mlolili mambu goha geahengili Bambu Chapanga winu kwa vandu ava voha ndava yinu. Bambu Chapanga winu ndi mweavakomanili nyenye. 4 Nivapelili ndima ya milima yeyivi yakona tangayitola, pamonga na ndima ya milima yetimalili kuitola, kuhumila mfuleni Yoludani upandi walihumila lilanga mbaka ku nyanja ya Meditelanea kuupandi welitipamila lilanga. 5 Bambu Chapanga mwene ndi mweakuvawusa venavo palongolo yinu, yati akuvavinga palongolo yinu, na mulima wavi yati uvya winu ngati Bambu Chapanga winu cheavahaidili. 6 Muvya ngangali na mugayidakila goha gegayandikwi muchitabu cha Musa, changali kuleka chindu chochoha mwenumo. 7 Mukoto kuwungana na vandu va milima yeyisigalili pagati yinu. Mukotoka kuyiluwula michapanga yavi mewa mukoto kuyupa kwa kuluwula mahina ga michapanga yavi, mukotoka kuhihengela amala kuyifugamila. 8 Nambu muwungana na Bambu Chapanga, Chapanga winu ngati chemwakitili mbaka lelu. 9 Muni Bambu Chapanga avavingili palongolo yinu vandu va makabila gavaha na gegana makakala, na kawaka hati mumonga mweahotwili kuvahotola nyenye hati lelu. 10 Mundu mmonga ndu pagati yinu ihotola kuvavingisana vamakoko elufu yimoga, muni Bambu Chapanga winu ndi mweakuvakomanela, ngati cheahadili. 11 Hinu mujiyangalila neju na mumgana Bambu Chapanga, Chapanga winu. 12 Nambu ngati yati muleka kulanda malagizu ga Bambu Chapanga na kuwungana na vandu vevasigalili pagati yinu, mukagega kwavi na vene vakagega kwinu, 13 chakaka mumanya kuvya Bambu Chapanga, Chapanga winu yati iyendelela lepi kuvavinga vandu va milima yeniyi, nambu vandu venavo yati vivya yomeso na lingongeka kwinu. Yati vivya mchapilu wa kuvatova nyenye na mbigili ya kuvahoma mumihu mbaka pemuvya mumali kukomakeswa na kuwuka pamulima uwu wabwina wemupewi na Bambu Chapanga, Chapanga winu."

14 "Hinu lukumbi lwangu lwa kuhova luhegalili ngati cheyivii kwa vandu voha. Nambu nyenye mwavoha mumanyili hotohoto mumitima na mumipungu hinu kuvya mumambu goha gabwina geavaahidi Bambu Chapanga, Chapanga winu livii lepi hati limonga leangalitimilisa. Goha atimilisi ngati cheahadili. 15 Ngati chila kila chindu chabwina cheahaidi Bambu Chapanga, chitimili, mewa ndi kila chihakahu cheajovili yati chitimila, mbaka peimala kuvawusa pamulima uwu wabwina weavapelili. 16 Ngati mukadenyayi lilaganu laki Bambu Chapanga, Chapanga winu, lila leavalagizi mulikamulayi, mukahamba kuyihengela michapanga hingi na kuifugamila, hinu ligoga la Bambu Chapanga winu yati livya kwinu, na nyenye yati mwikomakeswa njwee mala yimonga pamulima uwu wabwina wemupewili."