1 Ge Job keligai,

2 "Nnui minadung kesang da;

maci nnuide ngngwa tsai dizie.

3 Dede maci nnui da kebam kieege ada de bam;

Ih nnui swa sia ma.

Kesang, aidungde cikemak cauge bam no?

4 Ih au a kidame ziemne nui keneu ge dida,

Ih, Tinggwang de qu kegaibe nah pa a sam keli beu!

Ih, masang nah kemau kegah pei ge, Cu au Ih nui keneu ge dida.

5 Keherei mene kebamme ge, keherei kelame de teu henui teila;

pa macet kecu ria gade kaumie dilai eh kebamme de peu keherei ngausi dai lula.

6 Dede sütketyeimedung ziune lungh lula,

nah Tinggwang rata tei kelame kwak eh bam lula;

penui katei penui badung au penui rabedung.

7 Dede cu renaam kaunedung de keteu lu, nah penui ncu ledeu beuzie;

tinggimdung ga nruinedung de keteu lu, nah penui ncu ranglia beuzie.

8 Mede kideu de mpau lulo, nah ncu ledeu beu zie;

jaaidi ga heka ncu ranglia mci beu zie.

9 RAMPAUBE ba ne aidungde teigai lie kecu

makaune aidung kakgade cau ci meno? ✝

10 Ringkela leune teilung

nah mina pelane cuingi pe ba ga bam.

11 Mi mleu taktyei nggum ci kela nzwa

mikwen de samdung siu la meni?

12 Kemteu de kecingme da bamla;

teilung ketie ga maci bam.

13 Tinggwang da maci nah kengkieng bam;

pe da keledeusam nah kecikecet bam.

14 Pielo, pa teipang dila, nah cide au teidai gailak;

pa migede baang di liecai, cika au lung mpet dai kera gah.✝

15 Pielo, pa tingrui kam dilie cai, hangdeu cangh dizie;

nah pa tingrui langgai lie cai, hangdeu pui nlim luzie.

16 Pe da kengkieng nah maci bam;

mina ne cwa kedime nah cwa kelame hangnana de pe kengkieng ga bam.

17 Pa kedime de lungrei pui eh langgi dila;

pa tutiakmedung de kemiemedung tei dila.

18 Pa hegwangmedung dade kengkieng keu gidi la;

pa penuide hebaangme ge tei dila.

19 Pa cingkumedung de lungrei pui eh lang gidi la

nah mina kengkiengme de tei ngkau dila.

20 Pa mina nlum kelame sam keu gidi

nah kecingmedung maci keugi dila.

21 Pa hegwangnadung de kemta tei dila

nah mina kengkiengme kiakang hiak dila.

22 Pa kemui kecok ga kebamdung de keulia la

nah kecok ga kebam tingkaumiedung de kebaa gage teugwang beula.

23 Pa heleuhdung tei ngkieng beu, nah pa penuide ngkap de dila;

Pa heleuhdung tei mdi beula, nah pa penuide peu hebaangmedung de tei dila.

24 Pa kideu ga muiteumedung dade maci keuteu gidi;

pa penuide lampuiki kegah renaamkang ga peu hui la dila.

25 Penui kebaa gah eh kemui ga kemiet la;

pa penuide sak kemieme nzwa peu tet tanglia dila.