1 Ge Temanmepei Eliphaz sam keligai,

2 Magade mige ncu ngngwa resiu kera teicai, nang n rata di zieni?

Dede caune sam kerang pekatei pecu kam lubui no?

3 Pielo, nang mina kekiee ge de ledeu beu da;

nang kemnei badung tei ngkieng beu da.

4 Kaumie di zeu kecume de n sam le ngha beu da;

nang kemneime de tei ngking beu da.

5 Dede cu keherei n da gwangla dida, nah nang leu dida;

cide ncu tunggai, eh nang keherei dida.

6 Nang Tinggwang miekehing de ga n kekuu la meni,

nah n lampuidung masang kecu n keregui gah dini?

7 Aide cet gailo, kehereide: makesangme cauge kekap dau no?

Mede daidau mina petauketeime de gidi lano?

8 Ih ngau kegai rehi gade au, kesiabe puh kegaime

nah keherei ling kegai cide rum zie.

9 Tinggwang ngngi kegai gade penui kap eh gah dila;

pe rata rahang ge nzwa eh penui de tei nggah dila.

10 Hingho mra kebam, hingho mrung kwa de,

kehena hinghodung gei, cidungde cum dida.

11 Hingho cing kedibe ma tuityei kera gah eh kap gah dila;

penui namedung pelane ga zangra dila.

12 Cu mage ngkiem eh a da teugwang gai,

nah cipau ha de a kwen gage cüt gai.

13 Ge tingmui mangngaudung gade kecetdung gwang,

minadung zip zing mie kedi dau.

14 Tingmui dau kengngi nah kembeu cide a reu ga gwang,

nah a radung pelane mbeu di.

15 Iciu eh rabe ge a dwa gade tet kahdi,

nah a pumteih mai cuhdi.

16 Rabe de sap jüja bam, dede Ih pe rehi ci ntsam siakte gai lak di.

A miak dwa ga marehi ge au bam;

cika zingde kecu bam, nah Ih marang kecu kwa ge siu,

17 "Tsaidi kela minabe Tinggwang swade masang ki ni?

Mige pecu tei kegaibe swade mci ki ni?

18 Pielo, Tinggwang pe kilame de nlumlu mecai;

magade pe tinggimgwame de me lie eh mmau la cai,

19 daikenzwa kiee ge de aide kesang no lidei kidung ga lungh kebamme ziemne au,

pe bangdwa rebui ga kebamme de,

taklei swade penuide tei kecai mzetdi kelame de?

20 Tingcang penai tinghegi kakgade penuide tei ngkap dila;

penui de migede ngau siakte mene kelungta penuide ngkap dila.

21 Penui paiki riadung penui kakgade ram gi dila meni?

Penui tsai dila; penui da maci gah eh tsai dila.