1 Nang kagwak le Leviathan de teumpet lu bui ni?

Mede heria ge le pe geijara kanglu bui ni?

2 Nang pe ngkie gage heria ge kailu bui ni,

mede kagwak le pe geija kai lubui ni?

3 Pa n dage pe nggia kekie rang zie ni?

Pa n dade samkenciep rang zie ni?

4 Pa ncu ngngwa samkak tei zie ni,

nang pecu teu n kila ge tei lamui kera?

5 Nang nruinne ge de nzwa pecu ngngwa zie ni?

N kilapuidung ziemne nang pecu kanglu zie ni?

6 Heka ketuime maadung pe ziemne helilia zie ni?

Heliketeime helitei kera pecu rak mzi zie ni?

7 Nang pe geu hengei le kuipui lubui ni

mede heka ketuitiedung teu pe peu kuipui lubui ni?

8 Pe reu gage piage n ba kaipie lo,

iciude nang reutak de ci luzie nah cide teisi lak.

9 Pielo, cide tei kelame keregui au kenret ge lie;

Pecu ngau kegaile de keheibe de de hangdeu gage keliengai di lak ni?

10 Pa Leviathan de kera neu kegai swa magede hing kecu galie,

cau ciucai, a dwaga sap lubui no?

11 Ih pecu peu dai kera cau ge acu peu raipwa bam no?

Tingkam kangga kela pelane leune agu lie.✝

12 Ih Leviathan pi ha mlei mene bamlak,

mede pe kengkieng ha, mede pe zuyi de.✝

13 Caune pe pum cum de rampet lu lai no?

Caune pe reunetdung kuitiet lu lai no?

14 Caune pe zu kikamdung let lu lai no,

pe geidung riapung bam, cidung au ngauhing kecuge?

15 Pe gim au pelip riadung le teipwa bam,

kaugiak ge nzwa kang kecüt lu eh.

16 Ket au kedage taiga mna bam

iciu eh pekak ga tingkai lüt gailak lu kera.

17 Cidung de ket ket de keu ncüt pwa bam;

cidung riangkeu bam, iciu eh cidung de riaumpet lu kelak ne.

18 Pa ngiditeu kegai gade kebaa baapet la;

pe miak au tingcang nuge miakkum nzwa lie.

19 Pe mui gade miheu petla,

mitsi heu pet la,

20 Pe ngkieki gade mika petla,

duili kang mi ga hekuu heu kebam mika nzwa.

21 Pe cuingi ne regeu teiheu dila;

pe mui gade mi petla.

22 Pe ngwang ga kengkieng bam,

nah pe dwaga ngaukehing helim lim bam.

23 Pe ci lipdung au kedip kecüt pwa bam;

cidung au pe da ntip süt bam; cidungde deukelai gailak.

24 Pe mlung au tangtsu ge nzwa tak,

kesang, kegimtsu nkangbe de nzwa tak.

25 Pa cuh kegai dau, herabedung de ngngi dila;

kengngi ziemne, penui caisim dila.

26 Kingtie ge pecu bi cai, cide magede teilu lama,

nah hengei ge liede, lakpitsi ge, mede pemui kenzau keheibe de.✝

27 Pa au hegeu de reigau nzwa lie cet la,

nah hetageu au tsingrim nzwa lie eh.

28 Lakpitsi ge pecu peu pak gailak;

pe ziemne tamnung tsukang au ciurie nzwa.

29 Tsingrang au reigau nzwa;

pa hengei hia kegaide nuineu dila.

30 Pe pum ngkangle au li pang kedi kenzaube nzwa;

pa tsingdaptie nzwa nyasai ga pecai niazangra eh kebam tei dila.

31 Pa duikecok teipwa tarum eh li ge ga dui kenswak nzwa dila;

pa jaaidi teipwa maca li ge nzwa dila.

32 Pa pecai ga kebaa ge teigai la;

duikecok de peu pu lie cetlu kebui ge dila.✝

33 Kideu ga pecu kedalu kera bam ma,

peu ngngi mene lunghlu kera teibeu.

34 Pa ngang kela leune ngaula;

pa au ngang kelame pelane gwangpei."