1 Ge Job keligai,

2 "Henai kecang de Ih ncamsüt bam reu;

Tinggwang ba au a rei mra swade rüt bam dida.

3 Oh, Ih pecu dai gade ngau lubui bi Ih cibam!

Oh, ciciu eh Ih Tinggwang kebam ni ga gwanglu kerane!

4 Ih a ha pe dwa gage pwalia

delwe pecu rang renia kieesüt zie.

5 Pa a sam keli kegai gade Ih samkiedung ci luzie

nah pa a da rang kegaidung ci luzie.

6 Pe kengking kedi gade pa acu rang renia zieni?

Melie, pa a sam kingnei zie lie.

7 Makesangme ge au pecu rang renia zie.

Ainzwa eh a tuketiakbe acu lungmpet ncigi beu zie.

8 Pielo, Ih kepetle bie mie, dede pa cika bam ma,

nah kelütle bie mie, dede Ih pecu ngau luma.

9 Tingtünle, pa mata tei kebam ga hang, dede Ih pecu ngau luma,

nah tingbangle hung, acu peu pecu ngau kelakne pa mbai di.

10 Dede Ih tet kela lampui de pa cibam;

pa acu kedak pie kecudau, Ih au kecak nzwa mpet luzie.✝

11 A pipa de pe pipa ga pwa ntipsütla;

Ih pe lampui de pwala nah cikade nreu dima.

12 Pane aja kai kedi gade Ih nreu caili dima;

Ih a taktyei be swade pemui gade kerang samdung be kebai hemi ki pwa bam.

13 Dede pa kenzwa ge de gah, caune pecu teu caili lulai?

Pa tei keneu be, pa teila.

14 Kedanemene pa acu mmau eh pegu aja de teigai da;

ci kenzwa kekiee ge bam.

15 Cine, pa kebam ga Ih au ngngi di;

Ih pecu nning kegai dau, Ih pecu hing di.

16 Kedanemene Tinggwang au a mlung tei nnei kedine;

Ngkiengtube Tinggwang ne acu tei ngngi kedine.

17 Kemuine acu peu penli tei dima,

kedanemene a suisia zu di eh kemui kedi de ne gum pungbam reulu.