1 Pecai Job RAMPAUBE sam keli eh cu,

2 "Nang maleune teilu kebui Ih ci,

nang riem kegaide kamgai kelak.*

3 ‘Cau no aide kecikecet bam mene mariem gai kela?’

Kesang, Ih ci kemakbe de rang dida,

a ziemne cipa ham kecube, Ih ci kemakbe.

4 Nang a dage rang, ‘Kingnei lu, cu, Ih marang zie;

Ih nnuide ma keteu zie, nah nnui a dage rang beuzie.’

5 Ih a kwen le n kwa siu luda;

dede cu au a miak le ncu ngaubam dida.

6 Cine Ih acu mlai dida;

Ih rebui nah mimüt gade a lung nreulu."

7 Pa Job dage Temanme pei Eliphaz dage rangdi, "A rata au ncu nah nzangbe kena da heu bam dida, nnui au a ha petaube rang kemakne, a kilabe Job tei kegai nzwa eh. 8 Cu, cine, nnui ziemne hetumseu hena, meurünseu hena, delwe a kilabe Job da keru reca ge teigai lu. A kilabe Job nnui ziemne kekie tei zie, nang Ih pe kekie kingnei luzie, iciu eh Ih nnuide nnui kemie nzwa hengam teidi melu kerane. Nnui au a ha petaube rang ma, a kilabe Job kerang nzwa eh." 9 Cine Temanme pei Eliphaz, Shuahme Bildad, nah Naamahme Zophar pecu mie delwe RAMPAUBE penuide rang kebeu nzwa teilu, nah RAMPAUBE Job kekie de luu lu.

10 Job pe zangmedung kekiee teigai, RAMPAUBE madung teu cuh dai beu. RAMPAUBE pecu ndaa mabam kena kiee ge peu. 11 Pecai Job siname pelane, nah pe timedung, nah ndaa pecu kecime pelane pe da gwanglu delwe pe ki ga pecu ngngwa matyei lu. Penui pecu kenggia liagai nah Tinggwang ne pe reu gage keherei teugwang kegai leune ziemne pelung teinciep gai, nah penui pelane hangge ge kecu Job de rangkanggeu ket nah kecak ring ket ramcau peugai. 12 RAMPAUBE au Job teilung kerai dau swade kekamle samlam peu kiee gai, pa meurün cang kereiemdai, ut cang herok, hetumseu cang ge, nah gadapuidung cang ge bam. 13 Pa pe napei hena nah pe napui hangcum bam. 14 Pa pe napui cingtube pui zi Jemimah, kenabe Keziah, nah kecumbe Keren-Happuch de qulu. 15 Kideu pelane gade Job napuidung kenzwa hezukeyi ngau ma. Penui pei penui heime de si eh magum peugai. 16 Aide cai, Job mmi 140 lunghlu; pa pe napeidung nah tsamedung ceheu mdai kecang ngaulu. 17 Pecai Job cing di nah tingbazie kepui tei eh.