1 Cu qu gailo; cika migede nsam keli beu kera bamni?

Kemcime cauge da nang nreugwang zie no?

2 Kedanemene rata kemieme de teitset dila;

riaksiet mriak kemakme de teitset dila.

3 Kemieme ge kwak kebam nzwa Ih ngau da,

dede Ih pe ki reset zette dida.

4 Pe namedung kwaklu kera gade mdei süt la dida;

penuide namdi kirie gade tei kecai dida.

Cika migede penuide kelilu kera gah.

5 Mina kemzeume ne penui meidung tyei lula;

hetudung kakga mei kebambe kecang de.

Penui maheidung ziemne hereu kemzeu tei.

6 Kedanemene keherei kecudung au tangdei gade mpet lama;

mede hangdeu gade kehebwak pet lama.

7 Meliene, minadung au keherei kerane lungh gwang,

mitsi limcuh kela nzwa.

8 Dede a ziemne au, Ih Tinggwang rünne dage nreu gai zie;

Ih a reidung pecu nlum pwapeu dizie,

9 pa makedi nah ma peicanggai kelakdung teigai,

miswagah süt kecu pei kapgai kelakdung.

10 Pa kideu gage tingrui peula,

nah luhdung gage dui kai beula.

11 Pa aide tei kegai mina kehenahme de kecehu gage kai;

nah hei eh hap kelame de peu kwaklu kerane,

12 Pa mina heciem kesia riem keludung teipang dila,

iciu eh penui batadung gade kemnung ngau melu kerane.

13 Tinggwang mina makecime de penuikatei penui ciem kesia bata gage tuigai dila;

mina nlüt mpet kela mariemdung au cang mzet dila.

14 Penui tingkebaa ting ga kemui daula,

nah tingna de cide tingmui nzwa kemietla.

15 Dede pa au makegahme de ketsai gade keli lula

nah kemneime de mina kengkiengme ba gade kelibeu la.

16 Cine makegahme ge keregui bam,

nah masang kemakme pemui ngkui di maisia.

17 Pielo, Ngkiengtube Tinggwang ne ledeu beu kelabe de au samlam pungtu;

ciziemne, ncu kesui kegai dau mlai diso.

18 Kedanemene pa tei rezam gai nah kangdai dila;

pa tei rezam gai nah pe ba le teingkei beula.

19 Pa au keherei kecu pia herok gade ncu kelibeu zie;

kesang, keherei pia hena gade de, makesia ncu tung lak.

20 Herakum kegwang dau pa ncu ketsai gade keli luzie,

nah reutak dau ketsai gade ncu gum luzie.

21 Kenret kendam gade ncu kebai beu zie;

nah kengkap cide kegwang dau de nang ngngi dilak.

22 Nang herakum nah kengkap de nuineu dizie,

nah nang kideu ga teikuudung de hinglak.

23 Kedanemene n luh ga tangtsudung de ngngwa nang samkak tei luzie,

nah n luh ga teikuudung de ngngwa kezuyi bam dizie.

24 Nang n paiki kwak bam lie kecu ci zie;

nang n meurün hau de pie gwang nah nang magede gah dilak.

25 N leuhme dilu kerade nang ci luzie,

n leuhmedung au hangdeu ga ceheidung nzwa dizie.

26 Nang cing cangsiak dide n rau ga gwang dizie,

peting cide gwang ge meibui kidung meulu kela nzwa.

27 Pielo, ma aidungde anui peei eh pie da; cide ainzwa;

cide kingneilu, nah cide n katei cilu."