1 Pecai Job pesam keli eh ranggai,

2 "A samdung kingnei sünne gailo,

nah aide le nnui acu kepeu ziune kecu ge lulo.

3 Ada ge ranggai lo, nah Ih de marang zie;

Ih rang kelu cai, reli pielo.

4 Ih de kecu, a ncam mige dage ni?

Daitei Ih alungdui melai?

5 Acu piegai eh nnui swa galu,

nah nnui mui gage nnui ba le keba lu.

6 Ih a reidung de mning gaige, acu keheu di,

nah kembeu ne a pum mlai gailak di.

7 Daitei eh peu kemaume de lungh,

hecing cu, nah kengkieng* teula no?✝

8 Penui miakngau gade penui leuhme penuide ngngwa lungh yi kebam

nah penui miakngau gade penui tsaname lungh yi kebam.

9 Penui kidung au kehing gade kwak bamla;

mede Tinggwang rata tuitie penui deu ga bam lama.

10 Penui tumseu leuhdung lungh lula; cide gahdi lama;

penui tumdung ngkak beula nah taidi lama.✝

11 Meurünna hau nzwa lang mpet beula,

nah penui name helimlim la.

12 Penui tambourine nah leibung kwa eh lei tei

nah terwaine kwa eh penui suiyi bamla.

13 Penui lunghyi eh penui tingbadung ngngwang la

nah penui zingde ketsaime deu ga hung dila.

14 Penui Tinggwang dage rang, ‘Anui de pütdi lulo

kedanemene anui maci lampuidung anui sui lama.

15 Dai de Ngkiengtube Tinggwang no, anui pecu reca kera?

Anui pe dade kie cai dai kemmi ge ngaulu bui no?’

16 Pielo, penui lungyi kebam de penui ba ga bamni?

Ih mina kesiame ne rang kebeu de teu magede ketei ga.

17 Pia daikie ge de mina kesiame mitau teimmüt,

mede penui da kengkap penui reu ga gwang lai?

Pia daikie ge de Tinggwang pe rata penui reu gage lungrei mzigai zieno?

18 Pia daikie ge penui tingkai ga herarie ge nzwa zie no

mede tingkai rahang ne reigau gui pwa tetdi kela nzwa lai?

19 Nang rang la, ‘Tinggwang pemau ziemne pena reu ga gwangla.’

Pekatei rui lulo, ciude pa pekatei pecu pemau ci lu bui lu.

20 Peu pe miak gade pekatei pecu kekap ngau zie

nah pecu Ngkiengtube Tinggwang lunghop sak zie.✝

21 Pe teilung cang kedi dau

pa pe kilungme ziemne helung pang lani?

22 Mige Tinggwang,

heni kecehudung ga kebamme tutiak kelabe de maci ledeu lubuini?

23 Mige au keyi kengkieng lung relui cui nah sünne kebam ting dau tsai dila.

24 Pe pum au maca ne puipung

nah pera au peking dui ne teihwa eh bam lie.

25 Kedame au suiyi gede ga zing,

penui penui lungh keherei süt eh lungh nah tsai dila.

26 Penui pelane nzwa ciak eh tsai nah kung dila,

penui pelane de tangseudung ne tyei dila.

27 Ainie, nnui lungningdung

nah nnui aha petau kemakpe riem kecu cibam.

28 Kedanemene nnui keteu, ‘Cu daiga hegwangpeina ki bam no?

Mina kesiabe lungh kela paiki de daiga bam no?’

29 Nnui mbeuh kelame de keteu melui ni?

Penui sam teu caili kegwang de nnui ci meni,

30 kengkap tingba benai kemaume de kaipwa bam lie kecu,

nah lunghop tingba benai pecu mbai beulie kecu?✝

31 Caune kemaube de muicui eh pecu mmau gailai?

Caune pane tei kegaidung leune rüi beulai?

32 Iciu lie de pecu herau gage pwa miedi zie,

nah minadung herau ga kwabam dizie.

33 Kideu lamkie ga hangdeudung de pe dade kum,

nah mina kekieege* pecai sui dizie,

pedwa ga mina peikap gai kelak kebam nzwa.

34 Daitei eh pekiekegah samle nnui a lung teinciep lano,

kedanemene nnui samlidung ga au magede gah kenretbe gwale?"