1 Ge Job sam keli eh rangdi,

2 "Oh, a keteei reidung de mdetlu liecai;

a kekap pelane riangteukwak gage kaigai liecai!

3 Cu ziemne au cidungde jaaidi ga heciangdung swade rüt gwa dizie.

Cide ziemne a samdung au kemta samdung.

4 Kedanemene Ngkiengtube Tinggwang lakpitsidung ada bam dida,

a rabe heiring sak luda;

Tinggwang gu ngaukehingdung keswa pwa ket cai ket eh acu renia dida.

5 Renaam gada ge peda cehei bam liede keregui gah eh mra bam zieni?

Mede ketumseu ge pe tak cide tyei kebam dau mzeu mtei di lani?

6 Pe nggum kegahbe cauge mcai kaisi mene tyeilu buino?

Mede nruibum keha cide pe nggum kesadung ge bam ni?

7 Ih cidungde tung kera mlai di;

cidungde a ziemne kemneu taktyei kenzwa ge.

8 Oh, Ih kekie de ngaulu liecai;

oh, Tinggwang Ih ma luuneu keladung teipwa acu peu liecai:

9 Tinggwang cide pe lungning eh acu piage tei kecai di lubui lie,

iciu eh pa pe ba ketwa gai eh aipau teilung gade acu teitset dilie cai!

10 Aide le peu a lung nciep bamlu,

Ih keteei gade a lung ngkieng lu liede cide tei ncam di gailak:

Kemci Tinggwang samdung de Ih mlaidi gailak.

11 A kengkieng daikenzwa ge eh, cide mteilwe kwabam laino?

Daipai agu kekambe ge bam eh, Ih a teilung tei mtie laino?

12 A kengkieng tangtsudung kengkieng ni?

Mede a pumteih hetageu le teini?

13 Ih akatei acu ngha gai kelak au kesang de meni,

nah maci de a dade keu tetdi kecude?

14 Mige pa sia eh keherei kebam dau, pe zangme kesamsang keulia maisia;

Ngkiengtube Tinggwang de hing mene bam kedibe de de.

15 Dede a sinamedung au hetaideu ga reuceuna lwa kebam nzwa a dade masang ma,

helaudung kemta gage lwa gai di kela nzwa,

16 Cidungde muiting bamla kedanemene buising penui reuga kebamne,

nah kedanemene buising le penui katei de hebai pwabam.

17 Penui lwapet kegaidau, penui gah dila;

cide lum kegaidau, penui bam gade lwa pak dila.

18 Mbeuhkela maadung lampui ga tet kegwang dau dui sak kera peeila;

penui hetaideu ga hui mie eh gah dila.

19 Tema namdi gade mbeuh gwangkela maadung dui cika peila,

Sheba maamedung keregui penui da la.*

20 Penui sui tadi kedanemene penui dui ngau bi luzie de cet kelane.

Penui cika mie, dede penuide cwadi.

21 Cu au nnui a zangmedung a dade magede ta dida;

nnui Ih rei kebam zai de ngau eh ngngi bam dida.

22 Ih nnui dage, ‘Madungge acu peulo’

mede, ‘Nnui mahei gade acu mapeu halo de kie ni’?

23 mede, ‘A ngauraume ba gade acu keli beulo’

mede, ‘Acu nimteu kelamedung ba gade ribeu lo kie ni’?

24 Acu ledeu beulo, ciude Ih ziune bam luzie;

Ih dai gade mau dibi acu peu ci lulo.

25 Samdung kesangbe au dai kenzwa ge de teei no!

Dede nnui rang renia kebam, dainzwa penui acu kesiu siakte bam no?

26 Keregui kegahme samdung pwa tingkai ge nzwa cet kecu,

Nang a samdung mlai di kera cet lani?

27 Kesang, pepei kegahme na de ziemne nnui dacak teila,

nah heliketeime gunia nzwa n zangbe reu renia.

28 Cu, cine, keherei de acu pie gailo,

kedanemene Ih n dwade kenret laklu.

29 Ntak dilu, Ih n dade kiela; peu petau kemakge de n da tei diso;

Kesang, ntak dilu, kedanemene Ih kesang ga bam kecu ziemne.

30 Nnui Ih nret au lie cet lani?

Nnui Ih petau kemak gade petaube rang gai laklie cet lani?