1 Daidau ting tsura ga renaam meudung mciu labi nang ci ni?

Daidau ting heti pe na mciu labi nang kwalu bui ni?

2 Penui tetlak kecu keidung nang pei lubui ni?

Nang penui na kemna ting ci bam ni?

3 Penui ndünmie penui na mna lula,

iciu eh penui kemna tet tei ting cang dila.

4 Penui namedung ngkienglu nah renaam gade dicu lula;

penui hegwale pet eh cailigwang dai tadi la.

5 Caune peu renaam gada de lungmpet beu lano?

Caune pak kenzet gadadung ria hiak gai beu no,

6 Cidung de ki Ih Arabah* gage tei pwabam,

pe ki mcai deu gage?

7 Pa namdi ga makwadung siu eh rata gade nuila;

pa kehereube kesah kwadung siu lama.

8 Pa lamlwadung ga pe taktyei ga terwa la;

pa rebang kemdiak leune tyei kera pie la.

9 Hetumseu n ta tei kera pesui yi zieni?

Pa n kauruine ki ga bam neu zieni?

10 Nang renaam tumseu hepei kepung ria teulu bui ni?

Pa langkam de puhlu buini pa ncai sui eh?

11 Pa kengkieng kedi de nang nlumlu bui ni?

Nang n ta de pecu peu tei kera püt beulu buini?

12 N ciu kilung punggwang kera nang pecu nlum lubui ni,

n caipung ziemne meiciu hekwa kera?

13 Ruitie hegie eh siulap gaila,

dede cide hegeuring nah hunglu kebui maidung ge ni?

14 Kedanemene pa pe bum kideu gage nbum gaila,

nah cidungde peu rebui ga lumbam lula;

15 pa cidungde hepi ne daupop di kera nsungta dila

mede teikuu ge ne cidung caidi kera.

16 Pe name de pena kemak nzwa dila;

pa pe bata de kapdi kera hing lama,

17 Tinggwang pe dade maci keugi kedine

nah pecu kecikecet gede peu kemakne.

18 Pa pak nzet kegai dau,

pa hekwen nah cide keteube de nuineu dila.

19 Nang ne hekwen de pe kengkieng peu ni?

Nang ne pe maiketie pwa pe ngwang pai tei beuni?

20 Nang pecu tangrim ge nzwa nsau lu kera tei gai ni?

Pe ngidiketeu kwa kedi de au kehing ge.

21 Pa ngkieng eh pakpet la nah pe kengkieng teu pe sui yila;

pa hereunet de redau kerane pakpet la.

22 Pa kengngi de nuineu la nah nggi di lama;

pa kingtie gade caili di lama.

23 Pegim mlai kezang mbeu gai,

kepiklik kebam hengei nah kehiatie si eh.

24 Pa kekuu nah rata si eh hangdeu mneu lula;

telui kwa kegaidau, pa heni ket ga sap gailak.

25 Telui kwa kegai dau, pa rangla, ‘Aha!’

Pa kemdei gade hereu riem ci lula,

reugwa muibedung sahbak kegai na sahkegai kwadung.

26 N maci ziemne helie limhu lula ni,

pa tingpile pe hesiu kezang kegai de?

27 N aja gade lingrie limcu cehu la ni

nah heni kecehudung ga pecit teu lani?

28 Pa hetialwa ga lungh eh pe ki tei lula,

tsuratia peu gage, kengkieng gage.

29 Aika de pa pe taktyei peei la;

pe miak au kemdei gade cidung ngaula.

30 Pe name de hejai sak lula;

ketsai pau kebam ga, pa de cika bamla." *