1 Pecai Temanme pei Eliphaz sam keli eh ranggai,

2 "Iciu liecai makecime ge kemta maci teu sam keli

nah naimiak kepetle tingkai le pecu pui eh bam zieni?

3 Pa pemi kegah resiu de ngngwa rang renia zie ni

mede samkerang kie pa cide le pwa makeyi tei lu gailak ni?

4 Meliene, nang Tinggwang de herüt tei ncam dida;

nang pecu kereca de pecu kam dida,

5 n maudung ne n mui de keledeu beu;

nang au nciem yi eh mide kemeu lu kelade ngu tei luda.

6 Nkatei n mui ne ncu mmau, Ih ne ma;

kesang, n mui ne ncu ndulia nah mcau bam dida.

7 Nalung gade nang mina raitube deni?

Nang au kideutudung dwa de ladi deni?

8 Nang Tinggwang kengkim macidung siu deni?

Nkatei n dage nang maci kezeu dila ni?

9 Anui ci kemakpe nang daige ci no?

Anui dade bam kemakbe nang daipai cilu laino?

10 Anuida au pe peu pu kedime de nah mina cingsüt kedime de bam

penui au n pei swade cinggwa dida.

11 Tinggwang lungciep de n ziemne cam ham dini,

sam kemnuadung n da kegwang de?

12 Daitei n mlung de peu ncu teu tetdi zeu no?

Daitei n miak pieling bamno,

13 iciu eh n rabe de peu Tinggwang de mcau eh

n mui gade sam cikenzwa petdi kera?

14 Mina keheibe de mci lubui ni?

Mipui dade lungh gwang kelu keheibe de samsang lubui ni?

15 Pielo, Tinggwang au kemcidung* de kecangde de nlumla kemak;

kesang, tinggimdung de pe miak gade au mci ma;

16 kerecie nah kemau tei kelame au daikenzwa ge de mci cangme ziebi,

mina kemau de dui nzwa sak kelame!

17 Ih nnuide pwalia zie; a kwa kingneilu;

Ih n dage reci beu zie Ih ma kengaube,

18 macidungde makecimedung penui peimedung tingdau de teugwang lula,

cidungde penui paumedung kebai di kemakde.

19 Hangdeu aidungde penui paupaime deu, penuide rünne hangdeu peu,

nah penui kakga sangme migede tetkah gwang ma.

20 Mina kesiame pe teilung zie pelane teei eh keherei la,

mide tei keherei kelame mmidung hekwa pwabam.

21 Siu kehing kwadung pe kwen ga lala;

pa hei nah kehega kebamdau, kengkapbe* pereu ga gwang dizie.

22 Pa au kemui gade cailigwang dailu kera cet lama;

kiengtie be pecu kwabam.

23 Tangku ziemne pa heni kekiee ga mie, pa rang eh, ‘Dai ga bam no?’

Kemuibe tingba de petaiga kebam pa cila.

24 Lungrei nah suisiet de de pa hingla;

aidungde ne pecu puipung eh, hegwang ge hereu ga lüt kera mtei teu kebamdau nzwa.

25 Kedanemene pa au pe ba hwapwa Tinggwang de kemcau ta teigai kedi ziemne

nah Ngkiengtube dwa gade pe zai ngang cangsiak kedine,

26 mina kesia aipaude au Tinggwang dage ngangdang delwe pakkai,

hegeu kesiuge teu eh.

27 Aide au kesang lei, pa au peca le pecu hampung pwabam liede

nah pe za peca le hekwa pui pwabam liede,

28 nah namdidung mina lungh kemak ga lungh liede;

cu renam mina lung kemak kidung ga liede

nah ralie le kepui teidi laibam kecu ga.

29 Pa au mahei gailak; pe mahei au bamtie lak

nah pe mabam au pe deu gwa lebie pet gailak.

30 Pa au kemuibe de lamna swa gailak;

miheu ge ne penei bwanadung de gap ki dizie;

Tinggwang mui gade kepet cui de ne pa au tet dizie. *

31 Pecu peu ma kemtabedung de nlum so, pekatei pecu cwa di eh;

kedanemene ma kemtabe le pwa pe ziehi dizie lu.

32 Pa tsai kerating gwang kemakne cide tei zie lu;

pe kiak be au mdiak lulak.

33 Pa au kubebang petsi meu mene nghai di kelabe nzwa zie;

olive bang nzwa pa pe pa tei gidi zie.

34 Nlumkemakme de ngngwa hemaa tei kelame pe leuh tei lak;

hetau henim le ki tei kelube mi le ru dizie.

35 Penui mide tei kerejam tetlak pung lula nah makesia be mna gai beula;

penui kemaube tetlak lula delwe kemau mna beula henabam au mide kecwa tetlak lula."