1 Dede cu au Ih a swa kehename dwa de magede tadi da acu teu henui tei dida,

hena aipaudung peime de au Ih a meurün hau taiga heteudung de de ngngwa eh peu heta teimah.

2 Kesang, penui peime kengkieng dainzwa acu ngha lulai,

penui heri beting cang kedi cai?

3 Penui au makegah nah kenzeu gade ntiang dida;

penui mina lunghlakemak nah renaamkang kemui gade mari tyei.

4 Penui mabang pai nah tsinghum gade peneidung nggi;

tampiak mahdung rilwe penui tyei.

5 Penuide minadung kakgade

keregame ge de kesiu kecu nzwa gwa mpetdi.

6 Cine penui hereuki langkamdung ga lungla,

tsupop nah kideu koikidung ga lungla.

7 Ceheihum kakgade penui gada nzwa mra bamla,

nah hetubang kangga ngkwa bamla.

8 Penui au kemie namedung lie, kesang, masipei kemakmedung!

Penuide au kedap ria le gwagi kedimedung.

9 Dede cu au Ih penuine nui keneume ge dida;

Ih cu penuine a ha kerangme ge tei dida.

10 Penui acu nneu nah a dade ndei dida;

penui mcai nsui pwa a zu gage kekai de penuide kezeulu meda.

11 Kedanemene Tinggwang a lakpi ria hiakdi delwe acu saa bam kedine,

nah penui a rata tei kerane adwa gade penuide kezeu luma.

12 A zetle bie rehangme cuhlu;

penui acu gwagi nah

penuine tui kelu gu niadung de le pwa a lampui kam.

13 Penui a lampui tei msia;

penui kengkap de cwakpwa a lam ge kai,

penuide migede kamlu kera gada.

14 Penui namdi be kirie ngkei nza pwa kebam gade reugwame kegwang nzwa acu renia;

ngkap kebamdau penui nla mie acu sam.

15 Kerehimbe a da gwang;

acu kerüt de tingkai ne guipung kedi nzwa gahdi;

a mabam hemwa nzwa tetdi.

16 A keringria a lung gade lwa mpet;

a rei tingbadung acu tui teu di.

17 Tingmui a radung tei pop lüt;

a keteei de ne geigim eh ntak ma.

18 Tinggwang kengkieng de ne a pai teu teudi;

cide ne acu kezuibing di.

19 Acu nyasai gage kelien gaidi;

Ih miceu nah rebui nzwa dida.

20 Ih n dage mra gai, Tinggwang, dede nang a sam keli ma;

Ih cuh saplu, nah nang acu piegai kecu rünne.

21 Nang tsam di nah a dade n zai sia;

n ba kengkieng delwe acu tei keherei.

22 Acu tingkai gage teuncuh lu delwe cide ne acu guipung di;

nang rahang gade acu kecui nlüt mpet.*

23 Nang acu ketsai gage teu gaidi kera Ih cibam,

keringme pelane de kai zielie kedet pwa kebam ki gage.

24 Ciciude, kau kemiedau migede pe ba hetwa pwa kengha kie meni?

Keherei keludau migede kengha kie meni?

25 Pa keherei keludau Ih pe ziemne hap meni?

Kegahme ge ziemne Ih a lung keherei meni?

26 Ih keyibe kereguidau, cidau kesiabe gwang;

Ih kebaa be de kwa kebamdau, cide mene kemuibe gwang.

27 A mlungbe rei nah mtak meda;

keherei tingbadung a da gwang bam.

28 Kemui ga lungh kelame ge nzwa Ih la dida,

dede cide au naimiak ziemne mah;

Ih hemaa be gade sap eh kengha kie gai.

29 Ih maiserung siname ge dida,

ostrich ruine kangzangme ge dida.

30 A geu au tiak nah a dade nlwak mpetdi zeu da;

a radung au kelumne ru.

31 Ciziemne a leibung au hei eh kehap leidung tei kerane mtei pwabam,

a gu terwaine lei au nrung kebamme leitei ge dida.