1 Pecai Shuahme pei Bildad keligai,

2 "Dai tiege nang aidungde rangbam zieno?

Dai tiege n samdung de tingkai kaidi nzwa bam laino?

3 Kengkieng Tinggwang kemzuibe tei li lani?

Ngkiengtube kesamsang tei li lani?

4 N namedung pe dage kemau teigai dida;

pa penuide penui maudung gage kaidi kela, anui aide cibam.

5 Dede nang laikai tei eh Tinggwang de peei

nah Ngkiengtube dage n nggia kiecai,

6 Nang mci nah mzui bam cai,

pa ncu teucuh beuzie

nah n bam petau gage teucuh dai beuzie.

7 Nang ndeu keludau ceu liede,

teilung kekamle au keraidau swa lungh yigwa luzie.

8 Kehereide ndaa keraime dade keteu lu,

nah anui paupaime ci kelu de gage nlungkai lu.

9 (Anui teilung au dui nah magede cima

kedanemene kideu ga anui teilung au tingkaumie ge nzwa.)

10 Penui ncu ledeu eh ranglia lak ni?

Penui mlung gade samrang gailak ni?

11 Tangnia si mene kiina lunghlu buini?

Dui si mene hekuu lunghlu buini?

12 Cidungde mdiakrei eh bam reu kecune nah dangtüt kemakne de,

keda bangdung dwa cidungde regui dila.

13 Tinggwang de nsungla kemakme au lampui cikenzwa ga la;

hezai tei kelame au keregui gah dizie.

14 Pe keregui au teipang dizie,

nah pe kenlum au tamriakpe ra nzwa nnei.

15 Pa pe ki ngngei lwe bam zie, dede cide au pecu ngha gailak;

pa cide herak luzie, dede cide au sap gailak.

16 Pa tingnaimiak dwa gade au mdiakrei eh bam,

nah pe gurie pelane ga pekiakdung pet bam.

17 Pe mahdung tangtsudung peureu ga kop pung bam;

penui heni keyi tangtsudung kakga bamla.

18 Dede magade cide pesap bam gade tei msia dicai,

heni cide pecu mlaidi eh rang zie, ‘Ih madaude ncu ngau ma.’

19 Pielo, aide mige "pesuiyi" kelame zaireli ge;

kedabe bangdung cipau tangdei de gade pe keleu lungh pet daila.

20 Pielo, Tinggwang au mina keyime de püt dilak;

mede kesiame de ngha lama.

21 Pa ncu suiyi le kepui tei beu zie,

n muileudung le sah gai zie.

22 Ncu ngaurau kelame reu gage ngngam teugwang beu zie;

iciu eh kenlienme paiki gah dizie."