1 Job marang dai eh cu,

2 "Tinggwang ring la kesang kecu nzwa, pa ne a nzeu de keu teu dida,

Ngkiengtube, pane a teilung tei kaa dida,

3 a kering a da kebam dau de,

nah Tinggwang cuinggi de a nkie ga bam,

Ih aide tei zie.

4 A muileu kesiabe sam rang lak,

mede a nleu kecwa sam rang lak;

5 Ih madaude nnui hangcumcum de petau delie beulak;

Ih tsaidi kemak tane Ih petau bam lie kecu mlai dilak.

6 Ih a kenzeube herak mtip luzie nah Ih peu tetdi lak;

Ih ring kebam tane a lungning de peu acu mmau lak.

7 A ngauraube de peu kenlien be nzwa di lu;

acu culwe kereniabe de peu petau kemak mege nzwa di lu.

8 Kedanemene Tinggwang de si kemakme ge pe keregui de dai no Tinggwang pecu cakgi kedi dau,

Tinggwang pe teilungh keu teu kedi dau?

9 Keherei pe da kegwang dau pa sa kegai de

Tinggwang kingnei zie ni?

10 Ngkiengtube Tinggwang dade pa pekatei pecu pesui lu

nah peting pelane gade Tinggwang de qu lu zie ni?

11 Tinggwang tahtei Ih ncu ledeu beu zie;

Ngkiengtube lungning Ih kebai di lak.

12 Pielo, aide nnui pelane ngau da;

ciciu cai daitei nnui kemta aide rang la no?

13 Tinggwang dade kenlienme ge kwa aide da,

mide teikeherei kelame de Ngkiengtube dade ngaukelu mapwa deda:

14 magade pename hing pet lu cai, cide au kiengtie ziemne;

peleu pehiak madau gede kennung ketyeipok ngau gailak.

15 Cikade kwak kelume rapia gade tsai zie,

nah penui naume penui de hei eh hap lak.

16 Kenlienme ge rangkang rebui kie ge hekwa pwa bam de,

nah pai heni lidei kieege keswa pwa bam de,

17 pa pai heni hekwa süt pwa bam de, kenzeume ne cide bah dizie,

nah petau tei eh kelame ne rangkang penui kakgage mzi luzie.

18 Tamriakpe ge nzwa pa peki teilu,

kekwame ge ki keceu nage teikelu nzwa.

19 Pa keheime ge tei eh zeu ga zeu, dede pa ciciu mui eh bam lak;

pa pemiak nrak gaige, ma pelane gahdi.

20 Kerehim gele dui nzwa pecu kezuilu;

rahang gene tingmui pecu teu tetdi.

21 Naimiak kepetle tingkai ne pecu guiteu tetdi, nah pa tetdi;

pa lungh kebam ni gade pecu biak pungdi.

22 Cide pecu sam nah ntak ma;

pa cikade pak kera tei.*

23 Cide peba ge le pecu tui pwadi

nah pe sap bam gade pecu gui pung di.