1 RAMPAUBE Job dage rangsi eh cu,

2 "Mide kii neu eh kelame Ngkiengtube de teinzui lu bui ni?

Tinggwang de samlim kelame de peu rang gailo."

3 Pecai Job au RAMPAUBE sam keli eh cu,

4 "Pielo, Ih au magede ma; Ih dainzwa n sam keli lulai?

Ih a bale a mui keba luda.

5 Ih pia ge rang dida, nah Ih sam keli lakta;

kesangbe, piana, dede Ih au sipet lakta."

6 Pecai RAMPAUBE au Job sam keli eh rahang keci ge gade marang,

7 "Cu au mina ge nzwa n kia kanglu,

kedanemene Ih ncu keteu zie, nah nang a sam keli maisia.✝

8 Ih au kesangbe masang me lie kecu nang rangzie ni?

Nang au acu mmau zie ni iciu eh nangbe petau lie lu kera?

9 Nang Tinggwang ba nzwa bam ni?

N pa nzwa eh pe kwa nzwa tingceu kwa teilu bui ni?

10 Cu nang kendu nah herüt teubah lulo;

herüt nah kengkieng pwa kailu.

11 N rata süt kedide teizang gidi;

ngang kelame de teihenah kedi leune de pie gailo.

12 Ngang kelame leude teihenah kedi pie gailo;

penui sap gade kenlienme de caikau kedi.

13 Kideu kang gage penuide kung kecüt kedi;

penui zudung kemui gage kebai kedi.

14 Iciude Ih de n ha ranggai zie

n ba zetle ncu kelilu bui lie kecu.

15 Cu teikuu de pie gailo, Ih ncu tei kelu dau cide tei kelude;

pa au ketumseu ge nzwa cehei tyeila.

16 Cu pielo, pe kengkieng au pe kiakang ga lalie;

pe kengkieng au pe za cih ga lalie.

17 Pa pe mi cedartsing nzwa tei lula;

pe mnie riadung au teukecüt lwe bam.

18 Pe radung au hetageu lwadung nzwa;

pe pi au hegeu tiedung nzwa.

19 Pa au Tinggwang damkegai kaunedung reu kedibe.

Tinggwang pecu teikegaibe rünne pecu ngam lubui.

20 Kedanemene kideutudung pe taktyei pwa peula;

renaam ga teikuudung pe tai ga nggwa bamla.

21 Pa lotus bang kang ga zeu bam

hekuubangdung sung kangga, dui kehwa ga.

22 Lotus pabangdung penui sung gage pecu gumpung bamla;

reuceuna taiga willowbangdung pecu sung bamla.

23 Pielo, hereuki ge pekung ga pui dicai, pa mbeu lama;

pa au kuu bam, Jordan pe mui ga puihang liede.

24 Keheibe de kagwakle pecu tui lubui ni,

mede kekuitie ge teu pe ngkie kuitiet lubui ni?