1 Ge Tinggwang namedung penuikatei RAMPAUBE dwaga gwang kecu benai, Satan de cika pekatei pecu RAMPAUBE dwa gage kai kerane penuide nzang eh gwangla. 2 RAMPAUBE Satan dage keteugai, "Nang daiga de gwang lano?" Ge Satan RAMPAUBE sam keligai, "Kideube ga rwa hui kela, nlüt mpet kela gade lie." 3 RAMPAUBE Satan dage ranggai, "Nang a kilabe Job de ncet piemi? Kideu ga migede pa kenzwa kemmau ge de gah nah mina kemzuime ge, Tinggwang mie hing nah kesiabe gade nreutet di kelame ge. Nang acu saumau beu eh peu pecu renia liede, pekie ga eh pecu ngkap di kera tei de, pa cude lungsang eh sap mtip bam."✝ 4 Satan RAMPAUBE sam keligai, "Pegeu ziemne pegeu, kesang; mige pe teilung ziemne pe da kebam pelane peu dizie. 5 Dede nang cu n ba hwagai eh pe ra nah pe ci tung gailo nah pielu pa ndwa gade ncu reset dizie." 6 RAMPAUBE Satan dage ranggai, "Pielu, Ih ncu pecu tung kera peu dida; dede pe keringria au tung lak."

7 Iciu eh Satan RAMPAUBE dwa gade tet nzia di. Pa Job dage mazam teeisüt kecu pe pideu gade pe peu kecang teigai. 8 Job li pang kecube le pekatei pecu kwa, nah pa mimangbüt sum kakga ntum bamdi. 9 Ge pe nau pe dage rangdi, "Nang cude n kenlum de keuntip bam zie reuni? Tinggwang de resetdi eh tsai dilu." 10 Dede pa pe dage rang eh, "Nang mipui kemie pui ge marang kecu nzwa rang bam dida. Anui Tinggwang dade makeyi be ngau lula nah makesiabe luulu lakni?" Aidung pelane gade, Job au pe muileu gade kemau teidi ma.

11 Cidau Job zangme hangcum makesia aidung pelane pe da gwang kebam siulu, penui hangge ge pekatei pebam riep gade gwang: Temanmepei Eliphaz, Shuahmepei Bildad, nah Naamahmepei Zophar. Penui peting riet lwe pecu ngngwa lungrei mzi eh pelung taumla kera mteilu. 12 Penui kemdei ga kela dau ngang cuh piegai ge, penui Job de cilu tadi. Penui suisia eh hapdi, penui hangge ge penui paini hiet nah rebui tingkai gage nah penui katei penui peu gage kelien gai.✝ 13 Iciu eh penui tingba nah tingmuizie lang henane pecu ngngwa bam. Migede sam rang pecu resiu ma, penui pe lungrei diham kedi ngau kecune.