1 Pecai RAMPAUBE rahang keci ge gade Job de qu eh rangdi,

2 "Kecikecet si mene marang eh tariem gage kemui teugwang kela aide cau no?

3 Cu mipei ge nzwa n kiakang ngkang lu*

kedanemene Ih ncu keheteudung ge keteu zielu, nah nang a sam keli maisia.✝

4 Ih kideu bangbeu dwa kebam dau nang daiga lano?

A dage ranggai, nang kecikecet keibam lie cai.

5 Caune cide cet mning luno? Ranggai lo nang ci cai.

Caune cide reuga kemdet ria kezang gai no?

6 Cide bangbeu daipai reu gage dwa luno?

Caune cide kimiaktsu dwa luno?

7 Tingcang gidung ngngwa lei ketei dau

nah Tinggwang namedung suiyi kwa sah kegai dau?

8 Caune jaaidi kikamdung ngkui di no

cide pangpop kepet dau, cide neki ge gade kepet dau nzwa,

9 Ih hemwa painidung ketei dau,

nah muiting kecu cide kezui pwa kebam dau?

10 Cidau Ih jaaidi ziemne a hedeurai rietlu,

nah Ih cide kebam nah kikamdung kai keludau,

11 nah Ih cide dage kerang dau, ‘Nang aika kecang gwang lubui, dede mdei silak;

aika ge Ih n duicui ngang keladung rai ge kai beuzie.’

12 Nang tingcang dage aja kai ni,

mede tingcang baareirang de pebam cilu kera teibeu ni,

13 iciude cide kideube nlidung giepwa bamlu kera

nah kenlienme de cikade kecung mpet di kera?

14 Kideube au pe rehi lidi lidei au giakdap kang gade lidi kela nzwa;

cipau reuga ma pelane pai ge kedip kenzeu ge nzwa mcigi eh sap bam.

15 Kenlienme dade penui ‘kebaa’ de keugi di;

penui ba hwa kenzeu de teicum di.

16 Nang jaaidi rwakdung ga mie deni?

Nang kecok coktu lebie mie deni?

17 Ketsai riekidung de ncu keulia deni?

Nang ketsai mie riekidung ngau deni?

18 Nang kideube petie pedi cibam deni?

A dage ranggai lo, nang cidung pelane ci bam cai.

19 Kebaa mtakbam daiga bam no,

kemuibe, daiga pebam no?

20 Nang kebaa nah kemui de cide kena ta bam ga nzangmie lubui ni?

Nang ci kenade penai ki ga cailigwang lampui peei lubui ni?

21 Nang cibam cika, cidau ncu mna lu delu;

n tingbaziedung au kiee zu lie!

22 Nang buising kidung ga lütpie deni,

mede nang tangheu kidung ngau deni,

23 ma aidung de Ih keherei tingdau ziemne kai pwa kebam de,

reutak nah keregi tingdau ziemne?

24 Hegi keikemie mzi gaibeu kera lampui daide no?

Mede naimiak kepetle de kideu reu dai gage tingkai teizang la no?

25 Caune duidi tingrui helau teigai beu no,

mede caune tingkeceu lampui teigai beu no,

26 migede lungla kemak deudung ga ting teirui gai no,

nah hetaideu, migede kegah ga,

27 teimsia kedi nah gikedi nidung de peu mnunglu kerane,

nah peu kideube de cehei lungpet lu kera?

28 Tingrui pe pei ge bam ni,

mede caune hezin pei tei bam no?

29 Caube henabam gade buising gwang no?

Caune tingkam gade hesiuli mpet no?

30 Duidung mbai lwe tangtsu nzwadi;

kideu kecok ngkung pekang mmi di.

31 Nang Tialiangkileime de kanglu bui ni,

mede Orion ria teicak lubui ni?

32 Nang hegisaudung de peting saikdau baapet lulo saubeu lubui ni?

Nang Ghibei nah Heghikamca lampui sau beulu buini?

33 Nang tingkam nlaidung ci ni?

Nang kideu reu gage tingkam zaidung kaibeu lubui ni?

34 Nang hemwadung gade marang lubui ni,

iciu eh tingruidui kekiee ge ncu gumlu kera?

35 Nang hegi keimie lu kera cidung de lang mpet gai lubui ni,

cidung n dage rang lubui ni, ‘Anui aika bam’?

36 Caune hemwa gage maci kai no

mede hezin de kecikecet peu no?

37 Caune pe maci le hemwadung peeikap lulai?

Caune tingkam duiladung rui mpet lulai

38 rebuidung ma ketak be ga pak kelwet dau

nah kideu kangdung rekaubing kelu dau?

39 Nang hingho pui ge tuilu bui ni

mede hingho nadung kenzeu teimnung lubui ni

40 Penui ki ga mbai kebam dau

nah kwa eh mbai kebam dau?

41 Caune nruine pok teibeu lano

pe namedung Tinggwang dage mra kegai dau

nah ketyeipok gah eh tanglia kela dau?