1 Cine cu, Job, Ih ndade a nggia kiela, Ih kerang de siu lo;

a samdung de kingnei lo.

2 Pielo cu, Ih a mui ngkei dida;

a mleu a mui gade samrang bam dida.

3 A samdung a nlung kemzuibe gade gwangla;

a muileukung maci kesangbe rangla.

4 Tinggwang Rabe ne damgai;

Ngkiengtube kering ngicui acu kai pwapeu.

5 Nang teilu bui cai, acu keli gai lo;

a dwa ga cusap lwe n samdung rang teune gailo.

6 Pielo, Tinggwang miakngau gade Ih ncu hengin lie;

Ih liede tangdei le acu tei kelume ge.

7 Pielo, kengngidung ncu tei pwapeu ncu peu mahing dilak;

mede ncu hing kera kerüt n peu ga gwang dilak.

8 Nang a kwen gage kesangbe ranggai da;

Ih n samrang kwadung siu da,

9 ‘Ih au mci nah kemau ada gah;

acu mmau gai kera ga, nah ada makesia ketei ga.

10 Pielo, Tinggwang acu gwaketang kera lampui peila;

pa acu le pe ngauraume lie bam dida.

11 Pa a pi pwa pidau gage kai gai;

pa a lampuidung pelane piebam la.’

12 Pielo, aika de nang petau meda, Ih ncu keli gai zie,

kedanemene Tinggwang au mina swade di ki.

13 Nang daitei pecu ncam eh mmau la no?

Pa pe bata hadung kette kaigai lama.

14 Cine Tinggwang piage rang,

yeo, piana, ciude mina cide cilu ma.

15 Mimang gade, tingmui mangdak gade,

mina zipzing de kezeu da,

zeulie ga zip yisüt kebam dau,

16 cidau Tinggwang minadung kwen ngkei gai,

nah penui de ledeu kegai de kebai dila,

17 cide mina dage teigai zielie kebam penui kemau ziemne,

nah ngang kecu kebai di kela ziemne.

18 Tinggwang hekwaki gade mina teilung teu cailigwang luda,

pe teilung ketsai gade lüt di lai eh kebam gade kelilu da.

19 Mina de pe zeu gade keteeikenei kai eh ledeu la,

pera gage matei kehung liagai kelak kai la,

20 iciu eh pe teilung au ketyeipuk tyei neu tadi zie,

nah pe rabe taktyei de nggum tadi la.

21 Pe pumteih ga peci gah dila ciu eh cide ngau gailak dila;

pe radung, ndaa ngaula kemak de, cu ngau pet dizie.

22 Kesang, pe rabe perau ga nna gwangla da,

pe keringria matei ngkap keladung nna jütjüt gwang lada.

23 Dede magade tinggimgwame ge pecu ngha kera cika bam cai,

cangcang gade ket,

mina de pe ziemne dai petau bi rang beulu kerane.

24 Tinggwang pecu ngaunggia beu zie delwe pedage ranglo,

‘Pecu peu herau gade kelibeu lo;

Ih pecu rilu kera ge ngaulu delu.’

25 Iciu eh pe pum ga pe teih henamedung teih swade nciep gwa dizie;

pa perehang tingdau ga cailigwang dai dizie.

26 Pa Tinggwang dade kie zie, nah Tinggwang pecu ngaunggia zie,

iciu eh penui suiyi süt eh Tinggwang de ngau zie.

Tinggwang pe minadung dage kesamsang ziehi peu zie.

27 Pecai cipaude lei tei zie mina kedame dwa gade nah rang eh,

‘Ih mau dida nah kemzuibe de gi dida,

dede a mau de ziemne saja peu ma.

28 Tinggwang a rabe de hekwakecok ga lütdi kera gade kelibeu;

a teilung kebaa ngau jüja bam dizie.’

29 Pielo, Tinggwang ma aidung pelane mina ge de ngngwa tei,

piana, yeo, pia pekecumbe de,

30 herau gade pe keringria teugwang dai luzie,

iciu eh pe teilung keringria keba de peu pecu gi mbaa lu kerane.

31 Pie teune lu, Job, nah a kwa kingnei lu;

zing de bamlu nah Ih marang gai zie.

32 Magade nang madungge rangneu bam cai, acu keligai;

ranggailo, kedanemene Ih ncu peu petau siakpe ga bamneu lie.

33 Ciciu meliecai, iciu cai a kwa kingnei lu;

zingde bamlu, nah Ih maci teu eh ncu ledeu beu zie."