1 RAMPAUBE Moses dage ranggai, 2 "Israelme minadung dage ainzwa rangbeu lo, ‘Magade mipui ge tetlak lu nah mipeina ge nna lu de, pecai pa au lang henane mci ta dizie, pa mipuina zai ketei tingbadung de mci kemak nzwa. 3 Lang hesetne benai ngiena mipeina hegeu rum bilu maisia. 4 Pecai pepuide hejai kecu gade tei mci kecu zie camreiekecum tei jüja bamzie. Pecu реu mci kecudung ket de tung lak mede recabam ga pecu tei mci cang kemakta gwang lak. 5 Dede pa mipuina de mna lu liecai pa au mtakkak kena ge mci ta dizie pa hejai kecu tingdau nzwa. Pepui de tei mci kecu zie riak herokeherok ge teizie.

6 Pecu pe napei mede pe napui ziemne tei mci kecu tingbaziedung cang kedi dau, pa meurünna mmi ge keru ratak tei kera, nah repuine keceu be mede tamhau keceu nabe kemau reca tei kera keu gwang beu maisia, paiki lüt kera kikam ga, cingkupei dage. 7 Iciu lude pane RAMPAUBE de peu zie nah pecu tei mci zie iciu lude pa hejai lwa kecudung ziemne mci dizie. Aipau hezai de au mipuige mipuina mede mipeina de mna kecu dau mzai kerane. 8 Magade pa meurünna lui canggai lakdi lie cai, iciu cai pa ruipuine mede tamhau keceunabe kena keu gwang bi maisia, keru reca ziemne nah keda decai kemau reca peu kerane delwe cingkupei ne pe ziemne tei mci gai beu zie; cipaucai ne pa mci luzie.’"