1 RAMPAUBE Moses dage rang eh, pa rang eh cu, 2 "Mige mateei gade mci di delie rang kera benai, hezaibe aide nzwa zie, pecu cingkube da ngngwa gwang zie. 3 Cingku be ramzeuki gwale mpet lu eh peu ncet pie zie, magade migeu mateei teei kebam de yi dicai.✝ 4 Ipaucai cingku be ranggai zie mci canglu kerane nruine kemci kena teugwanglo, nah cedar tsing ge, heria kegie nah hyssop kiakge.✝ 5 Dui kemci kebam tangdei li ge reu gage nruine ket teitset lulo eh cingkupei pecu aja kaibeu zie. 6 Ipaucai cingkupei nruine keringbe de keu lu delwe cide de nruine dui kemci de gage teitset kelu de jai gage mpung gai zie, cedar tsing, heria kegie, nah hyssop de si eh. 7 Ipaucai cingkupei hejai cide pia hena mina mateei teei kela gade hui mci lai eh kebambe de kezin lwa zie, nah pa pecu mci di delie rang beu zie, nah cingkupei nruine ring kebam de peu nza ha kecu luh gage lungmpet gai beu dizie. 8 Mina be paini heta di, pemai taidi delwe dui pia dizie, iciu eh pa renet gade mci dida. Pa ramzeuki ga nlüt lubui da, dede pa pe paiki gwale lang henane lungh maisia. 9 Lang henane benai pa pe peutam, pe muimai, pe miakmai, nah pepum ga pemai pelane taidi zie, pa pe pai hetadi eh dui piadi zie; iciude pa renet gade mci lu zie.

10 Lang hesetne benai pa zamra kemak meurün peseuna kena nah meurün peleina mmi ge kecuge, nah maca kai kelu tokkui yisüt kecu zicum-zikerei ephah ge mei reca ziemne, nah maca log ge. 11 Cingkube pecu tei mci kebeube, mina be nah reca aidungde teu eh RAMPAUBE kebam paiki dwaga gwang zie. 12 Pecai cingku be meurünseu nage teulu delwe maca log ge si eh pa cide teu paurui ratak teibeu zie; pa cingkupei ziemne RAMPAUBE dage cidungde kezin ratak peu zie. 13 Pa kemau reca nah keru ratak kaunedung daptset kela heni kemci paiki gade meurünna de daptset zie. Pa cide tei maisia, kedanemene kemau ratak nzwa eh peudai kecu reca aide cingkupei gu nah cide mci süt kecune. 14 Cingkube paurui ratak meurünna jai kesa keu lwe mina be mci di lai eh kebambe zetle küntu gage, peba zetle zurangpui ditube gage, nah pepi zetle zurangpui ditube gage kai zie. 15 Cingkube maca log gade kesa keu lwe pe badeu hile ge cide ruigai luzie, 16 nah pe ba zetle zurangpui pe ba hile kebam maca gage mpunglu, delwe cide kesa RAMPAUBE dwa gade pia hena kezin gai zie. 17 Pa pe badeu ga maca kebam kesa keulu delwe cide pwa mina be mci di delie rangdi kerabe kün zetle tün ga, peba zetle zurangpui ditube gage kai zie, nah pepi zetle zurangpui ditube gage. Paurui ratak teikelu jai le kai kebam reu gage maca aide kai zie. 18 Pa pe badeu ga maca kebam kebang be pwa mina be peu gage kai zie. Nah cingkube mina be ziemne tei kemci renet tei zie RAMPAUBE dwa de. 19 Pecai cingkube kemau reca tei beu zie nah tei kemci renet teibeu zie kedanemene pa mci kemakne, nah pecai pa keru ratak ziemne makaune daptset lu zie. 20 Ipaucai cingkube recabam gage keru ratak nah mei reca teigaibeu zie. Ainzwa eh cingkube teikemci renet tei zie, nah mina be mci lu zie.

21 Dede mige magah eh nah reca ziemne peu gai lak dicai, pa meurünseu ge kemau ratak pekatei ziemne teilu kerane teugwang zie, nah olive ca kai kelu tokkui yisüt kecu zige zikerei ephah ge gu, nah maca log ge. 22 Pa tamhau kena nah ruipuine kena de si eh teugwang zie, pa ngaulu kebui gade; kemau reca ziemne nruine ket nah nruine keda ket cai keru ratak ziemne. 23 Pecu tei mci lu kerane lang pe hesetne benai pa cidungde cingku be da paiki kimui ga teugwang beu zie, RAMPAUBE dwaga. 24 Cingkube meurünna nah olive ca log ge keu lu zie reca ziemne, nah pa cidungde pwacu RAMPAUBE de kepeu tah tei lu zie. 25 Pa meurünna de daptset zie paurui ratak ziemne, nah paurui ratak jai kesa keu lwe mina be mci di delie rangdi kerabe kwen zetle tün ga, pe ba zetle zurangpui ditube gage kai zie, nah pe pi zetle zurangpui ditube gage kai zie. 26 Cipau cai cingkube maca kesa pe badeu hile ge kai zie, 27 nah pe ba zetle zurangpui le ge cide kesa teu RAMPAUBE dwa gade pia hena kezin gai zie. 28 Cingkube mide teimci kela pe ba ga kebam maca kesa pa kemau reca hejai kai kecudung gage maca cide kai zie, mina be kwen zetle tünga, peba zetle zurangpui dituga, pepi zetle zurangpui ditu gage. 29 Pa pe badeu ga maca kebam kebang be pwa mina be peu gage tei mci kela ga kai zie. Nah cingkube minabe ziemne teikemci renet RAMPAUBE dwa gade ainzwa tei zie. 30 Pecai pa tamhau mede ruipuine ket pa ngau lu kebuibe peu kerabe, 31 kemau reca nah kedabe keru ratak tei eh mei reca teigai beu zie. Ainzwa eh cingkube RAMPAUBE dwa gade tei kemci kelame dage renet tei zie. 32 Aide mina kempa mateei kebamme ge de de pa teikemci ziemne peu kelabe teicang gai kelakme ziemne hezai ge."

33 RAMPAUBE moses penai Aaron dage rang eh, pa rang eh cu, 34 "Nnui Canaan deuga gwang lu de, Ih nnui gu teidi kera nnuide peu zie nah magade keheibede nnui deu kilung ga hemwangbwa bam eh kai cai, 35 iciucai heki mpaube pa mie cingkube dage rang beu maisia, ‘A ki ga hemwangbwa bam kecu nzwa lie de eh pa rang maisia.’ 36 Cingkupei mie hemwangbwa de pie kecu dwa kilung tei mta dilo aja kai beu zie, iciu eh kilung ga kebamdung de tei hera di melu kerane. Pecai pa ki cide pie kera mie zie. 37 Delwe pa hemwangbwa de ki tangdeu ga bam mi mebi ncet pie zie, nah cide mdiak mede giejam kecu jamdung tangdeu ga tyei lüt mi mebi kecu. 38 Magade ki ga hemwangbwa bam eh ngau cai, cingkupei ki cide gade tet mpet lwe lang henane ziemne kikam ngkui dizie. 39 Lang henane benai cingkupei caili mie cide ncet pie dai zie, hemwangbwa cide ki tangdeu ga bwasi mi bwasi mebi de kecu. 40 Magade bwasi bamcai, iciu cai cingkupei hemwangbwa kebam tsudung de keu mpet namdi gwale mci kemak ni gage tei mpet kelude kelien gidi maisia de eh aja kai zie. 41 Pecai pa tangdeu helungle tei mci lwe namdi gwale mci kemak ni gage tei mpet kelu heradung de heling gidi maisia. 42 Delwe tangtsu keu mpet kedidung de bam gage tangtsu kedabe le kai dai dizie, delwe penui tangnia keheci teu tangdeu mniak dai dizie.

43 Magade tangtsu keu gi di eh tangdeu de tei mci lwe keniak dailu de ki cika hemwangbwa pet dai dicai, 44 cingkube gwang ki de ncet pie dai zie hemwangbwa pet mi pet dai mebi kecu, magade hemwangbwa cide pet dai dicai ki cide mci meda. 45 Ki cide radi maisia. Nah tangtsu, tsing, cide keniak kelu leune teu mie namdi gwale heni mci kemak gage kaidi maisia. 46 Keheibede ki cide nkui pwa kebam dau cika kelüt be tinghegi kemakta mci mene bam zie. 47 Keheibe de ki cika zip mede matyei cai pepai heta di maisia.

48 Ki cide keniak dai kelu cai cingkube gwang ncet pie dai zie hemwangbwa ki ga pet si mi pet si mebi de kecu, magade hemwangbwa gah dicai, pa ki cide mci di delie kecu rangbeu zie. 49 Ipaucai cingkube cide teimci kerane pa nruine kena, cedar tsing, heria kegie, nah hyssop kiak ge keulu zie. 50 Pa dui kenci kebam lidei kwak ge peureu gage nruine ket de teitset luzie. 51 Pecai pa cedar tsing de, heria kegie de, hyssop de, nah nruine keringde pwa nruine dui kenci de gage teitset kelube jai gage keulwe cidungde mpunggai zie. Delwe pa ki gage pia hena kezin lwa zie. 52 Aiciu eh pa ki cide nruine jai, dui kemci, nruine kering de, cedar tsing, hyssop, nah heria kegiedung de le tei mci zie. 53 Dede pecai pa nruine kering de de peu namdi gwale heni mzaha kecu gage lung mpet gai beu dizie, ainzwa eh pa ki tei kemci renet de tei zie, ciu eh cide renet gade mci luzie.

54 Aide kempa mateei kenzwabedung leune, nah kemcakdung ziemne hezaidung da, 55 nah hemwangbwa paiheni ga nah ki ga, 56 hema kecudung, mcak kecudung, nah pe sau tei eh reba kecudung, 57 daidau aidungde mci mebi mede mci di debi kecu ci ntsam lu kera. Aide kempa mateei nah hemwangbwa ziemne hezaidung da."