1 RAMPAUBE Moses dage rang eh, pa rang eh cu, 2 "Israelmedung dage rangbeu lu, ‘Midungge Israelmedung kakgade, mede sangme Israel ga lungh kebamme pe name de Molech dage peu kedime, teitset bi di maisia. Cipau deu ga lungh kebamme pecu tangtsu le samtset di maisia. 3 Ih de cipau peide de mmau zie nah pe leuhme kakgade pecu teitset dizie kedanemene pa Molech de pe na pwapeu di, ciu eh a kemci ni nah a kemci zi tei hera kedine. 4 Magade hangdeu ga minadung cipaude pe na Molech de pwa peu kedibe de malie ta dicai nah pecu teitsetdi mai, 5 iciucai Ih cipau pei de nah pe pautsa de mmau dizie, nah Ih pecu teitset dizie nah keheibe de heli li eh Molech de kereca tatei kecume leune de.

6 Mige ketsaime de resiu kecume ge tei kedime, mede rabedung de resiu kecume dage mreu gai eh penuide ngngwa heli li dicai, Ih cipaude de mmau dizie; Ih pe minadung kakgade pecu teitset dizie. 7 Cine nnuikatei nnuide tei mcilu delwe mci bamlu, kedanemene Ih au RAMPAUBE nnui Tinggwang lu.✝

8 Nnui a samdung kainzeulu nah cidungde tei mzailu. Ih RAMPAUBE nnuide tei ntsam eh tei mci kelune.

9 Keheibe de pe pui pe pei de reset kecume de teitset di maisia. Pa pe pui pe pei de reset dida, cine pa mau dida nah tsai kerabe dida.

10 Mipei ge kemha tah tei eh mipei keda nau de ngngwa di, iciu eh mige kemha tah tei eh pe kidabe nau de ngngwa dicai, kemhabe pei nah kemhabe pui de ketsai ga kai di kerabe da.✝

11 Magade mige pe pei nau de ngngwa nauhepei zai tei dicai, pa pe pei pumteih paula kebamde teu recie dida. Pe napei nah pe pei nau de teitset di maisia. Penui jai de penui reu ga bam dida.

12 Magade mipeige pena nau de ngngwa nauhepei zai tei dicai, penai hangna nade teitset di maisia. Penai kemha tah tei kedine. Penai mau dida nah tsai kera nsam da.

13 Magade mipeige mipei kedage de ngngwa nauhepei zai tei dicai, mipui gede ngngwa kela nzwa, penai hangna na kemneu tah tei dida. Penai de teitset di maisia. Penai mau dida nah tsai kera nsam da.✝

14 Mipei ge mipui ge de ngngwa lungh lu nah pe nau pui de ngngwa lungh dai cai, aide au kenlien tah dida. Pecu nah mipui hangna na de rudi maisia, iciu eh nnui kakga makesia cikenzwa bam di kelakne.

15 Magade mige makaune ge de ngngwa kemha ta tei dicai, pecu teitset di maisia, nah makaune de de teitset di maisia.

16 Magade mipui ge makaune da mie eh pecu ngngwa kemha tah tei dicai, nnui mipuide de nah makaune de de teitset di maisia. Penai de teitset di maisia. Penai mau dida nah tsai kera nsam da.

17 Magade mipei ge pe tipui, pe pei napui mede pe pui napui de de ngngwa nauhepei zai tei dicai, nah pa pecu teu paula cai, nah cipau puide pa paula kebam ngau dicai, cide au hengam ge. Penai leuhme miakngau gade penaide gwa gidi maisia. Pe tipui de ngngwa nauhepei zai tei dida nah pa pe mau de pung maisia.

18 Magade mipei ge mipui ge de pa mipui zai tei kebam dau ngngwa nauhepei zai tei dicai, nah pa paula eh lwa kebam de ngau dida, pe jai lwa kebam bamde. Mipei nah mipui hangna na de penai leuhme kakgade gwagi di maisia.

19 Nang n pui sinapui de mede n pei tipui de ngngwa nauhepei zai tei kerabe ma, kedanemene n kibaume de tei hengam tei dizie kecune. Nang nkatei n mau pung maisia.

20 Magade mipei ge pe pau nau de ngngwa nauhepei zai tei dicai, pa pe pau de herüt peu meda. Penai penai mau ziehi pungzie, delwe penai na gah eh tsai zie.

21 Magade mipei ge pe sinabe pei nau de pe nau liecai pe sinabe ring kebam dau, cide au hengam ge. Pa pe sinabe pei de herüt peu meda, nah Ih pe name dade penui mabam keheibe pe puipeime dade ngau keludung keuteu dizie.✝

22 Nnui cine a zaidung nah a samdung kaizeulu; nnui cide de mzailu iciu de nnuide Ih ngngwa gai kera deu gade nnuide mruimpet di kelakne.

23 Ih nnui dwa gade gwadi lai eh kebam deudi be zaidung dega nnui tet lak, kedanemene penui aidungde pelane tei dida, nah cidungde Ih ngkaula.

24 Ih n dage ranggai, "Nnui penui deu gumlu zie; Ih cide gum kera nnui de peu zie, hangdeu tungdui nah heliadui lwa kebam." Ih au RAMPAUBE nnui Tinggwang, nnuide minadung kakgade teutsam kebeube. 25 Nnui cine kemci kaune nah mci kemakpe ci ntsamlu maisia, nah mcikemak nruine penai mci kecu kakgade liede. Nnuikatei nnuide teihera diso makau mci kemakpe le mede nruinedung mede makau hangdeu ga bwa kelabe le, Ih nnui dade mci melie eh keu ntsam kedi de.

26 Nnui mci maisia, kedanemene Ih, RAMPAUBE, Ih au mcilu, nah Ih nnuide teu ntsam lu mina kedame dade, kedanemene nnui agu lu.

27 Mipei ge mede mipui ge ketsaime de resiu cai, mede rabedung de resiu cai teitset di kerabe. Minadung penuide tangtsu le beu tsetti kerabe. Penui mau dida nah tsai kerabe.’"