1 "Nnuikatei nnui ziemne mamiedung kette tei so, nah nnui heba le mamie tei kelu teu ncuh so mede kemci tsusum sum so, nah nnui nnui deu ga mamie tangtsu le herui kelu keheibe de kai lu eh cide dage keu mie so, kedanemene Ih au RAMPAUBE nnui Tinggwang lu. 2 Nnui Sabbathdung mnei maisia nah agu kereca ni de rüt lu. Ih au RAMPAUBE.

3 Magade nnui agu hezaidung teu lungh lacai nah a ajadung mnei nah mzai lacai, 4 ciu eh Ih nnuide peting siak dau tingrui peu zie; hangdeu be mabuih kebeu tei zie, nah luh ga tsingbangdung penui tsi bui beu zie. 5 Nnui gu ciukeneu de mtakmene tei jüja gwang kubetsi luhlüt cu kecang zie, nah kubetsi luhlüt de ma keling ting kecang zie. Nnui nnui gu tangku kepui tei eh tyei zie nah nnui tingdeu ga nnui kwak eh lungh luzie. 6 Ih nnui tingdeu ga kezuyi peu zie; nnui magede hing mene zip luzie. Ih ne hangdeu gade teikuudung de keugi dizie, nah kingtie au nnui deu ga tetkah lak. 7 Nnui ne nnui ngauraume de gwa zie, nah penui nnui dwa ga kingtie gade kau zie. 8 Nnui mi hang mengei ne haige de gwagi dizie, nah nnui haige ne cang kerei gede gwagi dizie; nnui ngaraumedung nnui dwa ga kingtie gade kau zie. 9 Ih nnuide ngau a suiyi lu zie nah nnui de petsi kebui tei beu zie nah nnui de tei nkiee beu zie; Ih nnui de ngngwa agu samkak kelu tei luzie. 10 Nnui taktyei hekwa kenzeube peting ketiee ge tyei bam luzie. Nnui taktyei hekwa pwa bam cube keu mpet dizie kedanemene nnui luhlüt keheci ziemne pebam teu maisia dizie. 11 Ih nnui kakgage agu kemci paiki kai beuzie nah Ih nnuide ngau mneeu dilak. 12 Ih nnui kakga tet la zie nah nnui Tinggwang zie, nah nnui a minadung dizie. 13 Ih au RAMPAUBE nnui Tinggwang, Egypt deu gade nnuide ngngwa mpet kebeube, cinzwa eh nnui penui gu kiladung tei melu kerane. Ih ne nnui ngwanggai gu tsingdung tei pang beuda nah nnuide peu cuh sap lwe tet mzui lu kera tei beu da.

14 Dede magade nnui a kwa kingnei tadi cai, nah aja aidung pelane mzai tadi cai, 15 nah magade nnui a samdung luu tadi cai nah agu hezaidung ngau mneeu dicai, iciu eh nnui a ajadung pelane tei mzai tadi cai, dede agu samkak kelu de tei pang di cai, 16 Magade nnui ma aidungde tei cai, Ih nnui dage aipau de tei gai zie: Ih nnui dage keherei eh ngngi süt kecu kaigai zie, nnui miakdung teimsia di kera nah nnui teilung ngkap di kera mateeidung nah kemra kaigai zie. Nnui heleuhdung ling kegai cide kemta ge dizie, kedanemene nnui ngauraume ne bui kebeudung de tyei lu zie. 17 Ih nnuide mmau zie, nah nnui ngauraumedung ne nnui reu ngking dizie. Nnuide ngau keraumedung ne nnui reu teu zie, nah nnui pak zie, migene de nnuide gwa melie de. 18 Magade ma aide pelane cai de nnui a kwa kingnei melie cai, iciu cai Ih nnuide nnui maudung ziemne pia hena kiee ge siagwa kecube saja peu zie. 19 Nnui kengking ziemne nnui ngang kelade Ih keugi dizie. Ih nnui reu ting de hegeu nzwa tei dizie nah nnui deu hetageu nzwa dizie. 20 Nnui kengking keu pwa cide magede teigai lak, kedanemene nnui deu au luhlüt kera bui beulak, nah nnui deu ga tsingbangdung petsi kei beu lak.

21 Nnui acu renia eh tet cai nah a kwa kingnei mecai, Ih nnui dage pia hena kiee ge keherei keu gwanggai beuzie, nnui maudung mzüt gade. 22 Ih nnuide renia kera teikuudung langgai beuzie, nnui namedung de rega kerane, nnui gu kauhau de teimsia kera, nah nnuide tei ncam di kera. Cine nnui gu puididung ga migede gah dizie.

23 Magade ma aidungde cai de Ih nnuide rang mriak kegaidung de luu meliecai nah nnui acu ncau eh tetla liecai, 24 iciucai Ih de nnuide ncau eh tet zie, nah Ih ne nnuide saja pia hena kieege nnui maudung de ziemne peu zie. 25 Nnui samkak kelu de gileu kedi ziemne Ih nnui dage saja cide kingtie le teugwang gai zie. Nnui de peu nnui gu namdidung lungga gwang ngkwa lu zie, nah cika Ih nnui kakga mateei langgai zie, nah cipau cai nnuide nnui ngauraume ba gage pwa peu dizie. 26 Ih nnui taktyei kaibeu ta kedi dau, mipui hang kerei ne mimang ge gage nnui tangku ru beuzie, nah penui ne nnui gu tangku perüt gade mzi zie. Nnui tyei zie dede mnung lulak.

27 Magade ma aidungde tei kedi cai de nnui a kwa kingnei mecai, dede acu renia jüja tetla cai, 28 Ih nnuide rata teu renia eh tet zie, nah Ih nnuide saja pia hena kiee ge nnui maudung ziemne peu si zie. 29 Nnui nnui napeidung teih tyei zie; nnui nnui napuidung teih tyei zie. 30 Ih nnui gu kecehu bamdung tei msia dizie, nnui gu perim kehengui recabamdung bi ngkau dizie, nah nnui gu ketsai paaudung kelien pwa nnui gu mamiedung paaudung reu gage kai zie, nah Ih nnuide a ratasüt zie. 31 Ih nnui namdidung de tei ngkapdi zie nah nnui gu kereca bamdung tei ngkapdi zie. Ih nnui gu reca mapeudung perim kehengui de a sui ta dizie. 32 Ih nnui deu tei msia dizie. Nnui ngauraume cika lungh kebamme cide tei msia kedi ngau penui swa gah dizie. 33 Ih nnuide heleuhdung kakgage teizang gai zie, nah Ih a kingtie züt mpetlu zie nah nnui cai zui zie. Nnui deu ga migede lungh tadi zie, nah nnui gu namdidung ngkapdi zie.

34 Cipaucai nnui nnui ngauraume deu ga kebam dau nah hangdeube mta mrwa kebamtane pe sabbathdung mnei kehega bamzie. Cipau tingdau, hangdeu be mtak eh pe Sabbathdung mnei kehega bam zie. 35 Cide mta mrwa kebamtane, cide mtak bam zie, cide kemtak au nnui gu Sabbathdung benai ngau kemak mtak ge zie, nnui cika lungh kecu dau.

36 Nnui ngauraume deu ga bang kebamme de, Ih nnui mlungdung gage kengngi kaigai zie iciu eh tingkai gade manei gui kegai kwa kecangne de nnuide keheu dizie, nah kingtie dade kepak nzwa nnui pak zie. Nnui kau dizie, migede nnuide gwa meliede. 37 Nnui kingtie dade pak kela nzwa nnui hangge ge reu gage nrap mie zie, migede nnuide gwa swame liede. Nnui nnui ngauraume dwa ga saplu kera kengking kette bam lak. 38 Nnui heleuhdung kakgade tsaidi zie, nah nnui ngauraume deu ne nnuide ngkap zing dizie. 39 Nnui kakga bang kebamme de penui maudung gade kemta tei eh gah dizie, cika nnui ngauraume deudung gade, nah penui peime maudung ziemne penui liede kemta tei eh gah dizie.

40 Ciuliede magade penui penui maudung nah penui peime maudung pet lucai, nah penui ciemkesia cide a da samsanglu ta kedi de, nah acu renia eh tet kecude liede, 41 cide ne acu peu penui de renia nah Ih penui de penui ngauraume deu gage ngngwa gaibeu, magade penui gu hegeurumkemak mlungdung de henah mielu liecai, nah magade penui maudung ziemne saja kepeu de luulu cai, 42 cipau cai Ih agu samkak Jacob dage tei kelu, agu samkak Isaac dage tei kelu, nah agu samkak Abraham dage tei kelu, de nsung luzie; ci rünne ma, Ih hangdeu de de nsung luzie. 43 Hangdeube de penui ne gikedi teizie, cine cide penui kegah dau nzwa Sabbathdung ziune eh bam zie. Penui maudung püt pung zie kedanemene penuikatei ne a samdung luulu ta kedine nah agu hezaidung de ngau mneeu kedine. 44 Ma pelane ainzwa bam liede, penui ngauraume deu ga kebam dau, Ih penuide luu ta kedi teilak, mede Ih penuide ngau nhet eh penuide tei ngkap zing dilak nah agu samkak kelu de penui dade tei nggah dilak, kedanemene Ih RAMPAUBE penui Tinggwang. 45 Dede penui ziemne penui paumedung dage samkak kelu de nsung luzie, Ih ne heleuhdung miakngau gade Egypt deu gade ngngwa mpet kebeume. Cinzwa eh Ih penui Tinggwang lu kerane. Ih au RAMPAUBE."

46 Aipau ajadung de, sam kaikebeudung, nah hezaidung RAMPAUBE ne Israelme penai kakga Sinai Deutu gade Moses dade tei keludung.