1 Mi keheibe de RAMPAUBE dage mei reca pwa gwang kecu dau, pe reca cide neu tokkui teilu maisia, nah pa cipau gage maca rui gai zie nah perim kehengui cika ge kaizie. 2 Pa reca cide Aaron napeidung cingkumedung dage teu gwang beu zie, nah cika de cingkube ne neu tokkui tei kelube bazum kepuih ge keumpet zie maca nah perim kehenguibe de si eh. Cipaucai cingkube ne recabam gage teibeu delie kecu rehi gu reca ru gai zie. Cide au RAMPAUBE ziemne perim kehengui keyi ge peu zie; cide au mi gade pecu reca teikegai ge. 3 Mei reca kebang leune Aaron nah pe napeidung gu zie. Mi gade RAMPAUBE dage reca teikelu cide au RAMPAUBE dade mci süt.

4 Nang mimang gade keru cehi kaikemak reca pwapeu kecudau, cide tokkui ketei gu tangku kenieebe maca kericube maisia, mede tsehi kai kemak tangku ketakbe, cide maca kai kelube maisia. 5 Magade ngu mei reca de hegeu gu keru kwak kenpiak be gage ru cai, cide cehi kaikemak tokkui keteibe maca kai keri cube maisia. 6 Nang cide mzi pwa tei kecai luzie nah cipau reu gage maca rui gai lu. Aide mei reca ge. 7 Magade ngu mei reca cide keru kwak gage lang cai, cide tokkui keteibe nah maca le tei kelube maisia. 8 Nang mei reca aidungde le tei kelu RAMPAUBE da teugwang maisia, nah cide cingkube de pwa peuzie, pane cide recabam gage keugwang gaibeu zie. 9 Cipau cai cingkube mei reca gade kesa keulu zie delwe pelane reca rehi gade, nah pane cide recabam gage ru gai dizie. Cide au reca mi gade tei kebeu be zie, nah cide RAMPAUBE ziemne perim kehengui keyi ge peu zie. 10 Mei reca gade daipaidung banglu dibi cide Aaron nah pe napeimedung gu zie. RAMPAUBE dage reca mapeudung mi le teikelungdung au RAMPAUBE dade mci süt kecu ge.

11 Nnui RAMPAUBE de pwa kebeu reca mei kette tsehi le pwa teilak, kedanemene nnui tsehi ru lak, mede heliadui gade, RAMPAUBE dage reca mi gade tei kebeu nzwa. 12 Nnui cidung RAMPAUBE dage pe tsidung raitube kecu nzwa peuzie, dede cidungde recabam gage perim kehengui teigai lak. 13 Nnui nnui gu mei recadung gage mcai kailu. Nnui madau gede nnui Tinggwang gu kesamkak kelu cai de nnui gu mei reca gage kaita diso. Nnui gu recadung gage mcai si eh pwa peu lu.

14 Nnui RAMPAUBE dage mei luhlüt lu raitube reca pwa peu cai, mei cide mi le ru mnuo kelu nah pecai tau kelu taktyei peu lu. 15 Cipau cai nnui maca nah perim kehenguibe kai lu. Aide au mei reca. 16 Cipaucai cingkube ne tau kelu mei kesa ru zie nah maca de nah perim kehenguibe pelane keleu gade. Aide au RAMPAUBE dage reca mi le tei kegai ge.