1 RAMPAUBE Moses dage ranggai, 2 "Israelme dage aja aidungde kaigai eh mitaubung ga teu kerane olive ca yitube dap teu gwang lulo beu, iciu eh kebaa de ru jüja bam lu kerane. 3 Kehezu paiki gwale bie samkak ajadung dwa ga kebam, Aaron jüja eh, tinghegi gade tingcang kecang, RAMPAUBE dwa ga mitaubung ntau bam bi maisia. Hezai aide bammui zie n leuhme ceheu leune ga. 4 Cingku kedibe mitaubungdung mtau lwe RAMPAUBE dwa ga bam mui maisia, mitaubungdung mitaubung bam kecak yitube le ketei ga.

5 Nang tokkui keyibe keulu nah tangkukwak kereiehkena rulu. Cika Ephah zi kerei zi na tangku gega bam bi maisia. 6 Pecai nang ria na tei eh, ria ge ga herokrok, kecak yitube le ketei mabam reu RAMPAUBE dwaga. 7 Nang marim kehengui yitube tangkudung ria ge gage reca mding tei eh kai bi maisia. Marim kehengui aide RAMPAUBE ziemne ru gai zie. 8 Sabbath tingba ramsang cingku kedibe tangku pwa RAMPAUBE dwa ga kai mui maisia Israelme pelane mding gade, kelungta samkak kelu rehi ge tei eh. 9 Reca aide Aaron nah pe name ziemne zie, nah penui cide heni kemci ge gade tyei zie, cide RAMPAUBE dage mi le tei kelu reca qwa ge kecu ziemne."

10 Cu ainzwa di eh Israelme pui napei ge, pepei Egyptme ge, Israelme kakga mie di. Aipau Israelme pui napei de ramzeuki gade Israelme ge de ngngwa nggi di. 11 Israelme pui napei de RAMPAUBE zi rangmsia nah Tinggwang de reset di, cine minadung pecu Moses da ngngwa gwang. Pe pui zi Shelomith, Dibri napui, Dan leuh gade. 12 Penui pecu tui baangdi RAMPAUBE pekatei pe sui tei kera penui dage rangbeu kemaktane.

13 Pecai RAMPAUBE Moses dage ranggai, 14 "Tinggwang de reset kedibe de de ramzeuki gwale teu mpetlu. Mina siu kelume pelane penui ba pwa mina be peu gage kai, nah pecai kangbau kebam pelane pecu tangtsu le sam tset di maisia. 15 Nang Israelme dage rangsiak de eh rang maisia, ‘Keheibe de pe Tinggwang de reset kecume pekatei pe mau pung maisia. 16 Cauge RAMPAUBE zi rang msia la bi cipaube de teitset di bi maisia. Kangbau kebam pelane pecu tangtsu le sam tset di maisia, pa sangme mede Israelme deuketme ge liede. Mige RAMPAUBE zi rang msia la liecai, pecu teitset di maisia. 17 Magade mige mina teilung ge dap tset dicai, pecu teitset bi di maisia.✝ 18 Keheibe de mige kaune gede teitset dicai, pa cide su beu bi maisia, keringria ge kum keringria ge. 19 Magade mige pe kidabe de tei rezam dicai, cide pe dage de teigai maisia pa pe kidabe de tei kegai de nzwa: 20 rapang ge ziemne rapang, miak ge ziemne miak ge, gei ge ziemne gei ge. Pa migede rezam kedi ziemne, iciu eh pe dage de cinzwa eh teigai maisia. 21 Keheibe de makaune gede teitset kedibe cide su maisia, nah migede teitset kedibe de teitset di maisia. 22 Sangme nah Israelme deuketna hangna na ziemne hezaibe nzwakap lu, Ih RAMPAUBE nnui Tinggwang kecu ziemne.’" 23 Cine Moses Israelme dage rang kebeu, nah minadung mipei be de ramzeuki gwale ngngwa mpet lu, RAMPAUBE de reset kedibe de. Penui pecu tangtsudung le sam di. Israelme Moses dage RAMPAUBE aja kai kebeu de teicang lu.