1 Magade mikeheibe de kemau tei eh kedanemene pa ngau nah kesiube ha de pa ne rang beu kerabe de rang beu tadi cai, pa ne cide ngau mede cide siu kecube, pa cide pepüt zie. 2 Mede magade mikeheibe de Tinggwang ne mci melie kebeube keheibe de tung cai, cide renam kaune mcikemak ketsaibe mede kauruine ketsaibe keheibe, mede bwakela makaune, mige cide tung zie lie mene tungdi lie cai, pa au mci meda nah mau dida. 3 Mede magade pa mikang ge gu mci kemakbe tungdi cai, mci kemak keheibe de, nah magade pa cide ci mene bam cai, pa cide ci keludau pa mau kedi tei dizie. 4 Mede magade mikeheibe de sünne mene makesia tei kera pemui gade sampet gai cai, mede makeyi tei kera, keta keheibe cide mige sünne mene sampet kegai, pa cide ci mene bam liede, pa cide ci keludau, pa mau dizie, aipaudung keheibe ga. 5 Mikang ge ma aidung keheibe ga mau kedidau, pa tei kedi mau leune pa petdi maisia. 6 Cipaucai pa tei kedi mau de ziemne RAMPAUBE dage mau kedi reca teugwang maisia, kauruine hau gade makaune pepui ge, meurünna mede hemeu, kemau reca ziemne, nah cingkube ne pemau de ziemne kemaugi lu kera ta teigai zie.

7 Magade pa meurünna gede lui beu gailak cai, pa teimau kedi reca tei kera pe mau ziemne tamhau kena mede henah kebam ruipuine kena RAMPAUBE dage teugwang lubui, ket be kemau reca ziemne nah kedabe keru reca ziemne. 8 Pa cingkube dage teugwang maisia, pane ket be kemau reca ziemne peu rai gai zie, pane pe ngwang gade pe peu keriak dizie dede pepum gade keu mpet ciang dilak. 9 Cipaucai pane kemau reca gu pejai kesa recabam gu pembie gage kezin gaizie, nah pane pejai kebangbe pwa recabam pi gage rui gai dizie. Aide kemau reca ge zie. 10 Cipaucai pa nruina pekenabe le keru reca pwapeu maisia, mzui lulo kebeudung ga rang kebeu nzwa, nah cingkube ne pa tei kedi mau de pe ziemne kemau gilu kera ta tei gai zie, nah cipau de mau gi beu dizie.

11 Dede magade pa tamhau kena mede henah kebam ruipuine kena lui gailak dicai, pa pemau ziemne pegu ratak tei kera tokkui ephah kereizige kemau reca ziemne teugwang maisia. Pa maca kai lak mede perim kehengui keheibe cika ge kai lak, cide au kemau reca kecune.✝ 12 Pa ne cide cingkube dage teugwang zie, nah teibeu delie kecu reca gade cingkube ne cide bazum kepuih ge keu luzie nah cipau cai reca bam gage ru gaizie, RAMPAUBE ziemne mi le tei kelu recadung peureu gage. Aipau de kemau reca. 13 Cingkube ne mige keheibe kemau tei kedi ziemne kemau gilu kera ta teigai zie, nah cipau pei de mau gibeu dizie. Reca gade bang keludung au cingkube gu zie, mei reca de cinzwa zie."

14 Cipaucai RAMPAUBE Moses dage marang, rang eh, 15 "Magade mikeheibe RAMPAUBE gudung dage kemaudung nah samsang kemak tadung tei cai, dede cimezing eh tei dicai, pa RAMPAUBE dage pemau reca mapeu teugwang maisia. Aipau reca de au kauruine hau gade meurünseu ge zamra mezing kecube maisia; cipau mi de rangkang geu gade mdet zie, kemci bam gu rangkang gade, kemau reca ge nzwa. 16 Pa ma kemcibe keriangkeu gade tei mau kedibe ziemne RAMPAUBE mnung teibeu maisia, nah pa cide ga zi mengei gade zi ge kaisi maisia nah cide cingkube de peu zie. Cipau cai cingkube ne kemau reca mapeu gu meurünseu dele kemau gilu kera ta teigai zie pe ziemne, nah cipau pei mau de gibeu dizie.

17 Magade mikeheibe kemaudung tei nah RAMPAUBE ne tei helo aja kai kebeube keheibe de teicai, pa cide ci melie de, pa au mau dida nah pekatei pemau pung maisia. 18 Pa kauruine hau gade meurünseu zamra mezing cube ge teugwang maisia, cugu mi de gade, kemau reca ge nzwa cingkube dage. Cipaucai cingkube ne pa tei kedi mau de ziemne kemau gilu kera ta teigai zie pe ziemne, pa ci mene kebam cide, nah pemau gibeu dizie. 19 Cide au kemau reca mapeu ge, nah pa au RAMPAUBE dwa gade mau kesang dida."