1 RAMPAUBE Moses dage rang, pa rang eh cu, 2 "Israelme kangbau leune de resiu lu nah penuide rangbeu lu, ‘Nnui mci maisia, kedanemene Ih RAMPAUBE nnui Tinggwang au mcilu. 3 Keheibe de nnui pui nah nnui pei de herüt peu maisia, nah agu Sabbathdung mzailu maisia. Ih RAMPAUBE nnui Tinggwang. 4 Pemi kegah miedung da mreu diso, mede nnui katei ziemne heradung hegeu le teilak. Ih RAMPAUBE nnui Tinggwang.

5 Daidau nnui kereca ratak RAMPAUBE da tei beu labi cidau, nnui cide pwapeu kecu dau luulu kebui tei maisia. 6 Cide tyeilu maisia nnui pwa peu kebeu benai gage, mede pecia benai. Magade bang kecu tei eh lang cumne dicai, cide mi gage rudi maisia. 7 Magade cide langcum ne benai tyei kecu tei cai, cide mci kemak heteih ge dida; cide luu gai kelak ge, 8 nah keheibe de cide tyei kelume pe mau pungzie kedanemene pa tei hera dida RAMPAUBE da kemcide, nah cipau de de pe minadung dade teu ntsamdi maisia.

9 Nnui deu gade nnui luhlüt kecudau, nnui luh tudung gade luhlüt ciak lak, mede nnui luhlüt keludung pwa hekwa ciak lak. 10 Nnui kubetsidung nnui luh gade pwa hekwa ciak lak, mede kubetsi hangdeu gah nnui luh ga mhai kebamdung de pwa hekwa ciak lak. Nnui cidungde kegame nah sangme ziemne kaimzeu maisia. Ih RAMPAUBE nnui Tinggwang.

11 Rega so,

Nret so.

Hangge ge de cwa so.

12 A zi keu eh kenret sampet teiso nah nnui Tinggwang zi tei hera so. Ih au RAMPAUBE.✝

13 N kidabe de mneuso mede pegu rega tei so. Ziehi heta teikera qu kelube gu tingmui ziu ndabam kerabe ma mede pecia benai tingcang kecang.

14 Kwenpangme de reset so mede miakcitme dwa kekam kaiso. Meliene, nnui Tinggwang de hinglu maisia. Ih au RAMPAUBE.

15 Hetutiak kecu dau kenret so. Nnui keku kemneu teilak mige maga kecu ziemne pecu mneu lak, mede nnui keku mige de pwa ntsam lia lak pa mina kemlangme ge cune. Meliene, masang eh n kidabe tu tiaklu.

16 Nang ma rang msia eh minadung kakga rwa lak, dede n kidabe teilung kelilu ra peei lu. Ih au RAMPAUBE.

17 N sinabe de be mlung ga ngauraulak. Nang masang eh n kidabe de petau kemakbe kesiu lu kedanemene pe ziemne kemau nzi kelak ne.✝

18 Hekum peei so mede migede de n rata kecu bamso, dede meliene n kidabe de nkatei ncu keku nzwa kulu. Ih au RAMPAUBE.

19 Nnui a samdung kaimzeu zie.

Nnui kaunedung de hekaune leuh kedadung le peu lunghsi kera ciem teiso.

Maleuh kena kaincüt so n luh ta kecudau.

Hepai heni kai kecu dau hepainia ketsam kena le teikelube kailak.

20 Keheibe de kila pui ge pesam penah kera pet pwa kebam puide da zeu dicai, mede cipau puide de pemi su beuma mede pecu lungmpet beumene kebampui, pecu saja peu kerabe. Penai de teitsetti kerabe ma kedanemene pa mta kemakne.

21 Mige kemau ratak RAMPAUBE dage paiki kimui ga pwa gwang zie, kemau ratak tei kera ziemne hemeuseu ge. 22 Pecai cingkupei pe mding tei hemeuseu cide RAMPAUBE dwaga pemau reca tei zie, pa kemau tei kedidung ziemne. Iciu eh pa teimau kedi de pemau gibeu zie.

23 Nnui hangdeube ga gwang keludau nah cika tsingbang ketsamtsam petsi tyei kera ling keludau, pecai nnui cidungde tyei gailak lie kecu cilu. Matsi cidungde mmi kecum ziemne tyei gailak. Cidungde tyei kerabe ma. 24 Dede mmi pemdai bekum matsi cidung de mci dizie, ketwa ratak RAMPAUBE da teigai kecu ge. 25 Pe mengei bekum dau nnui matsi tyeilu bui, pebang cide petsi keeisi kera kwa kebam nzwa. Ih au RAMPAUBE nnui Tinggwang.

26 Heteihkang keheibe pejai pung kebamta tyeiso.

Rabedung dade gwang kera tingba ziemne keteu so, nah hera kengkieng teu kedame de n kang gage kaikera peei so.

27 Nnui peu tam mbie kena de tai twagwa diso mede nnui tangkei mai tün tai diso.

28 Ketsaime ziemne nnui pum tei rezam so mede nnui pum gage mamie giak gailak. Ih au RAMPAUBE.

29 N napuide helipui ge tei eh tei hengam teiso, mecai deudi be helipui tei dizie nah hangdeu ga kenlien pui dizie

30 Nang agu Sabbathdung kainzeu zie nah a bam kerecaki ga kebamde de herüt peuzie. Ih au RAMPAUBE.

31 Ketsaime de mede rabedung de resiu kecume da nnui mie so. Penuide peei mpet so, mecai penui nnuide teihera dizie. Ih au RAMPAUBE nnui Tinggwang.

32 Nang pepeu kepu medwa sap eh herüt peu kerabe nah penui kebam dau herüt peu lu. Nang n Tinggwang de hinglu. Ih au RAMPAUBE.✝

33 Magade sangme ge nnui deu ga nnui da lungh bam cai, nnui pe dage matei mau gai so. 34 Sangme nnui de ngngwa lungh kebamde Israel deuketna nnui ngngwa lungh kebam nzwa kerabe, nah nkatei ncu keku nzwa pecu kulu, kedanemene nnui sangme tei eh Egyptme deu ga lungh. Ih au RAMPAUBE nnui Tinggwang.

35 Ma ndet kecu dau masang kemak teiso, petie, perüt, mede pepum pei kecu dau. 36 Nang kemdet nia petaube keulu, perüt petau, ephah petaube, nah hin petaube. Ih RAMPAUBE nnui Tinggwang, nnuide Egyptme deu gade ngngwa mpet kebeube. 37 Nnui a tutiakdung nah a zaidung mzai maisia, nah cidungde tei maisia. Ih au RAMPAUBE.’"