1 RAMPAUBE Moses dage marang eh: 2 "Israelme dage rang beu lo, delwe penui dage ranglo, ‘Aidungde RAMPAUBE ziemne kedet kelu ngyidung, cide nnui nkwakelu kemci ngkwa gelie kecu paubeu bi maisia; cidungde a gu hengyi teila kerabedung.

3 Nnui lang herokne bata tei lubui, dede lang henane au Sabbath benai mtak zing zie, kemci kangbau ge. Nnui bata gede teilak kedanemene nnui lungh kela bam leune ga cide RAMPAUBE gu Sabbath ge lu.

4 Aidungde RAMPAUBE kedet kelu ngyi, kemci kangbau ge nnui riet kelu tingdung de gage reci bi maisia: 5 Hekei raitube kei, ziangreiemdai benai tingnaimiak nlüt kedi gade, RAMPAUBE kahkegwang ngyi. 6 Cipau kei ziangreiemengei benai au RAMPAUBE ziemne Cehi Kaikemak Tangku ngyi zie. Lang henane ziemne cehi kai kemak tangku de nnui tyei zie. 7 Tingbazie raitu benai nnuide kai ntsam lu nah ngkwa zie; nnui tei bam kela ta kette teilak. 8 Nnui taktyei reca RAMPAUBE de lang henane ziemne peuzie. Lang henane benai RAMPAUBE ziemne kangbau ge kai ntsam zie, nah cipau nai nnui tei bam kela ta kette tei lak.’"

9 RAMPAUBE Moses dage ranggai, 10 "Israelme nadung dage rang beulo, ‘Ih nnuide peu zielie kebam deuga gwang kelu dau, nah nnui pe meitsi rum kelu dau, nnui bui kelu raitube mei kiep ge teugwang cingkupei de peu bi maisia. 11 Pa meikwa pwa cuh lwe RAMPAUBE dwaga teugwang zie nah pecu mapeu peu zie, cide n keleu gade luulu zie. Cipau tingba Sabbath cai ne cingkupei pwa cuh lwe acu mapeu peu zie. 12 Meikwa nnui acu pwa kepeu benai, nnui mmi ge kedi meurün seuna jamra kemakbe lepwa RAMPAUBE de keru ratak tei beulu. 13 Meibui reca pwa ephah zi kerei gade zi na haikelu tokkui keyibe gage maca kerui ncüt kelu, pwa keru ratak teilwe RAMPAUBE de peulu, perim hengui lu kerane, nah zau reca si eh, hin zi mdai kai si eh. 14 Nnui tangku tyei so bi, mede hetaa kelube mede mei keheibe de, nnui Tinggwang da reca cipaunai teugwang kemaktane. Hezai aide nnui leuhme ceheu ting leune ga mzai la zie, nnui lungh kela leune ga.

15 Sabbath cai raitu benai, cide nnui meikwa ge kezin reca ziemne teugwang kebeu benai, mtakkak hena pei cang siak lu. 16 Nnui zie riakngei pei bi lu, Sabbath pe hena cai benai. Cipau cai nnui RAMPAUBE de mei reca keheci peu bi kerabe. 17 Nnui ki gade tangku kena ephah zi kerei zi na tei kelu gade. Tangku tokkui keyibe nah tsehi kailwe ru zie; cidungde meitsi raitube pwa kezin reca tei pwa RAMPAUBE de peu zie. 18 Nnui meurünna hena mmi ge kedi zamra kemak ge peu maisia, hetumseu nage, nah hemeu seu kena. Cidungde RAMPAUBE de keru ratak tei gai beu zie, mei reca nah zau reca de si eh, mi le tei kelu reca ge nah RAMPAUBE ziemne perim kehengui keyi ge peu kela reca ge. 19 Nnui hemeu seu ge kemau reca ziemne peu maisia, nah meurün seu kena mmi ge kedi ge le ratak teilu, kekangbau recadung tei eh. 20 Cidungde nah meitsi raitube de si eh cingkupei kezit reca teipwa RAMPAUBE dage peu kerabe, nah meurünna kena de si eh cidungde ratak tei gai beu kerabe. Cidungde RAMPAUBE dage tei kegai kemci ratak cingkupei ziemne. 21 Cipau nai de gage nnui sa mdu gai beu maisia. Cika kemci kangbau ge bam zie, nah nnui teibam kela ta gede tei kerabe ma. Hezai aide bammui kera ge nnui name ceheu pelane ga mzaila zie nnui lungh kela leune ga.

22 Nang n deu ga luhlüt kecu dau, nang luukungdung gade nang meibang rum ciak di kerabe ma, nah nang zangra kedi be mie hekwa dai kera be ma. Nang cide kegame nah sangme ziemne gi dilu. Ih RAMPAUBE nnui Tinggwang.’"

23 RAMPAUBE Moses dage ranggai, 24 "Israelmedung dage rang beu lo, ‘Kei hena bekei, Cipau kei raitube nai nnui ziemne mtak zing zie, teluidung kwa kensung ge tei eh, nah kemci kangbau ge tei zie. 25 Nnui teibam kela ta kette teilak, nah nnui RAMPAUBE dage mi ne tei kelu ratak ge teigai maisia.’"

26 Pecai RAMPAUBE Moses dage ranggai, 27 "Cu kei hena ziangrei benai au Kemaugi kebeu Tingba. Cide kemci kangbau ge kera be, nah nnui katei nnuide tei hena bi lu nah RAMPAUBE dage mi le ratak tei beulu. 28 Nnui cipau nai heta gede tei kerabe ma kedanemene cide Kemaugi kebeu Tingba lu, nnuikatei nnuide tei mci lu kerabe RAMPAUBE nnui Tinggwang dwa gade. 29 Keheibe de cipaunai pekatei pecu tei henalu kemakme de pe minadung kakgade gwagi dizie. 30 Mina keheibe de cipaunai heta kehei gede tei liecai, Ih, RAMPAUBE, pe mina kakgade pecu ngkap dizie. 31 Nnui cipaunai heta keheibe de teilak. Hezai aide n leuhme ceheu lungh kela heni leune ga mzuila mui kera ge. 32 Aipau nai nnui Sabbath tingba mtak zing kecu nai ge zie, nah cipau kei lang hekuine benai tinghegi tingdau nnuikatei nnuide tei hena lu maisia. Tinghegi gade tinghegi kecang nnui gu Sabbath mnei zie."

33 RAMPAUBE Moses dage ranggai, 34 "Israelme dage rang beulo, ‘Kei hena bekei ziangreimengei benai RAMPAUBE ziemne Kemsiukidung Ngyi ge zie. Cide lang hena ne ge ziemne zie. 35 Tingba zie raitube nai kemci kangbau ge bam bi maisia, cipau nai nnui tei bam kela heta kette tei kerabe ma. 36 Lang hena ne ziemne nnui mi le tei kelu ratak RAMPAUBE dage peu bi maisia. Lang heset ne benai kemci kangbau ge bam bi maisia, nah nnui RAMPAUBE dage mi le tei kelu ratak peu bi maisia. Aide au kemlang kangbau ge, nah nnui tei bam kela heta kette teilak.✝

37 Aidungde RAMPAUBE ne nlumkebeu ngyidung, nnui kemci kangbaudung RAMPAUBE dage mi le tei kelu ratak lie eh sah gai beu maisia, keru reca nah mei reca, ratak nah kesak recadung, cidungde petingba rip dau teigai lu. 38 Hengyi aidungde RAMPAUBE gu Sabbath gage kaisi kelu be nah nnui mapeudung, nnui sampetdung pelane, nah nnui gu suiyi mapeu recadung RAMPAUBE de nnui peu kela pelane.

39 Kemsiukidung Ngyi de ziemne liecai, kei hena ziangreimengei benai, nnui hangdeube gade matsidung hekwa kelu dau, RAMPAUBE gu hengyi aide lang henane ge ziemne nnui kainzeu bi maisia. Tingbazie raitu benai mtak zing kecu ge zie, nah lang hesetne benai liede mtak zing kecu ge zie. 40 Raitube nai nnui tsingbangdung gade pe tsi yitube keu maisia, laira bang kiakdung, nah tsingbang kedibe tsingrangdung, nah reuna ki ga mabangnadung, nah RAMPAUBE nnui Tinggwang dwa ga lang hena ne nnui suiyi zie. 41 Mmi ramsang lang henane, nnui RAMPAUBE ziemne aipau ngyi de hengyi maisia. Nnui lungh kela heni leune ga nnui leuhme ceheudung ziemne hezai aide bammui zie. Nnui aipau ngyi de kei hena bekei hengyi la maisia. 42 Nnui kemsiuki keceuna ga lang henane lungh bi maisia. Israelme deuketna pelane kemsiukidung keceuna ga lang henane ziemne lungh bi maisia, 43 ciude nnui leuhme, ceheu ge cai ceheu ge, Ih dainzwa eh Israelmena de peu ci kenzwa kemsiukidung ga lungh bi kecu nnui cilu zie Ih penui de Egyptme deu gade mzang kempet dau. I RAMPAUBE nnui Tinggwang.’" 44 Ainzwa eh, Moses Israelme dage RAMPAUBE kedetkelu ngyidung de ndu gaibeu.