1 RAMPAUBE Moses dage Mount Sinai gade ranggai, 2 "Israelme dage rangbeu lo, ‘Ih nnuide kepeu deu de ga kegwang dau, ciude hangdeu cide ga RAMPAUBE ziemne Sabbath kai nzeu lu. 3 Nang n luh ga mmi herok ziemne ma ling zie nah mmi herok ziemne nang ngu kubetsi tei ki zie nah tei kelubedung hekwa lu zie. 4 Dede mmi hena bekum, hangdeube ziemne mtak zing kecu Sabbath mnei zie, Sabbath cide RAMPAUBE ziemne. Nang n luh ga ma ling mede n kubetsi tei ki de lak. 5 Nang n luh ga makeheibe pekatei lungh kelubedung de luhlüt kerabe ma, nah kubetsibang kidi kemak ga kebamdung de luhlüt kera tei kerabe ma. Aipau bekum de au hangdeu ziemne mting süt eh mtak zie. 6 Heta teigaikemak hangdeube Sabbath bekum de makeheibe de kelungbedung n taktyei zie. Nang, ngu kilabaangme peidung nah ngu kilabaangme puidung, nang liiteu kela kilamedung nah sangmedung n da kelunghme taktyei hekwa lubui, 7 nah n kauruine nah renaam kaunedung hangdeu gade ngau keludung keheibe de tyei lubui.

8 Sabbath mmi hena kecu pia hena peilu, pelane ge mmi riakdaiehekui. 9 Cipaucai kei hena bekei ziangrei benai nang telui kwa maisia. Tei kemci Ratak tingba benai nang hangdeu pelane ga telui kwa gai maisia. 10 Nnui mmi riakngei bekum RAMPAUBE ziemne teu ntsam lu nah hangdeu ga kelungme de lungmpet kebeu sa gai zie. Cide n ziemne Jubilee ge zie, nah nnui hangge ge kecu nnui deu ga cailigwang daizie, nah nnui nnui kilung kelak da gwang dai dizie. 11 Mmi riakngei bekum cide n ziemne Jubilee ge zie. Nang ma ling lak mede luhlüt lak. Pekatei lungh pet kelu de tyei lu, nah kubetsi ki di kemak bang gade hekwa lu. 12 Kedanemene cide Jubilee ge, nnui ziemne kemci ge zie lu. Nnui luhdung ga pekatei lungh kebeube tyei zie.

13 Jubilee bekum nang mikeheibe gu hema pwa caili beu dai di maisia.

14 Nang magade n kidabe dage hangdeu zwa mede n kidabe dade lui lwe bam cai, nnui hangge ge de cwa mede matei mau gai kerabe ma. 15 Nang magade n kidabe dade hangdeu lui cai, gwang dai kela Jubilee kecang mmi dai kiee ge nah mei dai kiee ge luhlüt lubui bi cet mting gailu. N kidabe hangdeu zwa kebambe liede cide cet mting kerabe. 16 Jubilee gwang dai kera tingkum kekiee ge bamreu cai hangdeu pemi hung kiee ki zie, nah gwang dai kela Jubilee tingkum kecam nage rünne dicai pemi cam zie, kedanemene pempau kehecibe ziemne hangdeu gade luhlüt ngaulu kela de au pecia be Jubilee dwa ga pe tingkumdung kiee ge de keriangkeu kecune. 17 Nang migede de cwa so mede hangge ge dage matei mau gai so; cinzwa meliene, nang n Tinggwang de herüt peu maisia, kedanemene Ih au RAMPAUBE n Tinggwang lu.

18 Ciziemne nnui a samdung mzai maisia, a zaidung kai nzeu lu, nah tei mzailu. Ciude cipau deu de kwak eh lungh lu zie. 19 Hangdeu cide mei bui beu zie, nah nnui tyei nggei luzie nah nnui cika kwak eh lungh luzie. 20 Dede nnui ainzwa eh rangcai, "Magade anui maling mede luhlüt hekwa mecai mmi pe henai bekum anui daipai tyei lai." 21 Ih mmi pe herok bekum nnui peu reuga samlam beu kera aja kai beu zie, nah mmi kecum ziemne tyeilu kebui luhlüt luzie. 22 Nnui mmi pe heset bekum maling zie nah pedwa bekum ngau keludung gade nah mei hekwa kelu bedung gade tyei jüja luzie. Mmi pe hekui bekum gu luhlüt nlwet lu kemak kecang, nnui pedwa bekum hekwa kelubedung gade tyei lubui.

23 Hangdeu cide pempau kehecime de zwasang zwa diso kedenamene hangdeu cide agu lu. Nnui pelane au sangme nah tingkak nage ziemne acu ngngwa a deu ga lungh bam. 24 Nnui hangdeu pelane gum keludung de pe mpaube ngau dai lu kera mzeu de pie lu maisia; nnui hangdeu lui kelu de peu penui kilungmedung de peu caili dai di kerabe. 25 Magade Israelme n zangme magah di eh pe mabam kesa zwa liecai, iciucai pe kibaume kemname gwang eh ncu zwa kebeu cide lui dai luzie. 26 Magade mipei ge pe mabam ribeu kera pe kibaume gah cai, dede magade pa lungh yi eh cide rilu bui liecai, 27 ciude pa hangdeu zwa kedi ting gade pe mmi cet reheu gwang zie nah pe kebangbe pa zwa kedi pei de peu dai zie. Cipaucai pa pekatei pe deu ga cailigwang dai dizie. 28 Dede magade pa pekatei ziemne hangdeu ngau caili dai lu mai, pa hangdeu zwa kedi de lui kelube ne pempau tei eh bam dizie Jubilee mmi gwang kemaktane. Jubilee bekum, hangdeu de zwa kebeube da cailigwang dizie, nah pempau kesangbe de pe deu ga cailigwang dizie.

29 Magade mige rie kelu namdi ga kebam ki ge zwa dicai, ciucai pa zwa kedi de mmi ge lung gage lui caili dai lubui. Tingkum ge ting kakga pa lui keli dai lubui. 30 Magade pe mmi lungga ge ki cide ri dailu melie cai, ciude rie kelu namdi ga kebam ki de lui kelube nah pe leuhmedung gu kelungta tei dizie. Jubilee bekum cide peu caili dai lak. 31 Dede renam ga kidung heriedung tei twagwa mene bam cai cidungde de hangdeu gu luhdung lie eh cet luzie. Cidungde ri lubui, nah cidungde Jubilee bekum keu caili beu maisia. 32 Dede, Levime penui namdidung penui ki kebam dung au kehei dau de ri lubui. 33 Magade Levime ge pa zwa kedi ki de rilu melie cai, namdi ga kebam ki de zwa kedi de Jubilee bekum peu caili dai di maisia, kedanemene Levime namdi gu kidung de Israelme kakgade au penui mabam lu. 34 Dede luhdung penuide twagwa kebam namdidung de zwa me lubui kedanemene cidungde au Levime gu kelunghta mabam ge lu.

35 Magade n leuhmedung ma gah dicai, iciu eh pekatei pecu pie rengei gailak di, ciucai nang pecu ngha maisia nang sangme mede hegwame mi keheibe nnui kakga lungh kebam mede ngha beu kela nzwa. 36 Pe dade pekai dung kie so mede keheibe gade pe dade mmi tyei so, dede n Tinggwang de hetwa peulu iciu eh n sinabe de ngngwa lungh bamlu kerane. 37 Nang pecu rangkang releu gai beu eh pe dade pekai kie kerabe ma, mede pe dade n taktyei zwa eh mmi tyei so. 38 Ih RAMPAUBE nnui Tinggwang, Egyptme deu gade ngngwa mpet kebeube, Ih nnuide Canaan deu de ha lu kerane, nah Ih nnui Tinggwang tei lu kerane.

39 Magade n leuhmedung magah di nah pekatei pecu n dage zwa beu cai, nang pecu hebaangme ge nzwa peu makam tei kerabe ma. 40 Pecu kilabe ge de li teu kela ge nzwa tei lu. Pa ntai ga kaknage lungh kebambe ge nzwa zie. Pa Jubilee bekum gwang cang dai kemaktane nggwa tei bam zie. 41 Cipaucai pa n dade tet dizie, pa nah pe napeimedung pecu ngngwa eh, nah pa pe kilungme da cailigwang dai dizie nah pe peimedung mabam ga. 42 Kedanemene penui agu kilamedung Ih Egypt gade ngngwa mpet kelume. Penuide hebaangme ge nzwa zwa dau lak. 43 Nang penui dade nzai sia kerabe ma, dede nang n Tinggwang de herüt peu kerabe. 44 N ziemne hebaangmepei nah hebaangme puidung au ncu twagwapung eh n taiga lungh kebam leuhmedung dade ngau lubui, nang penui dade hebaangme lui lubui. 45 Nnui kakga lungh kebam sangmedung da de de nnui hebaangme lui lubui, cide cai penui kilungme nnui tai ga lungh kebamme, henamedung nnui deu gade mna kelumedung. Penuide ngu mabam teidi lubui. 46 Nnui cikenzwa hebaangmedung de nnui cia de nnui namedung de mapwa ge tei eh peu lubui, mabam ge nzwa kai nzeu eh, nah penuide penui teilunghzie pelane hebaangme tei eh, dede nang Israelme kakgade n siname reu kengking teu n zaisia kerabe ma.

47 Magade sangme ge mede mige n taiga tingkak nage lungh kebamme ge mahei di, nah magade Israelme n zangme ge magah di eh pekatei pecu sangme mahei kedi pei dage, mede sangme kilungme ge dage zwa dicai, 48 Israelme n zangme gede ngngwa gwang kelu cai, pecu ngngwa cailigwang daidi lubui. Mige pe kilungme kak de pecu ribeu lubui. 49 Cipau pei de pau lubui, mede pe pau napei, pecu rilu kerame, mede pe kilungme kak de kemname. Mede, pa magade lungh yi dicai, pa pekatei pecu ri lubui. 50 Pa pecu lui kelube dade kelilia maisia; lui kelube dade pa pe mmi pei maisia pekatei pecu zwa kedi bekum gade Jubilee bekum kecang. Liiteu kela kilabe dage zwa kebeu mi de gade rikelube mi de riem beu maisia, pa pecu zwa kebeu ziemne mmi dai kiee ge makam tei bam maisia bi kecu gade. 51 Magade Jubilee mmi cang kera mmi kekiee ge bam si reu cai, rangkang le pecu rilu kera ziemne cipau mmidung kiee ge nsam gade pa lui kelu mi de peu caili beu maisia. 52 Magade Jubilee tingkum ziemne mmi kecam nage gwale gah dicai, Jubilee mmi de gwang cang kemak dwa pe mmi kebangdung de pie eh pa pecu lui kelube dade kelilia maisia, nah cipau mmidung pie eh pa pecu rilu kera mi de peu maisia. 53 Pecu au tingkum ge cai tingkum ge liiteu kelame ge de nzwa teu zie. Nang pecu n zaisia eh teu lak lie kecu de ci bi lu maisia. 54 Magade pecu ainzwa eh lungmpet lu mecai, ciucai pa peciabe Jubilee tingkum kecang pe gwa tei kerabe, pa nah pe namedung de si eh. 55 A ziemne au Israelme dung au kilamedung. Penui au a kilame Ih ne Egyptme deu gade nzang mpet kelumedung. Ih au RAMPAUBE nnui Tinggwang.’"