1 RAMPAUBE Aaron na kena penai RAMPAUBE da gwang nna kecu dau penai tsai kedi caine Moses dage maranggai. 2 RAMPAUBE Moses dage ranggai, "N sinabe Aaron dage rangbeu lo, pecu keheidau heni mcitu kehezupai kai kebam lungga lüt helo de, samkak bung gum taiga pa lüt cai pa tsai zie, kedanemene Ih hemwa gade samkak bung gum reu gade acu pwalia zielu. 3 Cine Aaron ainzwa heni mcitu ga lüt zie. Pa kemau reca ziemne hetumseu ge nah keru ratak ziemne meurünseu ge teugwang zie. 4 Pa kemci langcimpai cwatie de kailu maisia, nah helungnia langcimpai le tei kelu teulu maisia, nah pa langcimpai le tei kelu kiakang nah langcimpai le tei kelu peuzui teulu maisia. Aidungde kemci paihenidung da. Pa pe pum dui le pialu maisia nah mania aidungde le pekatei pecu mteilu maisia. 5 Pa Israelme gwang kangbau kebamme dade kemau reca ziemne hemeuseu kena nah keru ratak ziemne meurünseu ge keu zie.

6 Pecai Aaron pemau nah kilungme mau keu gidilu kerane pekatei ziemne hetumseu pwa kemau reca tei beu maisia. 7 Pecai pa hemeu kena de teu delwe cide RAMPAUBE kebam paiki kimui ga gwang maisia. 8 Ipaucai Aaron dacak zie, hemeu kena teu eh, dacak ket cai RAMPAUBE ziemne, nah kedabe dacak de cai kemaupung kera ziemne. 9 Aaron dacak eh hemeu RAMPAUBE ziemne teu gwang beu zie, nah aide pwa kemau reca tei beu zie. 10 Iciude hemeu hemaupung kera dacak eh kedetkelu de RAMPAUBE dwa de ring eh keugwang lu maisia, hetaideu gage hemaupung kela nzwa langgi eh teimci lu kerane.

11 Ipaucai Aaron hetumseu kemau reca ziemne, pekatei ziemne keu gwang zie. Pa hetumseu de teitset zie pekatei pe ziemne nah pe kilungme ziemne pwa kemau ratak tei zie. 12 Aaron miceu heu sütkebam mikwak ge RAMPAUBE kebam recabam gade, perim kehengui keyi bazum kepui ge, ma cidungde teu kehezupai lung ga lüt zie.✝ 13 Cika RAMPAUBE kebam gade pa mi gage kehengui de kai zie, nah kehengui mika dene samkak bung gum de kebailu zie. Pa ainzwa tei zie iciu eh pa tsai di melu kerane. 14 Pa hetumseu jai kesa pwa lwe pe zurang le teu pegum dwaga ge kezin gai zie delwe pe zurang le cide kesa samkak bung dwa gage pia hena kezin gai zie.

15 Pecai, pe minadung ziemne kemau reca de ziemne hemeu de daptsetlu zie, pe jai heni mcitu ga teugwang, delwe cide pegum gage kezingai nah pecai de samkak bung dwa gage, pa hetum jai pwa kezingai kecu nzwa cika pa jai le tei maisia. 16 Ainzwa eh pa Israelme mcikemak nah penui mau pekiene gade heni mcitu de tei mci eh renet tei zie. Pa aide paiki de gade teigai maisia, RAMPAUBE penui kakga kebam bam ga, penui mcikemakme dwa gade. 17 Aaron teikemci renet tei kera heni mcitu ga lüt kedi ting gade pa mpet dai kemaktane, migede paiki ga bam lak. Pa pe ziemne, pe kilungme, nah Israelme kangbau kebam peciakne ziemne. 18 Pa keru ratak ziemne recabam ga mpet lwe cide RAMPAUBE dwa gage teimcilu maisia, pa hetumseu jai nah hemeu jai kesa pwa twagwa kebam recabam kimiakdung gage kai maisia. 19 Pe zurang le pa hejai kesa recabam gage pia hena kezingai maisia. Ainzwa eh pa Israelme mcikemak gade cide tei mci di maisia.

20 Pa heni mcitu de tei kemci ta teicang kelu cai, kengkwa paiki, nah recabam de, pa hemeu kering de keugwang nna maisia. 21 Aaron peba kena hemeu peu gage kailu eh cipau peu gage kemau teikedi pelane, kemaudung, nah Israelme tei maukedidung ranggai zie. Ciu eh cidungde hemeu peu gage kai mpet dizie. Delwe mige de kedet pwa kebam ge de peu hemeu de hetaideu gage gwa gaidi zie.✝ 22 Hemeu de penui pekiene mau pung eh mina lungh kemak deu ga miedi zie, mina be hemeu de hetaideu gage lungmpet gai beudi maisia.

23 Pecai Aaron paikiga lüt lu zie, langcim painidung pa heni kemci ga kelüt dwa ba kelu de ra mpetdi zie, delwe pa cidungde cikage kaidi zie. 24 Pa heni kemci gade duipia lwe pekatei pe paini kailu maisia. Pecai, pa pemau nah minadung mau keu gidilu kerane ainzwa eh keru ratak teigai maisia. 25 Pa kemau reca ziemne recabam gage makaune ca de rugai maisia. 26 Mina be cau hetaideu gage kemau kepung meu de gwa gigai kebeube de pa ramzeuki ga caili kegwang dwa pe paini hetadi nah dui piadi maisia. 27 Kemau reca ziemne hetumseu nah hemeu de, penai jai heni mcitu ga kemau keu gidi kerane teukegwang de, ramzeuki gwale pung mie rudi maisia, pegeu, peteih, nah pe teudung rudi zie. 28 Mina be cide ru kecube pa ramzeuki ga caili kegwang dwa pe paini hetadi nah dui piadi maisia.

29 Hezai aide nnui ziemne zie iciu eh kei hena bekei, ziangrei benai Israelme nah sangme penui kakga kelunghme nnuide tei henalu maisia nah mata teilak, deuketna mede sangme nnui da kelunghme. 30 Cipau nai penui mau gade penuide tei mcilu kerane renet tei zie, ciciu eh penui RAMPAUBE dwa gade renet gade mcilu zie. 31 Cipau naide kemtak tingba mci süt kecu ge zie, nah nnuikatei nnuide tei henalu maisia nah matah teilak. Aide nnui ziemne hezai ge tei bammui zie. 32 Cingku kedibe, pe pei bamh leu kera caude kedet lubi, nah teimci kelube, pa teikemci renet de tei zie. Pa langcimpai teu zie, cide kemci paini. 33 Delwe heni mcitu de, kangbau paiki, recabam, nah cingkume, nah mina kangbau kebam peciakne de tei mci maisia. 34 Hezai aidungde nnui ziemne hezai ge tei bammui zie. Israelme de penui mau leune gade tei mcilu kerane mmi ge gade piage tei zie." Cine RAMPAUBE rangkebeu nzwa eh Moses aidungde teilu.