1 Magade mige ratak tei eh makaune gu reca cide hetum hau gade pwapeu cai, peseu mede pepui liede, pa makaune cide zamra mezing cube RAMPAUBE dwa gage pwapeu maisia. 2 Pa pe ba hwapwa pe gu reca gu pepeu gage kai zie nah cide kangbau kebam paikigu kilam gage teitset zie. Cipau cai Aaron napeidung nah cingkumedung ne pejai recabam gu pe mbiedung gage kezin gai zie. 3 Mipei ge ne kangbau reca gu ratak mi le RAMPAUBE peugai zie. Peca le gum pwa kebam mede pelungnia gage keriangkeu pwa kebam de, 4 nah penkeu kena nah pekia ga peca pung kebamdung; nah pe nceu, pe nkeudung si eh, pa cidung pelane keugi dizie. 5 Aaron napeidung cidungde recabam gage keru reca si eh ru gai zie, tsing mi ga kebam gage. Cide ne perim kehengui keyi RAMPAUBE de peu zie; cide au reca mi gade pe dage tei kegai ge.

6 Magade mipei ge gu ratak kekangbau reca de RAMPAUBE dage tei kecude meurün hau gade, peseu mede pepui cai; pa zamra mezing kecube le ratak teibeu maisia. 7 Magade pa meurünna pe ratak ziemne pwapeu cai, pa cide RAMPAUBE dwa gage pwapeu maisia. 8 Pa peba hwapwa pe ratak tei kera peu gage kai luzie nah cide de kangbau kebam paiki dwa gade teitset luzie. Cipaucai Aaron napeidung ne pezai recabam mbiedung gage kezin gai zie. 9 Mipei ge ne kekangbau mapeudung ratak cide RAMPAUBE dage reca mi gade tei kelu peu gai zie. Peca, pemih ca pecingpuira gade dang kelu pelane, nah peca pe lungnetdung kau pwa kebam de nah peca pelane pe lungnetdung taiga kebam de. 10 Nah penkeu kena nah peca cidungde ga kebamdung pekia ga kebam de, nah pe nceu, penkeu cidung si eh, pa cidung pelane keumpet dizie. 11 Cipau cai cingkube ne cidung pelane reca bam gage rugai zie RAMPAUBE dage taktyei keru reca ge nzwa.

12 Magade mipei ge gu reca mapeu hemeu cai, iciucai RAMPAUBE dwa gage cide pwapeu zie. 13 Pa peba hwapwa hemeu gu pepeu gage kai luzie nah cide de kangbau kebam paiki dwa gage teitset luzie. Cipaucai Aaron napeidung ne reca bam gu pe mbiedung gage pezai kezin gai zie. 14 Mipei ge ne mi gage teikelu pegu reca RAMPAUBE dage pwapeu gai zie. Pa peca pe lungnetdung gage kai kebam dung keugi dizie, nah peca pelane pe lungnetdung taiga kebamdung de. 15 Pa ne penkeu kenana de keumpet dizie nah cidungde ga peca kebam cide au pekia ga kebam be, nah penceu delwe pe nkeudung si eh. 16 Cingkube ne cidung pelane keru taktyei reca tei eh recabam gage ru gai zie, perim kehengui keyi peu kerane. Peca pelane RAMPAUBE gu zie. 17 Cide au n minadung da hezai lamui zie ceheu ge cai ceheu gega mnei zie, nnui kelungh leune ga, cide nnui peca mede hejai tyei lak.’"