1 RAMPAUBE Moses penai Aaron dage rang eh, pa rang eh cu, 2 "Keheidau de keheibe liede pepum geu ga mmadi, mede ncak di mede pe sau tei eh reba di nah cidung jam teei di liecai nah pe geu mateei pe pum ga bam di liecai, iciu dicai pecu nzang cingkupei kedibe Aaron mede cingkupei napeime da nzang gwang beulu. 3 Pecai cingkupei pegeu mateei de pie luzie. Magade keteijam ga pemai ha dicai nah mateei de pe geu ga rünne mene ci swade cok bam kecu nzwa cai, iciu dicai cide lielu kera mateei ge dida. Cingkupei pecu pie kelu cai, pa au mci melie de beu dizie. 4 Magade reba kebam geu de ha liecai, nah ngau kegai pegeu swa cok lüt si meliecai, nah keteei jam de ga pemai ha di meliecai, cingkupei pecu lang henane keu ntsam dizie. 5 Lang henane benai, cingkupei pecu pie dai eh pe kecet gade pe mateei sia swa di meliecai, nah pe pum kedale liegwang di meliecai, iciude meliecai, cingkupei pecu peu lang henane ntsam dai bam dai zie. 6 Cingkupei pecu lang henane benai pecu ncet dai delwe pe mateei de yi reu reu pegeu keda le teei za gwang di me mi kecu pie zie, magade iciu me lie cai, cingkupei pecu mci di delie rang beuzie. Pejam sung delwe teei lie cai, pa pe pai nia heta di maisia iciu lu cai pa mci dizie. 7 Dede magade cingkupei pejam tei mci kera ncet pie kelu cai pejam sung kebam dung pegeu kedale liegwang di liecai, pecu peu cingkupei dage keu lia dai beu maisia. 8 Cingkupei pejam sung kebamdung pegeu keda le liegwang di mi mebi ncet pie zie, magade pegeu keda le liegwang di liecai cingkupei mci melie de beu zie. Aide au lie kerabe mateei ge dida.

9 Mige lie kela migeu mateei bam di liecai, pecu ngngwa cingkube da gwanglu maisia. 10 Cingkube pecu ncet pie delwe pegeu ga harei eh sung bam liecai, pe maidung ha dicai, mede sung bam kecu ga teihring bam dicai. 11 Cinzwa bam di liecai aide au migeu mateei kecok ge dida nah cingkube pecu mci medelie beu maisia. Pecu keu ntsam swa dilak kedanemene pa au mci mene bam di delu 12 Magade pegeudung ga zang delwe pepum peciakne ga pepeu gade pepi kecang teei bam di kecu nzwa cingkube ngau dicai, 13 iciu cai cingkube pepum peciakne ga teei gwang di memi ncet pie zie, magade teei gwang ciak de di liecai, cingkube pecu mateei pung kebambe de mci di delie beu zie, magade pejamdung ha ciak dicai, pa au mci dida. 14 Dede pejam ring rak eh peteih ngau dicai, pa au mci meda. 15 Cingkube pejam ga peteih ringrak kecu de pie ncet lu delwe реcu le pwane mci melie de dizie kedanemene pejam ring kebam au mateei aide mide lielu kera mateei lu. 16 Dede magade jamring de ha gwang dai dicai, cingkube da pa gwang maisia. 17 Cingkube pecu ncet pie gwang eh peteih ha gwang daidi mi mebi de kecu ncet pie zie. Magade ha dai di liecai cingkube cipau pei de mci di delie beu zie.

18 Mige madau ge reteei teei bam eh yi dai lucai, 19 nah reteei zam ga keha jam ge mede kemzai zam pet dicai, iciu eh cide cingkube de keu lia beu maisia. 20 Cingkube pegeu kang tei lüt cok kecu nzwa mi mebi ncet pie zie nah pe maidung ha di mih. Magade cinzwa di lie cai pecu mci melie beu zie. Aide au lielu kerabe mateei da, magade reteei jam gade teei pet bam cai. 21 Dede cingkube pie ncet delwe cika pemai ha di mene bam liecai nah pegeu kang lüt si mene cidung gah di liecai, iciu cai cingkube pecu lang henane keu ntsam di maisia. 22 Magade pegeu dungga teei dicai, cingkube pecu mci medelie beu zie. Aide au lielu kebui mateei kecune. 23 Dede kemzai ket ga bam liecai nah teizang meliecai, aide au reteijam lai kecu mie ge, nah cingkube pecu mci lie beu dizie.

24 Pegeu ru di kecu dau nah peteih cidung gie-ha mede keha jam bam cai, 25 iciucai cingkube pejam dega pemaidung ha di mi mebi ncet pie zie, nah magade pegeu swa cok kebam nzwa cai, iciu bam cai, aide au lielu kerabe mateei da. Aide au teei pop lwe hema bam da, nah cingkube pecu mci melie beuzie. Aide au lielu kerabe mateei da. 26 Dede cingkube cide ncet pie delwe pejam ga pemai ha bam meliecai nah cide pegeu kangga magede gah lie cai, iciu cai cingkube pecu lang henane ge keu ntsam dizie. 27 Pecai cingkube lang henane benai pecu ncet pie zie. Magade cide pegeudung ga teei zang bam dicai, pecai cingkube pecu mci melie beu zie, aide au lielu kerabe mateei da. 28 Magade pejam de pebam ga bam lwe teizangla di mene maidi liecai, aide au pejam de hema kecube da nah cingkube pecu mci lie beuzie, kedanemene aide pe jam teei rekai kecu gwale ma.

29 Magade mipeige mede mipuige lielu kebui mateei pe peu ga mede pe tangkei ga teei pet cai, 30 pecai cingkube lielu kerabe mateei pegeu swa teei cok si mi mebi ncet pie zie, magade cika nzim bam cai, delwe pemai kencimbe bam cai, aiciu bаm саi cingkube pecu mci melie beuzie. Aide au kemcak ge, lielu kerabe mateei pe peu ga mede pe tangkei ga bam da. 31 Magade cingkube kemcak mateei de piegai delwe pegeu kangga cide gah lie cai, iciu cai cingkube cipau mpaube de kemcak mateei pung kebambe de lang henane kai ntsam dizie. 32 Lang pe henane benai cingkube mateei de teei zang di mi mebi pie zie. Magade kenzimbe mai cika gah lie cai, nah mateei de pe geu ga gwale cok lüt meliecai, 33 Pe maidung tai dizie, dede pejam kebamdung ga au tai lak, nah cingkube kemcak mateei kebam be de lang henane kai ntsam dai dizie. 34 Lang pe henane benai cingkube mateei de teei zang tadi demi kecu ncet pie zie. Magade mateei de pe geu swa cok lüt si meliecai cingkube pecu le mci di delie beu zie. Cipaube de pe painidung heta dizie, pecai pa mci dizie. 35 Dede cingkube mci di delie kebeu cai mateei de kedale liegwang dicai, 36 Iciu cai kedale liegwang dai zie, cingkube pecu ncet pie gwang dai zie, magade mateei de pe geudung ga liegwang dicai, cingkube kenzim be mai peei swamede maduma. Cipau be de au mci meda. 37 Dede cingkube mateei de pe geudung ga liegwang me kecu ngau cai nah pe mai ketiakdung pe jamdung ga lungh bam cai, mateei de yi dida. Pa au mci dida nah cingkube pecu mci di delie beu zie.

38 Magade mipei ge mede mipui ge keha jamdung pe geu ga bam lie cai, 39 Iciucai cingkube cipaube de pejamdung ha dang mi mebi mcet pie zie delwe cide au pegeu ga pejam pet kecu gwale ma. Cine pa au mci.

40 Magade mige pe peutam nghai di eh pe peu kwak di, lie de pa au mci. 41 Magade pe swa peutam nghai di nah pe swa peu kwak dide pa au mci. 42 Dede pe peukwak de ga mede pe sipie ga gie ha kecu jam bam liecai, ciciu kecu au lielu kerabe mateei teei zang bam da. 43 Iciu dicai cingkube pecu pie delwe pe peu kwak kecu ga mede pe sipie teei kecu ga mma kecudung migeu lielu kera mateei nzwa gie ha mi mebi ncet pie zie. 44 Magade ci nzwa bam lie cai pa au lielu kera be mateei pung bam da nah pa au mci meda. Cingkube au pecu mci meliede rang beu di zie pe mateei pe peu ga kebam de ziemne.

45 Lielu kebui mateei pung kebambe de au penia kehak be keu zie, petam teu mdui lak, nah pe ngkie ngkangle pezu gum dizie nah "Mci ma, mci ma" de sah zie. 46 Lielu kebui mateei pung kebam ting pelane pa au mci lak, kedanemene pa au lielu kera mateei pung kebam ne mci meda, pa au pekatei lungh bam di maisia, pa au pekatei lungh maisia. Nah pa ramzeuki gwale lungh maisia.

47 Mania ge hemwangbwa pu dicai, ma mai pai mede langcim pai liede, 48 mede mamai le dak kelu be mede mamai mede langcimpai le nka kelube, mede teigeu le tei kelu keheibe de, 49 magade mania, teigeudung, dak kelu mede nka keludung mede teigeu le tei kelu keheibedung liede mdiak mede giejam ge bam di lie cai hemwangbwa pu kecu zang pet dicai, aidungde cingkube de keu lia beu maisia. 50 Cingkube hemwangbwa pu kecudung ncet pie maisia; pa lang henane ge hemwangbwa pu kecudung keu ntsam di maisia. 51 Lang henane benai pa hemwangbwa pu kecude pie dai maisia. Magade mania mede ma mai mede langcimpai le dak mede nka keludung, teigeu mede teigeu le tei kelubedung dega bam dicai, iciu dicai ai au hemwangbwa pu kecu kesiabe da, nah aidungde au mci meda. 52 Nah mamai mede langcimpai le dak kelu keheibe dung, mede teigeu nia mede teigeu le tei kelube keheibe de, keheibe dung ga hemwangbwa kepu kesiadung ngau lie cai aidungde ru gidi maisia, kedanemene aidungde gade mateei ngau di lubui lu. Mania dungde rurüt dedi maisia.

53 Magade cingkube maniadung ncet pie nah hemwangbwa pu kecudung heta kelu cai mai dicai, pecai sia kebam saudung mania gade, mede teigeu nia, mede dak nah nka keludung gade hiet mpet di maisia, 54 pecai pa penuide maniadung, hemwangbwa pu kedidung de keu ntsam pwa lang henane si eh kai ntsam dai dilu. 55 Pecia maniadung heta kedi cai cingkube hemwangbwa de ncet pie dai zie, magade hemwangbwa de pegiak cam swa mecai, zangra di swa meliede cide au mci meda: Nang maniadung de rudi hemwangbwa de zangra bam swa meliede.

56 Magade cingkupei maniadung heta kedi cai ncet pie eh hemwangbwa de ham dicai, iciucai hemwangbwa zam dungde hiet dilu, penia gade mede teigeu, mede dak kelube mede nka kelu niadung de gade. 57 Magade dak mede nka kelube, mede teigeu le tei keludung maniadung ga hemwangbwa pu kebambe niadung rudi maisia. 58 Mania mede kehei be ma mai langcimpai le dak nah nka kelube, mede teigeu niadung magade aidungde heta kelu cai hemwangbwa kepu de gah dicai, iciu dicai aidungde ma pe kenabe heta dilu iciu lude mci dizie.

59 Aide mania mamai mede langcimpai le tei keludung, mede mamai mede langcimpai le dak kelu mede nka kelu, teigeu mede keheibe dung teigeu le tei kecube dung, hemwangbwa pu kecudung ziemne hezai delie, iciu eh mci mede mci melie kecu rang lia lu kerane."