1 RAMPAUBE Moses dage rangdi: "Cingkube Aaron namedung dage rang beulo, ‘Nnui kakga de mige tsai kedime ziemne pecu tei heradi lak, 2 pe kilungme pecu nnatume, pe pui, pe pei, pe napei, pe napui, pe sinabe gwale, 3 mede pe tipui kemci pui pecu ngngei eh kebambe, pa pe nahpei kegane, pe ziemne pa pekatei pecu tei heradi zie lie mai. 4 Pe nau kibaume tsit de ziemne pekatei pecu tei heradi kerabe ma.

5 Cingkumedung penui peu tai lak mede penui tangkei maidung de tai lak, mede penui pumdung kam lak. 6 Penui penui Tinggwang dade mci maisia nah penui Tinggwang zi tei hengam lak, kedanemene cingkume ne RAMPAUBE taktyei reca de tei beu la, penui Tinggwang gu tangku le. Cine cingkumedung au mci maisia. 7 Penui helipui de penui nau lak nah pecu tei hera kedime de, nah penui pe nahpei ki kangga lunghta kedi pui ge de penau tei lak, kedanemene penuide Tinggwang ziemne keu ntsam di delu.✝ 8 Nnui pecu keu ntsam lu, kedanemene pa au tangku reca nnui Tinggwang de peu kelabe delu. Nnui au pecu mci lie kerabe, kedanemene Ih, RAMPAUBE nnuide tei mci beu kelabe, au mcilu. 9 Cingkume napui keheibe de pekatei pecu tei hera di eh helipui ge tei di eh pe pei de hengam tei dicai. Pecu ru bi di kerabe. 10 Pe sinamedung kakgade cingku kedibe tei kebambe de, keheniak ca pwa pe peu gage rui gai pwa kebambe de, nah cingku kedime paini keyidung teu kerane tei mci kelube de, pe peutam tau mene mede pe paini hiet kerabe ma. 11 Pa ketsai pauh kebam keheiga mie eh pecu tei heradi kerabe ma, pe pei mede pe pui ziemne kecang lie de. 12 Cingku kedibe kereca ni kemci sau de gi di kerabe ma mede pe Tinggwang kemci ni de tei heradi lak, kedanemene pecu au cingku kedibe zie lie eh pe Tinggwang keniak ca dele tei mci di delu. Ih au RAMPAUBE. 13 Cingku kedibe relei kemci pui gede penau tei zie. 14 Pa hemipui ge de penau lak, tahkedi pui ge, mede helipui gede. Pa aikenzwa puidung de de penau lak. Pekatei pe leuhme kakga de relei kemcipui gede rünne penau lubui, 15 cine pa pe namedung de pe minadung kakgade tei heradi lak, I RAMPAUBE kecune, pecu tei mci kebeube.’"

16 RAMPAUBE Moses dage rang eh, pa rang eh cu, 17 "Aaron dage rangbeulu, ‘N leuhme ceheu pelane ga pe pum keswame migede, pa pe Tinggwang dage mie taktyei reca peu lak. 18 Mige pe pum swa kebamme RAMPAUBE da gwang kerabe ma, miakcietme mede mige tetlu la kemakme, mige pe rehi yita kedime, tsam kedi aikenzwame ge de lak, 19 heba mede hepi sia kedime gede lak, 20 mige pe caile peru ketwa mede nkainlaime mede raduime, mede mige pemiak lung kemaume, mede mateei kepungme gede lak, majam keteei, kencakdung, mede mige pebum tei piet kedime gede lak. 21 Aaron leuh gade cingkume pe pum swa kedime mige de de RAMPAUBE dage mi le reca tei gai kera peu gwang mna lak. Ci kenzwa pe pum swa kedime; pa pe Tinggwang dage tangku reca tei beu kera gwang mna kerabe ma. 22 Pa pe Tinggwang taktyei de tyei lu bui, kesa mci tube mede kemcibe lie de. 23 Ciciu liede, pa kehezupai lungle lüt kerabe ma mede reca bam tai ga, kedanemene pa pe pum swa kebamne, ciciu eh pa a kemci ni de tei heradi melu kerane, Ih RAMPAUBE kecune, penuide tei kemcibe.’" 24 Cine Moses Aaron dage sam aidungde rang beu, pe napeidung, nah Israel ga mina pelane dage.