1 RAMPAUBE Moses dage rang eh, pa rang eh cu, 2 "Aaron nah pe napei kena dage rang beu lo, penui de Israel minadung gu kemci niadung gade nzia di lulo beu lu, penui a ziemne kai ntsam pwa kebam de gade. Penui a zi kemci de tei heradi kerabe mezing. Ih au RAMPAUBE. 3 Penui de rang beu lu, ‘Magade n leuhme mi keheibe de nnui ceheuting dau Israelme kemci niadung lie eh RAMPAUBE ziemne keu ntsam kenzeu de ga gwang mna liecai, pa mci mene kebam ting dau, cipaude de a dwa gade keugi dizie: Ih au RAMPAUBE.

4 Aaron leuhme kempa mateei mide la kelabe, mede mateei pedui lwa kecube pe pumteih ga kebamme, penui migede RAMPAUBE dage ratakdung tei kegai magede tyei gailak penui mcilu kemaktane. Mikeheibe de ketsai paau tung kecu gade ma kehera keheibe de tungdi eh hera kelame, mede mige henatsi lwapet kecube de tung di eh hera kelame, 5 mede keheibe pecu tei hera kecu bwa kela makaune keheibe de tungdi eh hera kelame, mede keheibe ne de pecu tei hera pwa kelame, mci kemak makeheibe de lubui, 6 pecai cingkube mci kemak makeheibe tung dicai pa tinghegi kemaktane mci mene bam dizie. Pa kemci taktyei magede tyei lak, pa dui gage pe pum pia di kemaktane.

7 Tingnaimiak nlüt kedidau, pa mci dai luzie. Tingnaimiak nlüt kedicai pa taktyei kemci tei lubui, kedanemene cidungde pe taktyei kecune. 8 Pa tsai eh ngau kelu magede tyei lak mede renaam kaune ne teitset pwa kebam be tyei lak, pekatei pecu tei hera dilu kebuibedung. Ih au RAMPAUBE.

9 Cingkumedung a zaidung mzai maisia, meliecai penuide mau lie de eh mmau dizie nah acu herüt peu ta kedine tsai di lubui. Ih penuide tei mci beu kelabe RAMPAUBE.

10 Cingkume kibaume kemakme, cingkube giame de si eh mede pane li kelu kilamedung liede kemci taktyei keheibe de tyei gailak. 11 Dede magade cingkupei ge pe rangkang le hebaangme keheibe ge de lui lucai, cipau kila de RAMPAUBE dage ratak tei pwa kebam taktyeidung tyei lubui. Cingkube kibaumedung nah pe ki gade nna kelu hebaangmedung, penui lie de taktyei cidungde gade pecu ngngwa tyei lubui.

12 Magade cingkube napui mige cingkume kemak ge dage pe laktak tei cai, peu kegai kemci recadung pa kette tyei gailak. 13 Dede cingkube napui hemipui ge cai, mede laksi ge, nah pa pe na gah cai, nah magade pa pe pei kiga cailigwang cai pa relei kebam tingdau nzwa, pa pe pei taktyei gade matyei lubui. Dede cingkume kibaume kemakme migede cingkume taktyei gade matyei gailak.

14 Magade mige cimene kemci taktyei tyei cai, iciucai pa cingkube de cide gu pemi peu di maisia; pa cika ge zi mengei gade zi ge kai si maisia nah cingkube de peu caili beu di maisia.

15 Israel minadung kemci niadung RAMPAUBE dage reca teugwang kebeubedung de tei heradi kerabe ma, 16 nah penui kemci taktyei de tyei mau kedi ziemne penuide mmau di melu kerane, kedanemene Ih cidungde teimci beu kela RAMPAUBE lu.’"

17 RAMPAUBE Moses dage ranggai, 18 "Aaron nah pe namedung nah lsrael minadung pelane de mpaulu. Penui dage ranglo, ‘Israelme keheibe de, mede sangme ge Israel ga lungh kebamme, penui ratak ge peu kegaidau, cide sampet teicanglu kerane liede, mede cide suiyi mapeu ge liede, mede penui RAMPAUBE dage keru ratak tei kegai,

19 magade cide luulu zie liecai, zamra kemak makau peseu ge ketum hau, meurün hau, mede hemeudung kakgade pwa peu maisia. 20 Dede zamra bam kedi magede nnui reca teigai kerabe ma. Ih nnui nding gade cide luu gailak.

21 Keheibe de kekangbau recadung kauhau mede meurün hau gade RAMPAUBE dage sampet teicanglu kerane ratak ge peu kegaide mede sampet teicanglu kerane RAMPAUBE de peu, mede suiyi mapeu ge nzwa, cide luulu kerane zamra kemak makaune maisia. Makaune da zamra kette bam kerabe ma. 22 Nnui makaune pe miak cit, telwa mede rejam kedi, mede peteih lungmau kecube, majamdung, mede pegeu rejam pwa kebambedung tei beu kerabe ma. Nnui aidungde RAMPAUBE dage recabam gage keru ratak tei gai beu kerabe ma. 23 Nnui hetumseu ge mede meurünna ge yicang kemakpe mede keceube ge suiyi mapeu ziemne peu lubui, dede cikenzwa reca de sampet ge ziemne au luu lak.

24 Makaune pe bom rezam kedi, teipang di, tei hakti, mede raidi kecube le RAMPAUBE dage reca teigai so. Nnui deu lung gade aide teiso. 25 Sangme dade ngaukelu makaune ge de pwa taktyei reca nnui Tinggwang de peu kerabe ma. Makaune cidungde au yicang ma nah penuida zamra la, nnui ziemne cidungde luu gailak.’"

26 RAMPAUBE Moses dage ranggai, 27 "Hetumna ge mede meurünna ge mede hemeuna ge mciulu keludau, cide pe pui da lang henane bam maisia. Pecai lang hesetne benai gade, cide RAMPAUBE dage mi le ratak tei kegai ratak ge tei eh luu lubui.

28 Hetum ge de mede meurün pui gede pe na de si eh langnai ge gage pe pui pe na de daptset so. 29 Nnui RAMPAUBE dage ketwa reca tei kebeu dau, nnui cide luulu kebui ria gade ratak tei beu maisia. 30 Cide ratak tei kegai benai gage tyeilu maisia. Pecai benai tingcang ziemne nnui magede kainzeu kerabe ma. Ih au RAMPAUBE.

31 Cine nnui a ajadung mzai nah teilu maisia. Ih au RAMPAUBE.

32 Nnui a kemci zi tei heradi kerabe ma. Israel minadung Ih mci kecu ranglu maisia. Ih nnuide tei mci beu kelabe RAMPAUBE, 33 Egypt deu gade nnuide ngngwa mpet kebeube nnui Tinggwang lu kerane: Ih au RAMPAUBE."