1 RAMPAUBE Moses dage marang, pa rang eh cu, 2 "Aaron nah pe napeimedung de peda ngngwa gwanglu, cingkume paini nah keheniak ca, kemau reca ziemne hetumseu, hemeuseu kena, nah tsehi kai kemak tangku rak. 3 Mina maa pelane de reca paiki kimui gage qu hekwa lu." 4 Moses RAMPAUBE kerang nzwa tei lu, mina maabe reca paiki kimui ga gwang ngkwa lu. 5 Iciu eh Moses mina maabe dage rang eh, "RAMPAUBE ainzwa tei lu lo aja kaibeu."

6 Moses Aaron penai pe napeimedung de ngngwa gwanglu, nah penuide dui le hui mci lu. 7 Pa Aaron de cuatie kai beu nah kiakangle pekia kangbeu, pecu paini heria le dak kelube pecu kai beu nah cingkume hekarakcum de kai lu eh kiakang dak hemi süt kelu le pecu kang beulu. 8 Pa pereu gage hekarakcum kaibeu, nah hekarakcum gage Urim nah Thummim kai beu. 9 RAMPAUBE pe dage aja kaikebeu nzwa, pa peuzui peurwa pepeu gage kaibeu, nah peuzui peurwa swa gage pa kecak kwak ge kaibeu cide kemci peurwa.

10 Moses keheniak ca keulu, reca paiki nah cika kebam leune keniak mci gai eh RAMPAUBE de peu lu. 11 Pa pia hena maca recabam gage kezin gai, nah recabam de keniak lu nah malang lidung pelane, nah ma kehuikwak nah pepidung tei mci gai lu eh RAMPAUBE de peu lu. 12 Pa keheniak ca kesa Aaron peu gage ruigai nah pecu keniaklu nah pecu kedet lu. 13 Moses Aaron napeime de ngngwa gwang lu nah penui cwatie kai beu lu. Pa kiakang le penui kia kang ntip gai nah langcim pai le penui peu kezui lu, RAMPAUBE pe dage aja kaikebeu nzwa.

14 Moses kemau reca ziemne hetumseu teu gwanglu, nah Aaron nah pe napeime kemau reca ziemne hetumseu teu kegwang tumseu peu gage penui ba kailu. 15 Pa cide teitset lu, nah pa hejai keu lu nah pezurang le recabam kiidung gage kai, recabam tei mci gai, hejai kedadung recabam pi gage ruigai, nah Tinggwang dage tei mci gai beu eh ngngwa kezuyi ratak teilu kerane. 16 Pa pelungnet ca pelane, penceu gum kebam ca nah penkeu kenana nah cika pecadung de si eh keulu, nah Moses cidungde pelane recabam reu gage ru gai. 17 Dede hetumteih kebangbe, peteih, pegeu nah peteudung pa ramzeuki gwale ge ru di, RAMPAUBE pedage rang kebeu nzwa.

18 Moses keru reca ziemne meurünseu peugai, nah Aaron nah pe napeime penui ba meurünseu peu gage kailu. 19 Pa teitset lu nah pejai recabam tu leu gage kezin gai.✝ 20 Pa meurünseu de dim kecai lu nah pe peu nah peteih dim keludung nah pecadung rudi. 21 Pa pe lungnetdung nah pepidung dui le huilu, nah pa meurünseu pelane recabam gage rugai di, cide keru reca ge nah perim kehengui ge pet lu la, RAMPAUBE ne Moses dage rang kebeu nzwa keru reca mi le teikelu reca RAMPAUBE dage tei gai.

22 Pecai Moses meurünseu keda ge peu gai, kemci kedet ntsam kecu ta tei kera meurünseu, nah Aaron nah pe napeimedung penui ba meurünseu peu gage kai lu. 23 Aaron cide teitset gai, nah Moses hejai kesa keulu nah Aaron kwentu zetle nah pe ba zetle zurangpui ditube, nah zetle pi zurang ditube dung gage kai. 24 Pa Aaron napeimedung de ngngwa gwanglu, nah pa hejai kesa keulu eh penui kwentu zetle nah penui zurangpui ditube, nah zetle pi zurang ditube dung gage kai. Pecai Moses recabam mbie leune gage hejai hezin gai. 25 Pa peca, pemi ca, pelungnet ca pelane, penceu gum pwakebam ca nah penkeu kenana nah cika pecadung nah pepi zetle pipum keulu. 26 Tangku rak tsehi kai kemak RAMPAUBE dwa ga kebam gade, pa tsehi kai kemak tangku ket, nah maca si kecu tangku ket, nah tangku kerepei be ket keu lu eh peca nah pepi zetle pipum reu gage kailu. 27 Pa Aaron nah pe napeime ba ga ge pelane pwa gai beu. Iciu eh cidungde kezin gai, RAMPAUBE dwa gage hejai kezin reca ge tei eh. 28 Pecai Moses penui ba gade cidungde pwalu nah keru reca tei eh recabam gage cidung de ru gai. Cidung de kemci kedet kentsam reca ge perim kehengui pet lu la. Cide mi le teikelu RAMPAUBE de kepeu reca ge. 29 Moses cipau hekarak de keulu nah cide RAMPAUBE dage kehezin reca tei eh kezin gai. Cide cingkume de kehedet reca meurünseu de Moses qwa, RAMPAUBE pe dage aja kaikebeu nzwa.

30 Moses keheniak ca kesa nah hejai recabam ga kebam de keulu, pa aidungde Aaron nah Aaron paini, pe napeime de nah pe napeime painidung reu gage pecu si eh hezin gai. Aiciu eh pa Aaron nah pe niadung, nah pe napeimedung nah penui niadung RAMPAUBE dage kai ntsam gaibeu.

31 Cine Moses Aaron nah pe napeimedung da rang eh, "Heteih de paiki kimui gade swalu, nah cika de tyei lu, nah tangku rak ga kebam teimcikelu tangku de, Ih aja kaikebeu nzwa, ‘Aaron nah pe napeimedung ne tyei zie.’ 32 Heteih nah tangku kebangbe keheibe de nnui ru di maisia. 33 Nnui lang henane paiki kimui tetkah lak, nnui kehedet renet ketei tingba cang kemaktane. RAMPAUBE lang henane ziemne nnui de tei mci beuzie kecune. 34 Henai tei kegai de, RAMPAUBE ne tei lulo aja kaikebeu ngngwa keyi ratak nnui ziemne da. 35 Nnui tingmui tingba lang henane paiki kimui ga bam zie, nah RAMPAUBE aja kaikebeu de mzai lu, iciu de nnui tsai dilak, kedanemene aide RAMPAUBE a dage aja kaibeu delu dedi." 36 Cine Aaron nah pe napeimedung RAMPAUBE ne Moses dage penui de tei lulo aja kaikebeu leune teilu.