1 Aide paurui ratak hezai ge. Cide mci tube ge. 2 Penui paurui reca ziemne makaune kegi bam gage teitset gai zie, nah penui pejai pwa recabam petu pelane gage kezin gai zie. 3 Peca kebam pelane teu reca dizie: pemih ca de, pe lungnetdung gumpung kebam ca de 4 Pe nkeu kena de nah cika pecadung, pekia tai ga kebam be, nah penkeu, penceu de gumpwa kebam de si eh, aidungde keumpet ciakdi maisia. 5 Cingkube aidungde recabam ga ge ru gai zie, mi le tei kelu reca RAMPAUBE de peu zie. Aide paurui ratak. 6 Mipeina leune cingkume kibaume reca aide tyei lu bui. Cide kemci bam gade tyeilu maisia, kedanemene cide mci tube lu. 7 Kemau reca de paurui ratak nzwa da. Hezai kenana ziemne nsam da. Ratak tei kedi kaunedung cingkume caune reca ta tei bi cipaume gu dizie. 8 Keru reca keheibe ne kepeu hebai pwa kebam reca de cingkupei reca ta keteibe ne keu zie. 9 Mei reca keheibede mimang reu gage ru kelu, nah ma kehetah kwak ga ge mede hegeu kwak gage lang kelu bedung reca ta tei kebeube cingkupei gu dizie. 10 Mei reca keheibede, kecangbe mede maca hai kedibe leu, Aaron leuhme pelane gu nsamram eh penui mzi maisia.

11 Hezai aide mina de peu RAMPAUBE de ngngwa kezuyi ziemne recadung teibeu kecu ratak tei kerane. 12 Mage gade mige deukeherei delie de kecu zi gade ratak ziemne mapeu cai, pa ratak de si delwe tangku cehi kaimene tei kelube peu maisia dede maca le hai lu, delwe tsehi kaimene tei kelu tangku maca le keniak kelube, nah tokkui keyibe le tangkudung maca hailu tei kelube zie. 13 Deukeherei delie de kecu ratak de de pa peu zie, pe reca kezuyi ziemne kepeu de si eh tangku tsehi kai kelube peu zie. 14 Pa ratak ketsamtsam dung ziemne ketket eh RAMPAUBE dage peu zie. Cide cingkume cau bene kezuyi reca ta tei eh hejai recabam gage kezin gai bi, cipaume gu dizie.

15 Kezuyi reca ziemne deukeherei delie de eh pa kai kebeu teih de ratak keteibenai gage tyei lu maisia, pa pecai benai tingcang kecang ziemne magede bang nzeu lak. 16 Dede magade pe sampet ratak ziemne peu cai, mede suiyikai reca ziemne cai, heteih cide pa ratak tei kebeu benai tyeilu maisia, dede bang kelu keheibe pecai benai tyeilu bui. 17 Iciude ratak tei kedi heteih keheibe de bang cai langcumne benai ru di maisia. 18 Magade kezuyi ratak tei kegai teih de langcumne benai kette tyei dicai, cide lu gailak, mede cide reca peu kegaibe da samlam gwang gailak, cide mci kemak ge dizie, nah cide tyei kelube pekatei pemau ziemne keherei zie.

19 Heteih keheibe de mci kemak nia tung kedibe tyei dau lak. Cide rudi maisia. Kedabe teih dung cai, caugame mci bam bi penui tyei lubui. 20 RAMPAUBE dage kezuyi ratak ziemne makepeu teih keheibe de mci kemakme tyei dicai, cipaude de pe leuhme kak gade keu mpet dilu. 21 Mede mi keheibe de mci kemak gu dung tung di cai, mci kemakme de lu bui, mede mci kemak makaune, mede mci kemak kedadung, kenkaube niadung, nah mage gade pa kezuyi ratak mapeu teih RAMPAUBE gu kesa tyei dicai, cipau de de peleuhme kak gade keu mpet di lu.

22 Pecai RAMPAUBE Moses dage marang, pa rang eh cu, 23 "Israelme de mpaulu nah rang beu lulo, ‘nang hetum, meurün, mede hemeudung ca tyei lak. 24 Makaune ratak ziemne mene teitset kedibe, mede teikuu ne tuitset kedibe cadung kedabe ta ziemne keu lubui, dede nang cide tyei lak zing. 25 Keheibede RAMPAUBE dage mi ratak ziemne makaune ca mina ratak peu lu kebui de tyei dicai, cipaude de pe leuhme kakga de keu mpet dilu. 26 Nnui kilung keheiga de de nnui keheiteide nruine mede makaune jai tyei lak. 27 Caune hejai keheibe de tyei bi, cipaude de peleuhme kakgade keu mpet dilu.’"

28 Cine Rampaube Moses dage marang, pa rang eh cu, 29 "Israelme de mpaulu nah rang beu lu lo, ‘RAMPAUBE dage kezuyi mapeudung teu ratak tei kegai keheibe de pe ratak kesa teugwang RAMPAUBE de peu maisia. 30 RAMPAUBE de reca mi le teikelu pwapeu maisia, pekatei peba le keu gwang mai sia. Peu pecu maca nah hekakrak de kezit lu kerane delwe RAMPAUBE dwa de kezit reca teilu kerane. 31 Cingkupei maca de recabam gage ru lu maisia, dede hekakrak de au Aaron nah peleuhme gu dizie. 32 Nnui kezuyi ratakdung mapeu kepeu gade keu mpetlu eh zetle pipum cingkupei de nnui gu reca peulu maisia. 33 Aaron leuhme gade cingkume caune kezuyi ratak hejai nah maca reca tei gai bi, reca tei kegai ziemne peqwa rehi gade pa zetle pipum lu dizie. 34 Kedanemene Ih hekarak kezit reca de Israelme dade keulu da, nah pepipum cide kepeu de, nah penui cingkupei Aaron nah pe napeimedung de peubam kela qwa de peudi.

35 Aide RAMPAUBE ziemne mi le teikelu recadung gade Aaron nah pe leuhme qwa ge, Moses penui de RAMPAUBE tagwa ziemne cingku ta tei kera nlum kebeu benai gade. 36 Aide RAMPAUBE ne rang beu, Israelme dade penui qwa peu lulo eh. Pa cingkumedung de kedet kelu benai gade cide ceheu pelane ga penui qwa peu lamui zie.✝

37 Aide keru reca ziemne hezai, mei reca, kemau reca, paurui reca, kedetkelu reca, nah kezuyi recadung ziemne de, 38 aipaude RAMPAUBE Sinai deutu gade Moses dage aja kaikebeu, cipaunai pa Israelme de penui recadung RAMPAUBE dage teigai lulo Sinai hetaideu gade rang kebeu benai.’"