1 Lang hesetne benai Moses Aaron nah pe napeime nah Israel muiteumedung de qulu. 2 Pa Aaron dade rang eh, "Makaune kebamdung kakgade hetumseuna ge kemau reca ziemne nah zamra kemak meurünna ge keru reca ziemne keulu, nah RAMPAUBE dwaga ge reca beu lu. 3 Nang Israelme de resiu eh rang beu lu, ‘Hemeuseu ge kemau reca ziemne nah hetumseuna ge nah meurünseu ge, kenana mmi ket kedi, nah zamra tei kemak ge keru reca ziemne keu lu; 4 hetumseu ge nah meurünseu ge de keulu kezuyi recadung RAMPAUBE dage teigai beu kera, nah maca le hai ncüt kelu mei reca de si eh, kedanemene henai RAMPAUBE n da gwang zielu.’" 5 Cine penui Moses rang kebeu leune kengkwa paiki ga teugwang lu, nah Israelme pelane cika ngkwalu nah RAMPAUBE dwa ga saplu. 6 Pecai Moses ranggai, "Aide RAMPAUBE nnuide tei lulo aja kaibeu da, iciu eh pe kendu nnui dade ngaulu kerane," 7 Moses Aaron dage rangdi, "Recabam taiga gwanglu nah n kemau reca nah keru reca nkatei nziemne nah nleuhme ziemne ngngwa keyi ratak tei gai lu, nah minadung ziemne de ngngwa keyi ratak tei gailu, RAMPAUBE aja kaikebeu nzwa."

8 Cine Aaron recabam taiga mielu nah peziemne kemau reca tei kera hetumseuna teitset lu. 9 Aaron napeimedung pecu hejai pwagwang beu, nah pa cika ge pezurang mpunglu delwe recabam kiidung gage kai, delwe pa recabam pi tsiadung gage hejai ruigaidi. 10 Iciu eh, pa peca, penkeu, penceu gum pwakebam recabam gage kemau reca ge tei eh rugai, RAMPAUBE ne Moses da rang kebeu nzwa eh. 11 Peteih nah pegeu pa ramzeuki gwale ge rudi.

12 Aaron keru reca ziemne makaune teitset lu, nah pe napeime pecu hejai pwabeu, pa cide recabam ki miak leu gage kezin gai. 13 Pecai penui keru reca teihkang dim takcai kelubedung pepeu si eh pecu peu gai, nah pa cidungde recabam gage rudi. 14 Pa pe lungnet nah pe pidung hui mci lu nah keru reca reu gage kailu eh recabam gage rudi.

15 Aaron mina gu reca peu gai, hemeuge, iciu eh penui kemau reca ratak ge tei eh teitset lu; kemau reca ziemne, pa keraibe hemeu le reca tei kegai nzwa. 16 Pa keru reca peu gai nah RAMPAUBE aja kaikebeu nzwa reca lu. 17 Pa mei reca peu gai; pa bazum kepui hezum lu eh tingcang keru ratak ketei recabam gage ru ncüt gailu.

18 Pa hetumseu nah meurünseu de teitset gai, kezuyi reca ratak ziemne, cide mina ziemne Aaron napeimedung pecu hejai peu gai, cide pa recabam kimiak leune gage kezin gai. 19 Iciuliede, penui hetumseu ca, nah meurünseu ca, pemi ca, pelungnet cadung, penkeu kenana, nah penceu de gumpwa kebamdung de dang mpetlu. 20 Penui dang mpet kelu dung keulu delwe pe hekarakdung gage kai lu, nah iciu eh Aaron recabam gage peca rugai. 21 Aaron pe hekarakdung de nah zetle pipum de kezin gai. RAMPAUBE dwa gade kezin reca tei eh, Moses aja kaikebeu nzwa.

22 Pecai Aaron pe ba kena minadung reu gage hwa gai eh penui de samlam beu; iciu eh pa kemau reca ratak, keru reca, nah kezuyi reca keteibam gade tet nghung di. 23 Moses penai Aaron RAMPAUBE kebam paiki lungga nlütdi, pecai mpet dailu eh minadung de samlam beu, nah RAMPAUBE kendu mileune de peu ngau gai. 24 Cidau RAMPAUBE mi langgai nah keru reca nah peca recabam ga kebamdung rudi, minadung aide ngau kegaidau, penui sahbak gai eh penui zu keumie di.