1 RAMPAUBE Moses dage ranggai, 2 "Israel namedung dage rangbeu lo, ‘Magade keheibede RAMPAUBE dage sampet yi tsamceu eh teigai cai, ma aidungde le pemidung rietlu. 3 Ngu pemi cide mipei mmi ngkai gade mmi riakherok kecang ziemne rangkanggeu shekel riakngei maisia, kereca kemcibam gu shekel cia. 4 Mipui pemmi nsam kecube ziemne nnui gu pemi shekel camrei maisia. 5 Mmi mengei gade mmi ngkai kecang mipei ge ziemne pemi shekel ngkai maisia, nah mipui ge ziemne shekel kerei maisia. 6 Kei ge gade mmi mengei kecang mipei ge ziemne pemi rangkanggeu shekel mengei maisia, nah mipui ge ziemne rangkanggeu shekel kecum maisia. 7 Mmi riakherok gade penreu le mipei ge ziemne pemi shekel kereimengei maisia, nah mipui ge ziemne shekel kerei maisia. 8 Dede magade sampet kegaibe de pemi kap canglu tadi cai, minabe de cingkube taiga ngngwa gwang maisia, nah cingkube ne sampet kegaibe pei de peulu kebui rehi gage pemi tei beuzie. 9 Magade mikangge RAMPAUBE dage makaunedung ratak teigai neu cai, nah magade RAMPAUBE cide luulu cai, cipau kaune de pe dage keumpet ntsam dizie. 10 Minabe cikenzwa makaune de kedi mede tei ntsam kerabe ma, keyibe nding kesiabe mede kesiabe nding keyibe. Magade pa teikedi ciakdi eh makaune ge nding kedabe tei dicai, cide kenana rehiak kedibe mci dizie. 11 Cinzwa liede, magade minabe ne RAMPAUBE de peu kera sampet kebeu de mci kemak ge dicai, cinzwa eh RAMPAUBE cide luulu ta dizie, iciu cai minabe cingkube dage makaune teugwang maisia. 12 Cingkube cide mi riem luzie, makaune helila mi ge gade. Makaune mi cingkube ne riem kegai keheibe, cide pemi zie. 13 Magade pe mpaube ne rilu neu bamcai, cipaude mi gu pia mengei kiee ge kaisi kerabe.

14 Mige RAMPAUBE dage kemci mapeu ge lie eh peki keu ntsam keludau, cidau cingkube ne cide keyi mede kesia pie lwe pemi riem gai zie. Cingkube ne pemi riem kegai de, pemi cide dizie. 15 Dede magade pe mpaube ki keumpet ntsam kelude rilu neu bamcai, pa cipau mi gage pia mengei ge kaisi maisia, nah cide pe gu dizie.

16 Magade mige pe deu kesa keumpet ntsam nzeu cai, cide gu pemi de au heleuh cide ga ling kera kiee ge nsam zie, barley homer ge gu mi rangkanggeu shekel riakngei zie. 17 Magade pa Jubilee bekum pe luh keumpet ntsam lucai, pemi cide riem kegai de pelui bamzie. 18 Dede pa magade Jubilee tingkum caine pe luh keumpet ntsam cai, cingkube Jubilee cia bekum ngau dai kemaktane mmidung bang kebam gade pemi cet eh pei maisia, nah cipau mi de tei ncamdi maisia. 19 Magade minabe pa keumpet ntsam kenzeu luh de rilu neu bamcai, pa pemi de gage pia mengei ge kaisi maisia, nah cide pegu dizie. 20 Magade pa luh cide rilu mecai, mede magade pa luh cide mi kedame dage zwa beu dicai, cide madau gede ridai gailak. 21 Cinzwa meleine, luh be, magade Jubilee bekum püt beu dicai, cide au RAMPAUBE dage kemci mapeu ge zie, RAMPAUBE de luh ha ciang kedi nzwa zie. Cide au cingkube gu dizie. 22 Magade mige pa luikelu luh de keumpet ntsam lucai, dede cipau luh de pe kilungme deu gade mecai, 23 pecai cingkube Jubilee bekum kecang kiee ge gu pemi riem beuzie, nah minabe RAMPAUBE dage kemci mapeu rehi gade cipau benai cide gu pemi peu maisia. 24 Jubilee bekum, luh be cau dade luibi cipaude da keu caili beuzie, hangdeu mpaube dage. 25 Pemidung pelane kerecabam shekel gade perüt riet maisia. Gerahs ngkai ge le shekel ket nsam maisia.

26 Migede makaunedung mciu raitube keumpet ntsam so, mciu raitube dau gade RAMPAUBE gu dida; hetumseu mede meurün liede, cide au RAMPAUBE gu. 27 Magade cide mci kemak kaune ge liecai, pe mpaube ne pemi cide riet kenzeu de gade luidai lubui, nah cide gage pemi pia mengei ge kaisi dai maisia. Magade makaune rilu mecai, cide riet kelu mi gage zwa kerabe.

28 Dede magade cide mige ne RAMPAUBE de peu kegai, peda kebam leune gade, mina mede makaune, mede pe kilungme deu, zwadi lubui mede ri lubui. Makeheibe pwa kepeu de au RAMPAUBE dade mci süt. 29 Matei kengkap ga helung kekaibe de ziemne au pemi kette kap beuso. Cipaube de au teitset di maisia.

30 Hangdeu gu kerei zige leune, hangdeu ga meitsi mede tsingbangdung gade matsi liede, RAMPAUBE gu. Cide au RAMPAUBE dade mci. 31 Magade mige pe gu kerei zige keheibe de ri cai, pa pemi pia mengei ge kaisi maisia. 32 Kauruine hau keheibe ziemne gu kereizige au, meurünkekwabe tuitie kangga kebam leune, RAMPAUBE ziemne kereizige keumpet ntsam di maisia. 33 Meurünkekwabe makaunedung yiki cube mede siaki cube peidi kerabe ma, nah pa ket paude keda mding teidi kerabe ma. Magade pa cide kedi di liede, cipau kenana nah tei kedi kedibe de mci dizie. Cide rilu gailak.’"

34 Aidungde RAMPAUBE ne Israelme ziemne Moses dage Sinai Deutu gade aja kai kebeudung.